10
Ka pegsimba te me diyus-diyus wey ka malehet ne pegsimba
1 He keet-etawan te Israil, pammineg kew te iglalag te Magbebaye ne Manama kaniyu.
2 Migkahi sikandin,
“Kene kew ikul te hinimuwan te duma ne me nasud,
wey kene kew kaaldek te me kein-inuwan diye te langit,
minsan pad egkaaldek ka duma ne me nasud.
3 Kene ne malehet ka pegpalintutuu te seeye ne me etew.
Migpeled sikandan te kayu diye te puwalas,
wey impeyimu ran seini ne larawan.
4 Imbulitan dan seini te pelata wey bulawan,
wey inlansangan ay-ayari
eyew kene egkengatahak.
5 Ka sika ne me diyus-diyus, egpekeiling te igginaaldek ne me inetew-etew diye te pinamulaan te timun.
Kene sikandan egpakalalag,
keilangan ne eggenaten sikandan su kene ma egpekeyipanew.
Kene kew kaaldek kandan,
su kene sikandan egpakarereet,
wey ke egpakameupiya naa.”
6 He Magbebaye, warad iya egpekeiling keykew,
Maresen ka wey Amana ne Mabantug ka ngaran nu.
7 Hentew‑a ka kene egtahud keykew, he Hari te langun ne nasud?
Likes ka ne egtahuren.
Kenad iya egpekeiling keykew
ka langun ne matagseb diye te me migharian
minsan ka me Hari dan.
8 Ware me aperu ran wey me umbeg sikandan langun.
Ware karuan te igpanulu te me diyus-diyus dan ne kayu.
9 Migpeyimu sikandan te me diyus-diyus te seeye se me talagkulit
wey imbulitan dan ka me diyus-diyus te pelata ne egpuun te Tarsis,
wey te bulawan ne egpuun te Upas.
Ne ingkumbalaan dan seini te meilem wey malugtem ne manggad
ne inggimu te me manneyi.
10 Piru sikeykew re, he Magbebaye, ka malehet ne Manama,
ka ware egpatayan ne Manama,
wey Hari te ware egtamanan.
Egkelkelen ka intiru ne kalibutan ke egkalangetan ka,
kene egkaantus te me nasud ka langet nu.
11 Magbebaye, impalalahan nu sikandan keddiey te egkaawe kayi te kalibutan ka me diyus-diyus dan ne kene ne iyan miggimu te kalibutan wey te langit.
Ka ulahingen te pegsaye te Manama
12 Ka Magbebaye ka miggimu te kalibutan pinaahi te geem din,
inggimu rin ka kalibutan wey ka langit pinaahi te katagseb din.
13 Ne pinaahi te suhu din, eglehes ka weyig ne diye te dibabew te langit.
Sikandin ka migpalihawang te me gapun puun te subla ne mariyu ne baad te kalibutan.
Impaheteb din ka kilat ke eg-uran
wey impalihawang din ka kalamag puun te limuranan kayi.
14 Me ungel wey ware me hinanawan te me etew ne migsimba te me diyus-diyus.
Egkengeyilawan ka me talagkulit te me diyus-diyus
tenged su kene ma seini ne mallehet wey me ware umul.
15 Ware karuan te me diyus-diyus wey egderali-dian de.
Egkareetan langun sikandan ke egpanlegparan e te Magbebaye.
16 Piru kene ne iling kandan ka Manama ni Hakub.
Sikandin ka miggimu te langun,
lagkes ka me Israilita, ka keet-etawan ne in-alam din.
Iyan din ngaran ka Amana ne Maresen ne Magbebaye.
Ka pegkarakep te keet-etawan te Huda
17 Keet-etawan te Hirusalim, inlingutan kew e te me kuntere niyu. Panines kew e te me kasangkapan niyu
18 su migkahi ka Magbebaye te egpaaween kew e nikandin puun te seini ne inged. Egpaantusen kew nikandin taman te warad e egkasame minsan sabeka kaniyu.
19 Ne migkahi ka keet-etawan te Hirusalim,
“Mekeyid‑u-hid‑u naan de iya seini se egkeula-ula ta!
Kenad e egkeulian ka me pali ta.
Kahiyen te naa ne egkaantus te red seini!
20 Nagguhus e ka me balungbalung ta,
nabbugtus e ka lubid ne impangiket kayi.
Warad e ka me anak ta langun.
Warad e nasame minsan sabeka eyew egbalew-balew egpasasindeg te me balungbalung,
wey warad e nasame minsan sabeka eyew eglelending.”
21 Ne migtabak a, “Kene egmanulik ka me pangulu ta
su ware sikandan migpabulig te Magbebaye.
Sikan naa ka ware sikandan miglampus,
wey natalagtag e ka keet-etawan dan.
22 Pammineg kew! Due panugtulen ne migginguma!
Egkarineg e ka kahulub te me sundalu ne egpeendini puun te igkahibang ne balabahan!
Egdereetan dan e ka siyudad te Huda,
wey egkeyimu e seini ne ugpaan te me mananap ne egpekeiling te asu.”
23 He Magbebaye, nakanengneng a ne kene ne sikanami ka kamuney te umul ney,
wey kene key egpakabuut te kulis ney.
24 Disiplinaa key, he Magbebaye,
piru kene key re ubag amaneyi.
Ne emun ke eglegparan key nikeykew,
kene nu re ubag ipasalengan te egkabelu ka eyew kene key egkaamin egpatey.
25 Ipaneem-neem nu ka langet nu diye te me nasud ne ware mig-ila keykew,
diye te me etew ne ware migsimba keykew.
Impangimatayan dan ka langun ne kabuhalan ni Hakub,
wey impangguhus ka nasud dan.