28
Si Hirimiyas wey si Prupita Ananiyas
1 Te seeye ded ne leg‑un, te igkalalimma ne bulan te igkeep‑at ne leg‑un te peghari ni Sidikiyas te Huda, miggendiye te timplu si prupita Ananiyas ne anak ni Asur ne matig-Gibyun. Ne dutu, inlalahan a nikandin diye te tangkaan te me talagpanubad wey te langun ne me etew
2 te migkahi ka Amana ne Maresen ne Magbebaye, ka Manama te Israil, “Egdereetan kud ka geem te Hari te Babilunya.
3 Te kene pad egkataman ka daruwa ne leg‑un, iglibed kud te seini ne inged ka langun ne kasangkapan te timplu ne impanguyan ni Hari Nibukadnisar diye te Babilunya.
4 Igpalibed kud degma kayi ka Hari te Huda ne si Huwakin ne anak ni Huwakim, wey ka langun ne me matig-Huda ne impandakep wey impanguyan diye te Babilunya. Egdereetan kud iya ka geem te Hari te Babilunya. Sikeddiey se Magbebaye ne Manama ka miglalag kayi.”
5 Ne migtabak a ki prupita Ananiyas diye te tangkaan te me talagpanubad wey te me etew ne diye te timplu,
6 “Malehet iya! Meupiya perem ke eggimuwen sika te Magbebaye ne Manama! Egtumanen din perem ka inlalag nu, wey igpalibed din kayi ka me kasangkapan te timplu, wey ka langun ne impandakep wey impanguyan diye te Babilunya.
7 Piru pammineha nu seini se iglalag ku keykew wey te me etew.
8 Puun pad dengan, migpanagne e ka me prupita ne nekewun‑a kanta te eggingumaan te gira, karereetan, wey me dalu ka masulug ne me nasud wey ka maddesen ne migharian.
9 Piru ka prupita ne egpanagne te meupiya ne peg-ugpe, egkeila ne malehet ne insuhu sikandin te Magbebaye ke egkeyitabu ka eglalahen din.”
10 Ne in-awe e ni Ananiyas ka yuggu ne insaluub ku, wey inggepu din e seini.
11 Ne ingkahiyan din ka me etew, “Migkahi ka Magbebaye te eg-ilingen din kayi te eggepu ka yuggu ne insangen ni Nibukadnisar ne Hari te Babilunya diye te langun ne me nasud. Eggimuwen din seini te kene pad egkataman ka daruwa ne leg‑un.” Ne pegkapenga dutu, miggipanew ad e.
12 Te ware de naluhey te inggepu e ni prupita Ananiyas ka yuggu puun te lieg ku, impanengneng ad e man‑e te Magbebaye,
13 “Hendiyei nu si Ananiyas wey kahii nu sikandin te migkahi a se Magbebaye: Inggepu nu ka kayu ne yuggu piru egliwanan ku seini te putew ne yuggu!
14 Egkahi a se Amana ne Maresen ne Magbebaye, ka Manama te Israil: egyugguwan ku te putew ka langun ne nasud wey egpamakey sikandan ki Nibukadnisar ne Hari te Babilunya. Egpamakey sikandan kandin lagkes ka me mahintalunan ne me mananap.”
15 Ne ingkahiyan ku si Ananiyas, “Pammineg ka, Ananiyas! Ware ka suhua te Magbebaye ne Manama! Impepalintutuu nu te ubat ka me etew.
16 Sikan naa ka migkahi ka Magbebaye te eggimatayan ka nikandin te kene pad egkataman ka seini ne leg‑un. Tenged su impanulu nu ka me etew eyew egribildi kandin!”
17 Ne migpatey en iya si Ananiyas te igkapitu ne bulan te seeye ne leg‑un.