51
Ka timul pad ne lalag te Manama meyitenged te Babilunya
1 Ne seini pad man‑e ka inlalag te Magbebaye ne Manama meyitenged te Babilunya, “Egbaggeten ku ka talagdereet ne eglusud te Babilunya wey te me mahinged kayi.
2 Egsuhu a te me lapu ne eglusud te Babilunya. Egdereetan dan ka Babilunya iling te kalamag ne egpakapalayap te ukaba. Ne emun ke eggingume e ka sika ne aldew, eglingutan dan te eglusud ka Babilunya wey eg-engkeran dan e seini ne warad karuan.
3 Kene dan e egbehayan te timpu ka me talagpane diye te Babilunya ne eggamit te me piet dan wey te putew ne akeb te me kumeng dan. Ware iya egsameen dan ne me kanakan. Eg-aminen dan iya te eggimatey ka me sundalu te Babilunya.
4 Ne egmakabahed de ka me minatey wey egkatalagtag ka me tahapali diye te me deralanen.
5 Makasesale ka langun diye te Israil wey Huda. Piru sikeddiey se Amana ne Maresen ne Magbebaye ne Manama ran, ware mig-engked kandan.
6 Pangawe kew e due te Babilunya! Luwasa niyu ka pegkeetew niyu! Kene niyu balahara ne egpatey kew tenged te sale te me matig-Babilunya. Seinid e ka timpu ne egsulian kud sikandan tenged te inggimu ran.
7 Nekeiling ka Babilunya te bulawan ne ubab ne inggen-genan ku. Impewubuhan din ka me nasud te intiru ne kalibutan sikan naa ka egbusawen e sikandan.
8 Ne sahuhune ne nareetan ka Babilunya! Lungku kew para kandin! Bawii niyu ka me pali din kema ke egkeulian ded sikandin.
9 Ne egkahi ka me lapu ne nangugpe diye, ‘Emun ke duen de iya perem egkeyimu ney, imbawian ney e ka Babilunya, piru kenad iya sikandin egkabawian. Kuwa kid e, egmanguli kid diye te me inged ta. Impasalerep e te Manama ka Babilunya te makaliyas-liyas ne peglegpad tenged te mangune-kune ne langet din.’ ”
10 Ne migkahi ka keet-etawan te Israil wey Huda, “Inlapihan ki te Magbebaye ne Manama ta. Purisu egmangendiye kid te Hirusalim. Igpangguhud ta diye ka inggimu te Magbebaye ta.”
11 Ne migkahi pad man‑e ka Magbebaye, “Egkeupian a ne egdereetan ku ka me matig-Babilunya tenged te pegguhus dan te timplu ku. Purisu sikaniyu se me Hari te Midis, panliddusi niyud ka me tunud niyu wey sabilbila niyud ka me kalasag niyu!
12 Iparibabew niyud ka bendila ne palinneu wey tempaha niyud ka matikang wey makepal ne batu ne alad te Babilunya. Pakaddesena niyu ka me sundalu ne eglingut te siyudad wey pahepasi niyu ka me etew ne egpallahuy.
“Eggimuwen kud ka inlalag ku ne eggimuwen ku te me matig-Babilunya.
13 He Babilunya, masulug ka me weyig nu wey dakel ka karatuan nu. Piru miggingume e ka katamanan nu, ka timpu te karereetan nu.
14 Migpahunlibet a te umul ku ne eg-empeten ku ka inged nu te me kuntere ne me sundalu ne iling kasulug te talangas, wey egmanguleyi sikandan te pegpanalu ran.”
Ka ulahingen te pegsaye te Manama
15 Ka Magbebaye ka miggimu te kalibutan pinaahi te geem din,
inggimu rin ka kalibutan wey ka langit pinaahi te katagseb din.
16 Ne pinaahi te suhu din, miglehes ka weyig ne diye te dibabew te langit.
Sikandin ka migpalihawang te me gapun puun te subla ne mariyu ne baad te kalibutan.
