6
Ka pegkahuhus te Hiriku
1 Ne inlekeban ay-ayari te me mahinged te siyudad ne Hiriku ka me gumawan dan tenged te me kabuhalan ni Israil. Ne ware etew ne egpakalasud wey ke egpakalihawang naa te siyudad.
2 Ne ingkahiyan te Magbebaye ne Manama si Huswi, “Igpatalu ku keykew ka Hiriku lagkes ka Hari wey ka me bahani.
3 Linglinguti nu ka siyudad duma te me sundalu nu kasabeka te tagse aldew te hen‑em ne aldew.
4 Pewun‑aa nu ka pitu ne talagpanubad ne eg-uyan te me trumpita ne sungey te lukes ne karniru. Te igkapitu ne aldew, linguti nu te kapapitu ka siyudad duma te me sundalu, wey duma te me talagpanubad ne egparahing te trumpita ne sungey.
5 Ne egparahingen dan te mananey ka me trumpita. Ne emun ke egkarineg nud e seini, pepanguleyia nud naa patamtamana ka me etew wey egkahuhus ka batu ne alad te siyudad. Ne egpakalasud kew e langun su warad man e elet.”
6 Purisu, inlibulung ni Huswi ka me talagpanubad wey ingkahiyan din, “Yayungi niyu ka Tahuanan te Kasabutan te Magbebaye ne Manama. Ne due eggun‑a ne pitu ne talagpanubad ne eg-uyan te me trumpita ne sungey te karniru.”
7 Ne ingkahiyan din degma ka me etew, “Ligkat kew e! Linguti niyud e ka siyudad. Ne due eggun‑a ne me sundalu ne kumplitu te panganiban te seeye se pitu ne talagpanubad ne migyayung te Tahuanan te Kasabutan te Magbebaye ne Manama.”
8 Pegkapenga ni Huswi te pegsuhu te me etew, miggun-e e ka pitu ne talagpanubad te seeye se me talagpanubad ne migyayung te Tahuanan te Kasabutan wey imparahing dan e ka me trumpita ran ne sungey.
9 Ne miggun‑a ka duma ne me sundalu ne kumplitu te panganiban te seeye se me talagpanubad ne migparahing te me trumpita, wey migsinundul ka duma ne me sundalu te me talagpanubad ne migyayung te Tahuanan te Kasabutan taheed te imparahing ka me trumpita.
10 Piru ware pad ipepanguleyi ni Huswi ka me etew wey ke eglalag-lalag naa taman te egsuhuen din e sikandan.
11 Sikan naa ka impalingut dan kasabeka te siyudad ka Tahuanan te Kasabutan te Magbebaye ne Manama. Pegkapenga ran, miglibed e sikandan diye te kampu wey diyad sikandan miggirehe.
12 Te pegkamaselem e, migselem-selem mig-enew si Huswi. Ne inyayungan e man‑e te me talagpanubad ka Tahuanan te Kasabutan.
13 Ne miggun‑a red man‑e ka pitu ne talagpanubad ne migparahing te me trumpita. Ne sikan ded degma ka inggimu te me sundalu ne kumplitu te panganiban, miggun‑a ka duma wey migpamewuri ka duma te seeye se pitu ne talagpanubad ne migyayung te Tahuanan te Kasabutan, taheed te pabulus ne imparahing ka me trumpita.
14 Te igkarangeb e ne aldew, miglingut e man‑e sikandan te siyudad wey miglibed e man‑e sikandan diye te kampu ran. Ne seeye ded ka inggimu ran te hen‑em ne aldew.
15 Te egpamalat-palat pad te igkapitu ne aldew, nangenew e sikandan wey migparid e man‑e sikandan palingut te siyudad iling te inggimu ran te an-anayan. Piru te seini ne aldew, kapapitu sikandan miglingut te siyudad.
16 Te igkapitu ran e te eglingut, imparahing e te me talagpanubad ka me trumpita, wey ingkahiyan ni Huswi ka me etew, “Panguleyi kew e su imbehey e kanta te Magbebaye ne Manama ka seini ne siyudad!
17 Ne keilangan ne egdereetan en iya ka langun ne diye te Hiriku isip ighalad wey igpanubad te Magbebaye ne Manama. Iyan de egkaluwas si Rahab ka malitan ne egpamelegye te lawa wey ka langun ne sakup te pamilya rin tenged su inluwas din ma ka me tahasiliban ta.
18 Ne kene kew panguwa te minsan nekey ne natahahe e ne egdereetan. Egkahule kew ke egpanguwa kew kayi, wey sikaniyu ka egpuunan ke due egginguma ne karereetan te Israil.
19 Piru ilein niyu ka langun ne inggimu puun te pelata, bulawan, burunsi wey ke putew naa su para sika te Magbebaye ne Manama. Ne keilangan ne itahu niyu sika diye te tahuanan te karatuan te Magbebaye ne Manama.”
20 Sikan naa ka imparahing e te me talagpanubad ka me trumpita ne sungey. Te pegkarineg dutu te me kabuhalan ni Israil, migpanaman-taman e sikandan migpanguleyi wey nahuhus ka batu ne alad te siyudad. Ne nakalasud e sikandan, wey in-ahew ran e ka siyudad.
21 Ne inggule dan pangimatayi ka langun ne diye te siyudad, ka me lukes, me malitan, me buyag, wey me bate-bate pad. Inlagkes dan degma pangimatayi ka me baka, me karniru, wey me asnu.
22 Ne ingkahiyan ni Huswi ka daruwa ne tahasiliban dengan, “Hendiyei niyu ka baley te malitan ne egpamelegye te lawa wey palihawanga niyu sikandin wey ka langun ne sakup te pamilya rin sumale te insaad niyu kandin.”
23 Purisu, nangendiyad e sikandan wey impalihawang dan si Rahab, duma te amey rin, iney rin, me maama rin, wey ka langun ne sakup te pamilya rin. Impalihawang dan ka langun ne sakup te pamilya ni Rahab wey impeugpe dan diye te lihawangan te kampu ran.
24 Ne insilaban dan ka intiru ne siyudad wey ka langun ne nakatahu diye, angin e te me kasangkapan ne inggimu puun te pelata, bulawan, burunsi, wey putew. Impanguwa ran seini wey intahu dan diye te balungbalung ne tahuanan te karatuan te Magbebaye ne Manama.
25 Piru inluwas ni Huswi si Rahab, ka malitan ne egpamelegye te lawa wey ka langun ne sakup te pamilya rin, tenged su inluwas din ma ka insuhu ni Huswi ne migsisilib te Hiriku. Ne minsan kuntee mig-ugpe ded diye te Israil ka me kabuhalan ni Rahab.
26 Te seeye ne timpu, impanpanayan ni Huswi ka me kabuhalan ni Israil te, “Egdilusen te Magbebaye ne Manama ka minsan hentew ne egbalew-balew egpasasindeg te siyudad ne Hiriku.
Ne egpatayan te panganey ne anak
ka minsan hentew ne egpasasindeg te pabunsuran te siyudad.
Ne egpatayan te kinaariyan ne anak
ka minsan hentew ne egpasasindeg te me gumawan te siyudad.”
27 Ne indumaan iya te Magbebaye ne Manama si Huswi, wey nabantug sikandin te minsan hendei ne inged.