4
Ka peg-umew te peg-inniyug te sale
1 Ne migkahi ka Magbebaye ne Manama,
“Me Israilita, ke egkeupian kew ne eglibed kayi te keddi, libed kew e.
Engkeri niyud ka igkalindit ku ne me diyus-diyus niyu,
wey kene kew e pariyu keddi.
2 Emun ke egtumanen niyu re iya ka insaad niyu pinaahi te ngaran ku, ne eg-ugpe kew ne egkasalihan, eleg wey matareng, egkeyimu kew ne panalangin te me nasud, wey egbantuhen a nikandan.”
3 Ne seini ka inlalag te Magbebaye te keet-etawan te Huda wey te Hirusalim: “Daruwa niyu ka makehal ne kamet niyu; kene niyu isawed ka beni niyu diye te me balunserien.
4 Sikaniyu se keet-etawan te Huda wey te Hirusalim, linisi niyu ka me pusung niyu para keddiey te Magbebaye. Su ke kene, egpakasalerep kew e te langet ku ne iling te hapuy ne egkanlabkanlab ne warad iya egpekeebuk. Egkeyitabu seini tenged te mareet ne hinimuwan niyu.”
Ka egginguma ne legpad te Huda
5 Ne migkahi ka Magbebaye, “Kahii niyu ka Huda wey ka Hirusalim: Parahinga niyu ka trumpita due te intiru ne inged. Panguleyi kew ka egkahi, ‘Libulung kew wey hendiye kew te siyudad ne in-alad te matikang wey makepal ne batu.’
6 Ipanulu nu kandan ka dalan peendiye te Hirusalim. Kene nu sikandan palamlamuwa ka eggeles su egpeuyanan kud sikaniyu te karereetan ne egpuun diye te igkahibang ne balabahan.”
7 Ne egpekeiling te liyun ne miglihawang te helesanan din ka egginguma ne talagdereet te me nasud. Egdereetan din ka tane niyu, wey egguhusen din ka me siyudad niyu taman te warad eg-ugpe.
8 Purisu, saluub kew te saku te pegpapitew ne miglungku kew. Pandalawit kew su ware pad naawe ka langet te Magbebaye kayi te kanta.
9 Ne migkahi ka Magbebaye, “Te seeye ne aldew, egkaawaan te kabulut ka me Hari wey ka me upisyal; egliyasen ka me talagpanubad, wey egkatanengan ka me prupita.”
10 Ne migkahi a, “He Magbebaye ne Manama, in-akalan nu iya ka me matig-Hirusalim su insaaran nu ma sikandan ne egmalinawen, kunaleg te andam bes e ka kampilan ne eggimatey kandan.”
11 Ne egginguma ka timpu ne egkahiyan te Magbebaye ka keet-etawan te Hirusalim, “Egpangalamag te meinit puun diye te masalad ne me bubungan te disirtu peendiye te keet-etawan ku. Piru ka seini ne kalamag kene egpakapalayap te trigu ran.
12 Meemen amana ka seini ne kalamag ne egligkat kayi te keddi. Ne kuntee, igpanengneng kud e kandan ka legpad ku.”
13 Tengteng kew! Egpekeiling te salahapun ka kuntere ne eggendini te kanta. Egpekeiling te balisusu ka me karwahi rin, wey memeiyal pad ka me kudde din du te me banug. Mekeyid‑u-hid‑u kid e seini su egkahunaan kid e.
14 Linisi niyu ka pusung niyu me matig-Hirusalim eyew egkaluwas kew. Ken‑u kew naan pad egpeeneng-eneng ka egsuman-suman te mareet?
15 Due me suluhuanen puun te Dan wey te bubungan te Ipraim ne migpanengneng te karereetan niyu.
16 Migkahi sikandan ka egpanengneng diye te me nasud wey te me matig-Hirusalim, “Eggingume e ka me kuntere ne egpuun te mariyu ne inged, wey eglelalis sikandan ne egpakiggira diye te me lungsud te Huda.
