21
Ka inged ne naangken te me kabuhalan ni Libi
1-2 Ne nangendiye ka me pangulu te kabuhalan ni Libi diye ki Ilyasar ne talagpanubad, diye ki Huswi ne anak ni Nun, wey diye te me pangulu te tagse tribu te Israil diye te Silu te inged ne Kanaan. Migkahi sikandan, “Migsuhu ka Magbebaye ne Manama ki Muwisis ne egpabehayan key te me siyudad ne egkeugpaan ney, wey te panabtaban para te me ayam ney.”
3 Purisu, intuman te me kabuhalan ni Israil ka suhu te Magbebaye ne Manama ne egpabehayan te me siyudad wey te me panabtaban puun te inged ne karatuan ne inggaat kandan ka me kabuhalan ni Libi.
4 Ne iyan nekewun‑a nakarawat te me siyudad ka me pamilya te kabuhalan ni Kuhat. Duma te kabuhalan ni Kuhat, ka me kabuhalan ni Aarun ne nabehayan te sapulu wey tatelu (13) ne siyudad puun te me kabuhalan ni Huda, Simyun, wey Binhamin.
5 Ne imbehayan ka duma ne me kabuhalan ni Kuhat te sapulu ne siyudad puun te me kabuhalan ni Ipraim, Dan, wey katenge te me kabuhalan ni Manasis.
6 Ne imbehayan ka me kabuhalan ni Girsun te sapulu wey tatelu (13) ne siyudad puun te me kabuhalan ni Isakar, ni Asir, Naptali, wey katenge te me kabuhalan ni Manasis ne diye te Basan.
7 Ne imbehayan degma ka me kabuhalan ni Mirari te sapulu wey daruwa (12) ne me siyudad puun te me kabuhalan ni Rubin, Gad, wey ni Sabulun.
8 Ne imbehey te me kabuhalan ni Israil ka me siyudad wey me panabtaban diye te me kabuhalan ni Libi pinaahi te pegpintut-pintut sumale te insuhu te Magbebaye ne Manama ki Muwisis.
9-10 Seini ka me ngaran te me siyudad puun te me kabuhalan ni Huda, wey ni Simyun ne imbehey diye te me kabuhalan ni Aarun. Me kabuhalan sikandan ni Kuhat ne egpuun te me kabuhalan ni Libi. Sikandan ka nekewun‑a nakarawat te me siyudad.
11 Imbehey kandan ka Kiryat-Arba (si Arba ka amey ni Anak) ne iyan ka Hibrun ne diye te bubungan te Huda wey ka me panabtaban kayi.
12 Piru imbehey ran ka me kamet wey me bariyu ne nakalingut te seini ne siyudad diye ki Kalib ne anak ni Hipuni isip baad din.
13 Sikan naa ka imbehey ran diye te me kabuhalan ni Aarun ne talagpanubad ka Hibrun ne sabeka te me siyudad ne aputanan te me etew ne egpekeyimatey ne ware tuyua. Imbehey ran pad man‑e ka Libna wey ka me panabtaban kayi,
14 Hatir wey ka me panabtaban kayi, Istimuwa wey ka me panabtaban kayi,
15 Hulun wey ka me panabtaban kayi, Dibir wey ka me panabtaban kayi,
16 Ayin wey ka me panabtaban kayi, Huta wey ka panabtaban kayi, Bit-Simis wey ka panabtaban kayi. Migginguma te siyam ka langun ne siyudad ne migpuun te me kabuhalan ni Simyun wey ni Huda.
17 Ne imbehayan pad man‑e sikandan te hep‑at ne siyudad puun te inged te me kabuhalan ni Binhamin. Ne iyan seini: ka Gibyun wey ka me panabtaban kayi, Giba wey ka me panabtaban kayi,
18 Anatut wey ka me panabtaban kayi, wey Almun wey ka me panabtaban kayi.
19 Migginguma ka langun ne narawat te me talagpanubad ne me kabuhalan ni Aarun te sapulu wey tatelu (13) ne siyudad wey ka me panabtaban.
20-22 Ne nakarawat ka duma ne me kabuhalan ni Kuhat ne puun te me kabuhalan ni Libi te hep‑at ne siyudad puun te me kabuhalan ni Ipraim. Ne iyan seini: ka Sikim (ne diye te bubungan te Ipraim ne sabeka te me siyudad ne aputanan te etew ne egpekeyimatey ne ware tuyua), Gisir, Kibsa-Im, wey Bit-Hurun wey ka me panabtaban kayi.
