19
Ka napese ne banga
1 Ne ingkahiyan a te Magbebaye ne Manama, “Bebeli ka te banga diye te talaggimu te kuren ne tane. Ne dumaa nu naa ka duma ne me igbuyag te keet-etawan wey ka me igbuyag te me talagpanubad.
2 Ne hendiye kew te Napu te Bin-Hinum, marani te gumawan te Napese ne Banga. Ne emun ke diye kad, seini ka igpalalag ku keykew:
3 Pammineg kew te eglalahen ku me Hari te Huda wey me keet-etawan te Hirusalim. Sikeddi se Amana ne Maresen ne Magbebaye, ka Manama te Israil, egpeuyanan kud te karereetan ka seini ne inged, wey egkengatanengan ka langun ne etew ne egpakarineg meyitenged kayi.
4 Eggimuwen ku seini su in-engkeran ad ma te keet-etawan ku, wey inlinditan dan e seini ne inged te pegpanubad dan te me diyus-diyus. Me diyus-diyus ne ware dan neileyi minsan te me kaap-apuan dan, wey te me Hari te Huda. Ne in-empet dan ka seini ne inged te langesa te me etew ne ware sale.
5 Ne migmangimu sikandan te me altar ne egtutungan dan te me anak dan ne igmanubad dan ki Baal. Ware kud iya sikandan suhua ne eggimu te iling due, wey warad iya seini migginguma te suman-suman ku.
6 Purisu, bantey kew! Egginguma ka aldew ne kenad egngaranan ka seini ne inged te Tupit wey ke Napu naa te Bin-Hinum. Egngaranan e seini te Napu ne Himatayanan.
7 Ne kayi ku re iya egguhusa te seini ne inged ka langun ne planu te keet-etawan te Huda wey Hirusalim. Egpeyimatayan kud sikandan te me kuntere dan, wey igmakeen ku te me bayaku wey te mahintalunan ne me mananap ka me lawa ran.
8 Igpeula-ula kud te seini ne siyudad ka mangune-kune ne karereetan eyew egkengaaldek wey egkengatanengan ka egmanlihad ne me etew te egkakita ran.
9 Ne egpalingutan ku ka siyudad dan te me kuntere ne egkeupian ne eggimatey kandan, wey egtamtamanan ku sikandan egbaybayari. Ne tenged te gutas, egmake-keeney e ka tagse sabeka kandan, wey minsan ka me anak dan egpangeenen dan e.”
10 Ne migpabulus ka Magbebaye ne migkahi, “Pesaa nu naa ka banga diye te tangkaan te me etew ne migduma keykew.
11 Ne kahii nu sikandan te migkahi a se Amana ne Maresen ne Magbebaye, ‘Egdereetan ku ka seini ne keet-etawan wey ka seini ne siyudad iling te etew ne egpese te banga eyew kenad seini egkeupianan. Ne diye naan de iglebeng te me etew ka me minatey ran te Tupit su warad ma egkalebengan diye te siyudad.
12 Seini ka eggimuwen ku te Hirusalim wey te me mahinged kayi. Eggimuwen ku seini ne iling te Tupit.
13 Migmalindit e iling te Tupit ka langun ne baley diye te Hirusalim lagkes ka me palasyu te me Hari te Huda su migpanutung ma ka keet-etawan te me insinsu diye te me atep dan, para te me diyus-diyus dan ne me bituen, wey mighalad man‑e sikandan te me binu diye te duma pad ne me diyus-diyus.’ ”
14 Nataman, mig-awa ad diye te Tupit, ka inged ne impabayaan te Magbebaye keddiey eyew igwali ka lalag din, wey miggendiya ad e te lama te timplu te Magbebaye. Ne impangguhuran kud ka langun ne etew
15 te inlalag te Amana ne Maresen ne Magbebaye, ka Manama te Israil ne migkahi, “Igpeula-ula ku te seini ne siyudad wey te me lungsud ne nakalingut kayi ka langun ne karereetan ne inlalag ku, su memakehal ma ka me ulu ran wey kene sikandan egmalintutuu keddiey.”