47
Ka lalag te Manama meyitenged te me matig-Pilistiya
1 Te ware pad lusuri te Hari te Ihiptu ka Gasa, migpakiglalag keddiey ka Magbebaye ne Manama meyitenged te me matig-Pilistiya.
2 Migkahi sikandin,
“Pitew kew! Eglibulung e ka me kuntere puun te igkahibang ne balabahan,
wey egpekeiling e sikandan te baggiyu ne egduu.
Egkalapey ran e ka inged wey ka langun ne mig-ugpe kayi;
me siyudad, wey ka me mahinged kayi.
Ne egmanguleyi ka me etew ne egpabulig,
wey egmataman-taman egmandalawit ka langun kayi te ampew te tane.
3 Emun ke egkarineg dan e ka egdabek-dabek ne me kudde,
wey ka dahing te me liggid te me karwahi,
kenad egkasahipe te me amey ka me anak dan,
wey kenad e egmekeeleg ka me belad dan tenged te liyas.
4 Miggingume e ka timpu ne egdereetan e ka me matig-Pilistiya,
lagkes ka seeye se migbulig kandan puun te Tiru wey Sidun.
Sikeddiey ka Magbebaye ne Manama, ka egdereet te me matig-Pilistiya,
ne iyan ka langun ne egpuun diye te isla te Krita.
5 Ne migmatabulug e ka keet-etawan te Gasa tenged te peglungku dan,
wey migpeeneng-eneng e ka me matig-Askilun.
Ken‑u pad egkataman ka peglungku te me matig-Pilistiya?
6 Ne egpanguleyi kew ka egkahi, ‘Kampilan te Magbebaye ne Manama,
ken‑u ke pad eg-engked ka eglegpad kanami?
Libed kad diye te lipi nu,
wey diye ke naan de iya.’
7 Piru egmenuwen naa te kampilan te eggimmeley
te insuhu ku ma seini?
Insuhu ku seini ne eglusud te Askilun
wey te me etew ne nangugpe diye te ilis te dahat.”