12
Si Hipta wey ka matig-Ipraim
1 Ne nanlibulung ka me lukes te kabuhalan ni Ipraim ka egpakiggira. Nanlapas sikandan peendiye te Sapun wey ingkahiyan dan si Hipta, “Mania te inggira ka te me Amunihanen ne ware mignangen kanami eyew egduma keykew? Tenged te inggimu nu, iglagkes ney sikeykew te egsilab te baley nu.”
2 Piru ingkahiyan sikandan ni Hipta, “Due samuk ney wey te me Amunihanen. Migpangananey a kaniyu, piru ware key nikaniyu bulihi.
3 Te natahaan ku ne kene kew egbulig keddi, ware kud sumsumana ka egsahapan ku te miglusud te me Amunihanen wey impepanalu a te Magbebaye ne Manama. Ne kuntee, mania te nangengkayi kew ka egpakig-ehet keddi?”
4 Piru migkahi ka me matig-Ipraim, “Sikaniyu se me matig-Gilyad, kene kew ne mahinged kayi te Ipraim wey te Manasis. Miglapu kew re kayi te kanami.” Purisu, inlibulung ni Hipta ka langun ne mahinged te Gilyad wey inggira ran ka me matig-Ipraim wey natalu ran ka me matig-Ipraim.
5 Ne imbantayan te me matig-Gilyad ka me lapasanan te Hurdan eyew kenad egpakalapas ka me matig-Ipraim. Emun ke due egpakalapas ne matig-Ipraim, eg-insaan sikandin te matig-Gilyad, “Matig-Ipraim ka?” Emun ke egkahi sikandin, “Kene,”
6 egpalalahen dan sikandin te Sibulit. Ne emun ke egkeuney sikandin wey kene egkatuenan te eglalag ka Sibulit, ne egdakepen e sikandin wey eggimatayan diye. Te seeye ne timpu, due hep‑at ne pulu wey daruwa ne libu (42,000) ne me matig-Ipraim ne neyimatayan.
7 Neyimu ne pangulu si Hipta ne matig-Gilyad te Israil te hen‑em ne leg‑un. Te migpatey e si Hipta, diye sikandin ilebeng te Gilyad ne lungsud din.
Ka me pangulu ne ensi Ibsan, si Ilun wey si Abdun
8 Pegkeimpus ni Hipta, iyan neyimu ne pangulu te Israil si Ibsan ne matig-Bitlihim.
9 Due tatelu ne pulu (30) ne anak din ne lukes wey due degma tatelu ne pulu (30) ne anak din ne malitan. Ne impaasawaan din ka langun ne anak din te kene ne karumaan din. Migpangulu si Ibsan te Israil te pitu ne leg‑un.
10 Te migpatey e si Ibsan, diye sikandin ilebeng te Bitlihim.
11 Pegkeimpus ni Ibsan, iyan neyimu ne pangulu te Israil si Ilun ne matig-Sabulun. Migpangulu si Ilun te sapulu (10) ne leg‑un te Israil.
12 Te migpatey e si Ilun, diye sikandin ilebeng te Ahalun ne sakup te Sabulun.
13 Pegkeimpus ni Ilun, iyan neyimu ne pangulu te Israil si Abdun ne anak ni Hilil ne matig-Piratun.
14 Due hep‑at ne pulu (40) ne anak din ne lukes wey due tatelu ne pulu (30) ne apu din ne lukes. Langun dan ne due asnu ne unturanan. Migwalu ne leg‑un si Abdun ka migpangulu te Israil.
15 Te migpatey e sikandin, inlebeng sikandin diye te Piratun ne sakup te Ipraim ne diye te bubungan ne inged te me matig-Amalik.