49
Ka lalag te Manama meyitenged te me matig-Amun
1 Ne seini ka inlalag te Magbebaye ne Manama meyitenged te me matig-Amun: “Sikaniyu se egmanimba te diyus-diyus ne si Muluk, mania te in-ahew niyud ka inged ni Gad? Ware bes e kabuhalan ni Israil ne egsinundul kandin eg-ugpe kayi ne inged?
2 Egginguma ka timpu ne egpalusuran ku te me kuntere ka Raba, ka iney ne siyudad niyu. Egguhusen dan seini wey egsilaban ka nakalingut ne me bariyu. Ne egkaawi e te me matig-Israil ka inged dan puun te me etew ne mig-ahew kandan. Sikeddiey se Magbebaye ne Manama ka miglalag kayi.
3 Panaman-taman kew paninehew me matig-Hisbun su nareetan e ka Ay! Ne lungku kew me malitan te Raba wey saluub kew te saku. Pamallahuy kew iling te egbunehen su egdakepen e ka diyus-diyus niyu ne si Muluk duma te me talagpanubad din wey me upisyal rin.
4 Ne sikaniyu se masinupaken ne me etew, mania te egpaambug kew ne malambeg ka tane niyu? Migsalig kew te karatuan niyu wey migkahi kew te ware egpakalusud kaniyu.
5 Egpeuyan a te me kuntere puun te me inged ne nakalingut kaniyu eyew egginalat kaniyu. Egdeldelen kew nikandan puun te inged niyu, wey warad etew ne eglibulung man‑e kaniyu.
6 Piru egkataman, igpalibed ku red ka meupiya ne peg-ugpe te me matig-Amun. Sikeddiey se Magbebaye ne Manama ka miglalag kayi.”
Ka lalag te Manama meyitenged te me matig-Idum
7 Ne seini ka inlalag te Magbebaye ne Manama meyitenged te me matig-Idum: “Hendeid naa ka me matagseb ne etew te Timan? Warad nasame kaniyu ne meupiya ne egtambag?
8 Ne sikaniyu se me matig-Didan, libed kew e wey pangeles kew e! Egdereetan kud ka kabuhalan ni Isaw su miggingume e ka timpu ne eglegparan kud sikandan.
9 Emun ke egpamupu ka me etew te behas te paras, duen iya egsameen dan ne lalawen diye te paras. Ne emun ke egginguma ka me takawen te marusilem, iyan dan de egtakawen ka igkeupii ran.
10 Piru eg-aminen ku mule te egkuwa ka langun ne karatuan te kabuhalan ni Isaw. Eg-awaan ku te dingding ka me helesanan dan eyew warad egkeelesan dan. Egkengammatey iya ka me anak dan, me suled wey me sumbaley ran. Ware iya egkasame kandan.
11 Piru ihaat niyu keddiey ka me ilu due te kaniyu su egtangguwen ku sikandan. Ne egpakasalig degma keddiey ka me balu niyu.”
12 Ne migpabulus man‑e ka Magbebaye ne migkahi, “Emun ke egkalegparan seeye se kene ne eleg ne egkalegparan, iyan kew naan pa iya? Eglegparan ku iya sikaniyu!
13 Su migsaad ad ne egkareetan iya ka Busra. Egkeyimu seini ne makaliyas-liyas ne egpitawen, egderali-dian seini, wey igdirilus ka ngaran. Ne egkareetan te ware egtamanan ka me lungsud ne nakalingut kayi. Sikeddiey se Magbebaye ne Manama ka miglalag kayi.”
14 Ne migkahi a, “Idum, nakarawat a te lalag puun te Magbebaye ne Manama. Migsuhu e sikandin te panalihan eyew egpakahiyan ka me inged, ‘Libulunga niyu ka me sundalu niyu, pangandam kew, wey lusuri niyud ka Idum.’
15 Ne eg-aween e te Magbebaye ka geem te inged niyu, wey warad egtahud kayi.
16 Naakalan kew te hambug niyu. Kahiyen niyu ne egkaaldek kaniyu ka langun. Migpeggasal kew ne diye kew mig-ugpe te malig‑en ne kundawasan ne diye te puntul te bubungan. Piru minsan iling katikang te insesalahan te banug ka ugpaan niyu, eggunnunen kew red iya te Magbebaye.”
17 Ne migkahi pad man‑e ka Magbebaye, “Subla ne makaliyas-liyas ka karereetan ne igpeula-ula ku te Idum. Egkatanengan ka langun ne egmanlihad wey kene egpakapalintutuu te neyitabu te seini ne inged.
18 Ka egkeyitabu te Idum, egpekeiling te neyitabu te Suduma wey Gumura, wey te nakalingut ne me lungsud, wey warad eg-ugpe diye. Sikeddiey se Magbebaye ne Manama ka miglalag kayi.
19 Ne egtigkawen ku te eglusud ka Idum, iling te liyun ne egpuun te puwalas ne marani te Weyig ne Hurdan ne egtalukun te me karniru diye te panabtaban. Ne eg-alawen ku sikandan wey egpepanguluwan ku te etew ne eg-alamen ku. Hentew bu re iya ka egpekeiling keddiey, wey ka egpaalag-alag eg-atu keddiey? Hentew bu re iya ka pangulu ne egpakigkuntere keddiey?