Impaheteb din ka kilat ke eg-uran
wey impalihawang din ka kalamag puun te limuranan kayi.
17 Me ungel wey ware me hinanawan te me etew ne migsimba te me diyus-diyus.
Egkengeyilawan ka me talagkulit te me diyus-diyus
tenged su kene ma seini ne mallehet wey me ware umul.
18 Ware karuan te me diyus-diyus wey egderali-dian de.
Egkareetan langun sikandan ke egpanlegparan e te Magbebaye.
19 Piru kene ne iling kandan ka Manama ni Hakub.
Sikandin ka miggimu te langun,
lagkes ka me Israilita, ka keet-etawan ne in-alam din.
Iyan din ngaran ka Amana ne Maresen ne Magbebaye.
Ka buntuk te Manama
20 Migkahi ka Magbebaye,
“Babilunya, sikeykew ka buntuk ku, wey ka panganiban ku te pegpakiggira.
Eggamiten ku sikeykew ne egdereet te me nasud wey te me migharian,
21 te me kudde wey te egmangudde,
te me karwahi wey te egmanguntud kayi,
22 lagkes ka me lukes wey me malitan,
me buyag wey me bate-bate,
me kanakan wey me mengebay.
23 Ne pinaahi keykew, egpangimatayan ku ka me talagtameng te karniru wey ka me karniru ran,
ka me talagbasuk wey ka me baka ran,
ka me pangulu wey ka me upisyal ran.”
Ka peglegpad te Babilunya
24 Ne migkahi ka Magbebaye, “Keet-etawan ku, igpakita ku kaniyu ne egsulian ku ka Babilunya wey ka me mahinged diye tenged te langun ne maddeet ne inggimu ran te Hirusalim.
25 He Babilunya, kuntere ku sikeykew. Egpekeiling kad te bubungan ne egdereet! Indereetan nu ka intiru ne kalibutan. Eggamiten ku ka geem ku keykew. Ne egtempahen ku sikeykew wey egkeyimu kad e ne alinepung.
26 Ne warad e batu due te keykew ne egkahamit te pegbebaley. Egkeyimu kad ne mammara ne inged ne ware eg-ugpe te ware egtamanan. Sikeddiey se Magbebaye ne Manama ka miglalag kayi.
27 “Iparibabew niyu ka bendila ne palinneu te peglusud! Ne parahinga niyu ka trumpita eyew egpakarineg ka me nasud! Paandama niyud sikandan ka eglusud te Babilunya. Ne palusura niyud ka me sundalu te Ararat, Minni, wey Askinas. Alam kew te upisyal ne egpangulu te eglusud, wey uyan kew te me kudde ne iling kasulug te me talangas.
28 Ne paandama niyud te eglusud te Babilunya ka me Hari te Midis duma te me pangulu ran, me upisyal, wey te langun ne sundalu te inged ne sakup dan.
29 Ne egpekeiling e ka Babilunya te etew ne egkelkelen wey egbiid-biid te masakit, tenged su egtumanen kud e ka implanu ku ne eggimuwen te Babilunya. Eggimuwen kud seini ne mammara ne inged ne ware eg-ugpe te ware egtamanan.
30 Mig-engked e ne egpakiggira ka me sundalu te Babilunya, wey diye naan de sikandan nanguugpe te me matikang wey malig‑en ne baley ran. Warad keseg dan wey nekeiling e sikandan te me malitan ne mahuye. Nagguhus e ka me gumawan te siyudad dan wey nenasilaban e ka me baley ran.
31 Ne egmemekegsinundul re ka egginguma ne egmangguhud te Hari te Babilunya te naahew e ka intiru ne siyudad din.
32 Naahew e te me kuntere ka lapasanan diye te me weyig wey insilaban e ka me malig‑en ne me baley ne matikang. Ne egkahewhew e ka me sundalu te Babilunya.
33 Te kene egkaluhey, eg-aminen e sikandan egpangimatayi te me kuntere dan, wey egdi-diekan sikandan iling te trigu diye te diekanan. Sikeddiey ka Magbebaye ne Manama te Israil ka miglalag kayi.”
