43
Ka pegduma ki Hirimiyas diye te Ihiptu
1 Te nekeimpus ad ka miglalag te langun ne etew te impalalag keddiey te Magbebaye ne Manama diye te kandan,
2 ingkahiyan ad ni Asariyas ne anak ni Husayas, ni Diyuhanan ne anak ni Kariyas, wey te duma pad ne me etew ne hambuhen, “Mig-uubat ka! Ware ka suhua te Magbebaye ne Manama ney eyew eglalahan key ne kene eggendiye te Ihiptu eyew diyad eg-ugpe.
3 Intipu ka ni Baruk ne anak ni Niryas eyew igbehey key nikeykew diye te me matig-Babilunya eyew eggimatayan wey ke egprisuwen naa diye te Babilunya.”
4 Purisu ware migtuman si Diyuhanan, ka langun ne upisyal te me sundalu, wey ka langun ne etew te insuhu te Magbebaye ne Manama kandan ne egpeugpeen diye te Huda.
5 Nataman indume e ni Diyuhanan wey te langun ne upisyal te me sundalu diye te Ihiptu ka nenasame ne me etew ne nanlibed diye te Huda puun te me inged ne indeldelan kandan.
6 Duma kayi ka me lukes, me malitan, me bate, wey me malitan ne anak te Hari. Induma ran ka langun ne inggaat ni Nibusaradan ne pangulu te me talagtameng diye ki Gidaliyas ne anak ni Ahikam wey apu ni Sapan. Ne induma a degma nikandan wey si Baruk ne anak ni Niryas.
7 Ware dan tumana ka insuhu te Magbebaye ne Manama, wey nangendiyad sikandan te Ihiptu. Nataman nekeume e sikandan diye te siyudad te Tapanis.
8 Ne impanengneng a te Magbebaye ne Manama diye te Tapanis,
9 “Kuwa ka te derakel ne batu, wey ilebeng nu seini diye te gumawan te palasyu te Paraun ne Hari te Ihiptu kayi te Tapanis. Ne papitawa nu ka keet-etawan te Huda te eggimuwen nu seini.
10 Ne kahii nu sikandan te migkahi a se Amana ne Maresen ne Magbebaye, ka Manama te Israil te igpeuyan ku ka suluhuanen ku ne si Nibukadnisar ne Hari te Babilunya, wey igtahu ku ka trunu rin kayi te lenged te seini se me batu ne impalebeng ku keykew. Ne kayi rin degma igpasasindeg ka balungbalung din.
11 Ne eglusuran ni Nibukadnisar ka Ihiptu wey masulug ka etew ne egpatey. Ne egpatey te dalu ka eleg ne egpatey te dalu, egprisuwen ka eleg ne egprisuwen, wey egpatey te gira ka eleg ne egpatey te gira.
12 Ne egpanilaban din ka me timplu te me diyus-diyus diye te Ihiptu. Egpanilaban din ka me diyus-diyus wey ke eg-uyanen din naa isip me pinirisu. Ne eggiseen din ka Ihiptu iling te peggise te talagtameng te karniru te kumbale din eyew egpatey ka me tuma. Ne emun ke egkeyimu rin e seini, eg-awe e sikandin diye ne kene egkamenu.
13 Ne egpanlupeten din ka me matulus ne sungkaleg te Hiliyupulis diye te Ihiptu, wey egsilaban din ka me timplu te me diyus-diyus.”