10
Ka pangulu ne si Tula
1 Te migpatey e si Abimilik, duen e man‑e migpangulu te Israil eyew egpangabangan ka me etew. Iyan migsubal si Tula ne anak ni Puwa. Ne si Puwa anak ni Dudu. Migpuun si Tula te kabuhalan ni Isakar, wey diye sikandin mig-ugpe te Samir te bubungan te Ipraim.
2 Neyimu sikandin ne pangulu te Israil te daruwa ne pulu wey tatelu (23) ne leg‑un. Te migpatey e sikandin, diye ded sikandin ilebeng te Samir.
Ka pangulu ne si Hair
3 Te migpatey e si Tula, iyan nakasinundul si Hair ne matig-Gilyad ne migpangulu te Israil. Migdaruwa ne pulu wey daruwa (22) ne leg‑un ka pegpangulu rin.
4 Due tatelu ne pulu (30) ne anak din ne me lukes ne tigsalimbeka te asnu. In-angken dan ka tatelu ne pulu (30) ne siyudad ne diye te Gilyad, ne ingngaranan ded kuntee te ugpaan ni Hair.
5 Te migpatey e si Hair, diye ded sikandin ilebeng te Kamun.
Ka peggimu man‑e te mareet te me Israilita
6 Ne miggimu e man‑e te mareet ka me Israilita diye te tangkaan te Magbebaye ne Manama. Mig-inniyuhan dan ka Manama wey warad sikandan migpamakey kandin. Nasi migsimba sikandan te me diyus-diyus ne Baal, me Astarut, me diyus-diyus te me matig-Sirya, matig-Sidun, matig-Muwab, matig-Amun wey te me matig-Pilistiya.
7 Sikan naa ka migpangebel-ebel ka langet te Magbebaye ne Manama te me Israilita, wey intuhut din ne egkatalu sikandan te me Pilistihanen wey me Amunihanen.
8 Te seeye ne me leg‑un, imbaybayaran te me Amunihanen wey me Pilistihanen ka langun ne Israilita. Ne imbaybayaran te me Amunihanen te sapulu wey walu (18) ne leg‑un ka me Israilita ne diye mig-ugpe te dapit te igsile te Weyig ne Hurdan ne diye te Gilyad.
9 Ne inlusuran degma te me Amunihanen ka me kabuhalan ni Huda, Binhamin, wey ni Ipraim ne diye nangugpe te talipag te Weyig ne Hurdan. Sikan naa ka amana mig-antus ka me Israilita.
10 Seeye naa, migpangananey ka me Israilita te Magbebaye ne Manama te migkahi, “Nakasale key keykew su in-engkeran ney sikeykew ne Manama ney, wey nasi key migsimba te me Baal.”
11 Ne ingkahiyan te Magbebaye ne Manama ka me Israilita, “Te imbaybayaran kew te me matig-Ihiptu, me Amurihanen, me Amunihanen, me Pilistihanen,
12 me Sidunihanen, me Amalikanen, wey te me Maunihanen, migpangananey kew keddi, wey impangabangan ku sikaniyu.
13 Piru in-engkeran a nikaniyu wey migsimba kew te me diyus-diyus, sikan naa ka kene kud e sikaniyu egpangabangan.
14 Hipanew kew wey pangananey kew te me diyus-diyus ne in-alam niyu, pepangabang kew kandan.”
15 Piru migpeyid‑u-hid‑u ka me Israilita te Magbebaye ne Manama ne migkahi, “Nakasale key keykew, purisu, himuwa nu ke nekey ka igkeupii nu ne eggimuwen kanami. Piru ikeyid‑u key red ubag nikeykew, wey pangabangi key kuntee nikeykew.”
16 Seeye naa ka in-engkeran dan e ka me diyus-diyus wey migpamakey e sikandan te Magbebaye ne Manama. Nataman, neyid‑u red ka Magbebaye kandan.
17 Ne migpangandam ka me Amunihanen wey migkekampu diye te Gilyad. Nanlibulung degma ka me Israilita wey nangekampu diye te Mispa.
18 Ne migpalalahey ka me pangulu te Gilyad ne migkahi, “Emun ke hentew ka egpekewun‑a ne egkuntere te me Amunihanen, iyan egkeyimu ne pangulu te langun ne mahinged te Gilyad.”