34 “Inggimatayan ni Hari Nibukadnisar ka Hirusalim wey in-abeleng din.
In-awe din ka tahu te sika ne siyudad iling te banga ne ware tahu,
wey nekeiling e sikandin te bubuyahen ne mananap ne mig-abeleng te siyudad.
Ingkuwa rin ka igkeupii rin
wey indegpak din ka duma.
35 Pakahiya niyu ka keet-etawan te Hirusalim,
‘Egkeyitabu perem degma te me matig-Babilunya ka inggimu ran kanami!’
Pakahiya niyu ka keet-etawan te Siyun,
‘Eleg de iya degma ne egsulian ka me matig-Babilunya
tenged te pegbayad-bayad dan kanami!’ ”
Ka pegpangabang te Manama te Israil
36 Purisu migkahi ka Magbebaye diye te keet-etawan te Hirusalim, “Egpangabangan ku sikaniyu wey egsuli a para kaniyu. Egpeetiyan ku ka dahat wey ka me sebseb te Babilunya.
37 Egguhusen kud ka Babilunya, wey egkeyimu e seini ne ugpaanan te me mananap ne egpekeiling te asu. Makaliyas-liyas e seini ne egpitawen wey egkeyimu e ne ware mahinged.
38 Ne egmaninehew ka langun ne me matig-Babilunya ne egpekeiling e te egginihel ne liyun.
39 Ne tenged su egmanggutasan ma sikandan, eg-andam a te sahakeen para kandan. Egpewubuhan ku sikandan, egpahalhaleen, wey egpalipliperengen ku sikandan ne kenad egmekeyimata. Sikeddiey se Magbebaye ne Manama ka miglalag kayi.
40 Ne egpanguyanen ku sikandan diye te gilanganan iling te me karniru wey me kambing ne egpanggilangen.”
Ka neyitabu te Babilunya
41 Ne migkahi ka Magbebaye, “Nareetan e ka Babilunya, ka siyudad ne indayan te intiru ne kalibutan. Egkengaaldek e ka me nasud te neyitabu kandin.
42 Nalapey e te dahat ka Babilunya, wey nabunbunan e sikandin te derakel ne me bunlud.
43 Makaliyas-liyas ne egtengtengan ka me lungsud din, wey egpekeiling e sikandin te disirtu ne ware eg-ugpe wey ke egbaye naa.
44 Ne eglegparan kud si Bil, ka diyus-diyus te Babilunya, wey igpaluwe ku kandin ka tinakew rin ne me karatuan. Ne warad nasud ne egsimba kandin.
“Egkengaggebe e ka matikang wey makepal ne batu ne alad te Babilunya.
45 Pangawe kew e due te Babilunya, he keet-etawan te Israil! Luwasa niyu ka pegkeetew niyu te kene ku pad igpeula-ula kandan ka egmangebel-ebel ne langet ku.
46 Piru kene kew kaaldek wey ke kasuhey naa ke egginguma due te inged niyu ka guhuren meyitenged te gubut. Su egginguma iya ka guhuren meyitenged te gubut wey te egpahiggireey ne me Hari tagse leg‑un.
47 Egginguma iya ka timpu ne eglegparan ku ka me diyus-diyus te me matig-Babilunya. Ne egkeyilawan ka intiru ne inged wey egpatey ka langun ne me matig-Babilunya.
48 Ne egmanguleyi te pegkahale ka langun ne kayi te kalibutan wey ka diye te aw-awangan ke egdereetan e ka Babilunya te me etew ne egpuun te igkahibang ne balabahan. Sikeddiey se Magbebaye ne Manama ka miglalag kayi.
49 Keilangan iya ne eglegparan ka Babilunya tenged te pegpangimatey rin te me matig-Israil wey te duma pad ne me etew kayi te kalibutan.”