20 Purisu pammineha niyu seini se implanu ku ne eggimuwen te Idum wey te me mahinged te Timan. Egkengarakep sikandan wey ka me anak dan, wey egkengareetan iya ka tane dan tenged te hinimuwan dan.
21 Egkaantag ka intiru ne kalibutan te pegdahegsal te me matig-Idum ne egkareetan, wey egkarineg ka kuleyian dan taman diye te Malalab ne Dahat ne mariyu e amana.
22 Pitew kew! Egpekeiling e ka kuntere te Busra te banug ne egdawi kandin. Te sika ne timpu, egkengaaldek ka me sundalu te Idum iling te pegkaaldek te malitan ne eg-anak.”
Ka lalag te Manama meyitenged te me matig-Damasku
23 Ne seini ka inlalag te Magbebaye meyitenged te me matig-Damasku: “Egkengaaldek ka me matig-Hamat, wey ka me matig-Arpad su nakarineg sikandan te mareet ne guhuren. Egkengallaggew sikandan wey kene egpekegteil iling te dahat ne egpamunlud.
24 Ne dutu, egkengaaldek e ka me matig-Damasku wey egpamallahuy e sikandan. Egkaaldek sikandan wey egkallaggew iling te malitan ne eg-anak.
25 Ne egkahi sikandan, ‘Nareetan e ka siyudad ne nakapahale kanta dengan.’
26 Purisu, ka me kanakan din lagkes ka langun ne me sundalu, egpatey diye te deralanen te sika ne aldew.
27 Egsilaban ku ka matikang wey makepal ne batu ne alad te Damasku, wey ka me palasyu ni Hari Binhadad. Sikeddiey se Magbebaye ne Manama ka miglalag kayi.”
Ka peglegpad te Manama te tribu te Kidar wey te migharian ni Hasur
28 Ne seini ka inlalag te Magbebaye meyitenged te tribu te Kidar wey te migharian ni Hasur ne inlusuran ni Nibukadnisar ne Hari te Babilunya: “Pangandam kew wey lusuri niyu ka Kidar! Dereeti niyud ka keet-etawan dapit te igsile.
29 Pangahawa niyud ka me balungbalung, me ayam, me lending, wey langun ne kasangkapan dan. Pangahawa niyu man‑e ka me kamil ran, wey egpanguleyi sikandan ne egkahi, ‘Inlingutan kid e te makaliyas-liyas ne me kuntere ta!’ ”
30 Ne migkahi pad man‑e ka Magbebaye, “Keet-etawan te Hasur, pamallahuy kew e wey pangeles kew diye te sulung su migplanu si Nibukadnisar te mareet kaniyu.
31 Migkahi ka Manama, ‘Hendiye kew e! Lusuri niyud ka me etew ne migpeelay-helay wey ware igkabantali. Ware lekeb te siyudad dan wey ware pagul, wey ware egpakapangabang kandan.’
32 “Sikaniyud e ka egpakakamuney te me kamil ran wey duma ne me ayam dan. Ka langun ne migmatabulug isip pegtahud te me diyus-diyus dan, ig-empet ku diye te nalein-lein ne me inged wey igpasalerep ku sikandan te karereetan ne egpuun te minsan hendei ne inged.
33 Egkeyimu ka Hasur ne mammara ne inged ne kene egkeugpaan te ware egtamanan, warad etew ne eg-ugpe diye su iyan naan de eg-ugpe diye ka me mananap ne egpekeiling te asu. Sikeddiey se Magbebaye ne Manama ka miglalag kayi.”
Ka lalag te Manama meyitenged te me matig-Ilam
34 Ne seini ka inlalag te Magbebaye keddiey meyitenged te me matig-Ilam te sikan pad migbunsud mighari si Sidikiyas diye te Huda.
35 Migkahi sikandin: “Egpangimatayan ku ka me talagpane diye te Ilam, ka egpakapepanalu kandan te langun ne pegpakiggira ran.
36 Egpalusuran ku sikandan te me kuntere dan ne egpuun te hep‑at ne pikungan te kalibutan, wey egtalagtahen ku ka langun ne mahinged diye te minsan hendei. Ne egpandakepen sikandan wey egpanguyanen diye te nalein-lein ne inged te kalibutan.
37 Ne eggimuwen ku ne egkaalatan ka me matig-Ilam te me kuntere dan ne egkeupian ne eggimatey kandan. Tenged te mangune-kune ne langet ku, eglegparan ku sikandan, wey egpalusuran ku sikandan te me kuntere dan taman te egkaamin e sikandan egpatey.
38 Egdereetan ku ka me Hari wey ka me pangulu ran, wey igpasasindeg ku ka trunu ku diye te Ilam.
39 Piru egkataman, iglibed ku red man‑e ka meupiya ne peg-ugpe te Ilam. Sikeddiey se Magbebaye ne Manama ka miglalag kayi.”