17 Eglingutan dan te egkampu ka Hirusalim, iling te me etew ne eglingut te kamet eyew te pegtameng kayi. Neyitabu seini tenged su migsupak ka Hirusalim keddi. Sikeddiey se Magbebaye ne Manama ka miglalag kayi.
18 Neyitabu seini kaniyu tenged te mareet ne batasan niyu wey hinimuwan niyu. Legpad niyu seini. Amana ne masakit seini, wey eg-abbas seini diye te pusung niyu.”
Ka peglungku ni Hirimiyas
19 Kene kud e egkaantus ka masakit ne inggeram ku!
Egpekeiling e te egkelesen ka pusung ku te masakit!
Kene egkaayun ne egpeeneng-eneng e re
su narineg ku ka me trumpita
wey ka me laheng te egmakiggira ne egmanguleyi.
20 Egmekegsinundul re iya ka me karereetan,
wey nareetan e ka intiru ne inged.
Sahuhune ne nagguhus ka me balungbalung ku,
wey naggisi e ka me lending kayi.
21 Ken‑u naan pad egkataman ka egkiteen ku ne me bendila te pegpakiggira,
wey ka egkarineg ku ne dahing te me trumpita?
22 Ne migkahi ka Magbebaye, “Egpamunehen e ka keet-etawan ku!
Warad e sikandan nekeila keddi.
Nekeiling e sikandan te me bate ne kene egpakasabut.
Ware me aperu ran!
Meupiya re sikandan ne egpangimu te mareet,
piru kenad iya egkateu ne eggimu te meupiya.”
Ka karereetan ne nataheinep ni Hirimiyas
23 Ne migtengteng a te kalibutan wey nakita ku seini ne warad iya keupianan, wey warad iya mig-ugpe kayi.
Ne migleng‑ag a diye te langit wey warad iya malayag ne nakita ku.
24 Ne migtengteng a man‑e diye te me bubungan wey me labuntud,
wey nakita ku seini ne egkengaantag,
wey egpamanley-banley.
25 Ne nakita ku ne warad iya me etew,
wey nanlayang e ka langun ne bayaku.
26 Nakita ku ne ka tane ne egkeuyahan te pinamula, neyimu e ne disirtu,
wey nagguhus e ka me siyudad
su ingguhus e seini te Magbebaye tenged te mangune-kune ne langet din.
27 Su migkahi ka Magbebaye te egdereetan din ka intiru ne inged, piru kene din de eg-amanaan te egdereet.
28 Ne tenged kayi, eglungku ka kalibutan,
wey egmarusilem ka langit.
Sika ka inlalag te Magbebaye
wey kenad e egkabalbalawan ka planu rin.
Nasabeke e ka suman-suman din
wey eggimuwen din iya sika.
29 Te pegkarineg te me etew te kahulub te migmangudde
wey te seeye se nanguyan te me piet,
migpamallahuy e sikandan.
Migpallahuy ka duma diye te puwalas,
wey migpamaneyik ka duma diye te pahang.
Eg-engkeran e ka me siyudad
wey warad e egpangugpe diye.
30 Ne sikeykew, he Hirusalim, egguhusen kad e!
Mania te migkukumbale ka te malalab?
Mania te migsaluub ka te dayan-dayan ne bulawan, wey mania te in-ay-ayaran nu ka mata nu?
Ware karuan te peggimmimasad nu
su ingkeepes kad e te seeye se inggeyinawaan nu
wey eggimatayan kad e nikandan.
31 Nakarineg a te egsinehew ne iling te malitan ne eglesutan,
iling te eglesutan te panganey rin.
Sika ka kuleyian te Hirusalim ne kenad e egpakageheyinawa.
Migderepa sikandin ne migkahi,
“Mekeyid‑u-hid‑u ad e!
Eggingume e sikandan ka eggimatey keddi!”