Ka lalag te Manama te me Israilita ne diye te Babilunya
50 Ne ingkahiyan te Magbebaye ka keet-etawan din, “Sikaniyu se ware nammatey, pangawe kew e te Babilunya! Kene kew lamu-lamu, hipanew kew e! Ne minsan ke mariyu kew te inged niyu, sumsumana niyu ka Hirusalim wey sikeddiey se Magbebaye ne Manama niyu.
51 Migkahi kew, ‘Neyilew key e. Indali-dian key wey impeyilawan tenged su insubalan e te me lapu ka Amana ne Matulus ne Sinabeng diye te timplu.’
52 Piru egginguma iya ka timpu ne eglegparan ku ka me diyus-diyus te Babilunya, wey egmakareg-uy ka me tahapali te intiru ne inged tenged te masakit.
53 Ne minsan pad egpamaneyik ka Babilunya diye te langit wey eggimu te malig‑en ne me baley ne me matikang, egpeuyan e red iya man‑e te me etew ne egdereet kandin. Sikeddiey se Magbebaye ne Manama ka miglalag kayi.”
Ka duma pad ne karereetan ne egkeulaula te Babilunya
54 Ne migkahi ka Magbebaye,
“Pammineha niyu ka me matig-Babilunya ne egmaninehew ka egpabulig
tenged te karereetan.
55 Egdereetan kud ka Babilunya
wey egpapeen-enengen kud seini.
Ne egpekeiling e te eglehes ne bunlud ka me sundalu ne eglusud,
ne egpanguleyi.
56 Eglusud sikandan ka egdereet te Babilunya;
egpandakepen ka me sundalu rin,
wey egpanggepuen ka me piet dan.
Sikeddiey se Magbebaye ne Manama ka miglalag kayi.
Eglegparan ku iya ka Babilunya te legpad ne eleg kandin.
57 Egpewubuhan ku ka me upisyal rin,
ka me matagseb ne etew, me pangulu, wey ka me sundalu.
Ne egmanlipereng sikandan wey kenad e egmekeyimata.
Sikeddiey ka Hari ka miglalag kayi;
sikeddiey ka Amana ne Maresen ne Magbebaye ne Manama.
58 Ne egmanggebeen ka me matikang wey makepal ne batu ne alad te Babilunya,
wey egpanilaban ka matikang ne me lekeb.
Egkeyimu e ne ware karuan te inggimu te me etew,
tenged su egkengasilaban de seini.
Sikeddiey ka Amana ne Maresen ne Magbebaye ne Manama ka miglalag kayi.”
Ka pegpeuyan ni Hirimiyas diye te Babilunya te eglulunen ne baseen
59 Ne seini ka insuhu ku ki Sirayas ne anak ni Niryas wey apu ni Masiyas te miggendiye sikandin te Babilunya duma ki Hari Sidikiyas te igkeep‑at ne leg‑un te peghari din. Upisyal si Sirayas te Hari.
60 Insulat ku diye te eglulunen ne sulatanan ka meyitenged te langun ne karereetan ne egkeyitabu te Babilunya, ka langun-langun de iya meyitenged te Babilunya.
61 Ne ingkahiyan ku si Sirayas, “Emun ke egpekeuma kad diye te Babilunya, basaa nu te meemen diye te keet-etawan ka langun ne nakasulat te seini ne baseen.
62 Ne egkataman, ampu ka ne egkahi, ‘He Magbebaye ne Manama, migkahi ka ne egdereetan nu seini ne inged eyew warad me mananap wey ke me etew naa ne eg-ugpe kayi. Ne egpekeiling e seini te disirtu su kene man e egkeugpaan te etew te ware egtamanan.’
63 Ne emun ke egkeimpusan nud seini te egbasa, ibelebed nu naa seini te batu wey iregpak nud diye te Weyig ne Iyupratis
64 wey kahi ka, ‘Seini ka egkeyitabu te Babilunya. Egtanled seini wey kenad egpakalepew tenged te karereetan ne igpeula-ula kandin te Magbebaye ne Manama.’ ”
Ne kayi re taman ka guhuren ni Hirimiyas.