23-24 Ne imbehayan pad man‑e sikandan te hep‑at ne siyudad puun te inged te me kabuhalan ni Dan. Ne iyan seini: ka Iltiki, Gibitun, Ayalun, wey Gat-Rimun wey ka me panabtaban kayi.
25 Ne imbehayan pad man‑e sikandan te daruwa ne siyudad te katenge te me kabuhalan ni Manasis. Ne iyan seini: ka Taanak, wey Gat-Rimun wey ka me panabtaban kayi.
26 Migginguma ka langun ne narawat te duma ne kabuhalan ni Kuhat te sapulu (10) ne siyudad lagkes ka me panabtaban.
27 Ka me kabuhalan ni Girsun ne puun te me kabuhalan ni Libi, nakarawat te daruwa ne siyudad puun te katenge te me kabuhalan ni Manasis. Ne iyan seini: ka Gulan ne diye te Basan (ne sabeka te me siyudad ne aputanan te etew ne egpekeyimatey ne ware tuyua), wey ka Bi-Istira wey ka me panabtaban kayi.
28 Ne imbehayan pad man‑e sikandan te hep‑at ne siyudad puun te inged te me kabuhalan ni Isakar. Ne iyan seini: ka Kisyun, Dabirat,
29 Harmut, In-Gamin wey ka me panabtaban kayi.
30 Ne imbehayan pad man‑e sikandan te hep‑at ne siyudad puun te inged te me kabuhalan ni Asir. Ne iyan seini: ka Mishal, Abdun,
31 Hilkat, wey Rihub wey ka me panabtaban kayi.
32 Ne imbehayan pad man‑e sikandan te tatelu ne siyudad puun te inged te me kabuhalan ni Naptali. Ne iyan seini: ka Kidis ne diye te Galiliya (ne sabeka te me siyudad ne aputanan te etew ne egpekeyimatey ne ware tuyua), Hamut-Dur, wey Kartan wey ka me panabtaban kayi.
33 Migginguma ka langun ne narawat te kabuhalan ni Girsun te sapulu wey tatelu (13) ne siyudad wey ka me panabtaban kayi.
34-35 Ne ka nasame ne me kabuhalan ni Libi ne me kabuhalan ni Mirari, imbehayan te hep‑at ne siyudad puun te inged te me kabuhalan ni Sabulun. Ne iyan seini: ka Hukni-Am, Karta, Dimna, wey Nahalal wey ka me panabtaban kayi.
36-37 Ne imbehayan pad man‑e sikandan te hep‑at ne siyudad puun te inged te me kabuhalan ni Rubin. Ne iyan seini: ka Bisir, Hahas, Kidimut, wey Mipaat wey ka me panabtaban kayi.
38-39 Ne imbehayan pad man‑e sikandan te hep‑at ne siyudad puun te inged te me kabuhalan ni Gad. Ne iyan seini: ka Ramut ne diye te Gilyad (ne sabeka te me siyudad ne aputanan te etew ne egpekeyimatey ne ware tuyua), Mahanaim, Hisbun, wey Hasir wey ka me panabtaban kayi.
40 Purisu, migginguma ka langun ne imbehey te kabuhalan ni Libi diye te kabuhalan ni Mirari te sapulu wey daruwa (12) ne siyudad wey me panabtaban.
41-42 Migginguma ka langun ne narawat te me kabuhalan ni Libi puun te inged te me kabuhalan ni Israil te hep‑at ne pulu wey walu (48) ne siyudad wey ka me panabtaban kayi.
Ka inged ne naangken te me kabuhalan ni Israil
43 Sikan naa ka imbehey te Magbebaye ne Manama diye te me kabuhalan ni Israil ka langun ne inged ne insaad din diye te kaap-apuan dan. Te naangken dan e seini, diyad sikandan nangugpe.
44 Imbehayan sikandan te Magbebaye ne Manama te keupianan puun te me kuntere dan ne nakalingut kandan sumale te insaad din diye te me kaap-apuan dan. Ne ware sikandan natalu te me kuntere dan tenged su impepanalu ma sikandan te Magbebaye ne Manama te langun ne kuntere dan.
45 Intuman te Magbebaye ne Manama ka langun ne insaad din diye te me kabuhalan ni Israil.