9
Ka peg-akal te me matig-Gibyun ki Huswi
1 Ne narineg ka pegpanalu te me kabuhalan ni Israil te langun ne Hari ne nangugpe diye te marani te Weyig ne Hurdan, dapit te iglineb. Me Hari sikandan te Hitihanen, Amurihanen, Kanaanen, Pirisihanen, Hibihanen, wey Hibusihanen. Diye sikandan nangugpe te me bubungan, me napu diye te iglineb, wey diye te me ilis te Dahat ne Miditiranyu taman diye te Libanun.
2 Ne miglibulung sikandan langun ka egpakiggira ki Huswi wey te me kabuhalan ni Israil.
3 Piru te pegkarineg te me matig-Gibyun meyitenged te neyimu ni Huswi diye te Hiriku wey te Ay,
4 nekegsabut sikandan ne eg-akalan dan si Huswi. Ne migsuhu sikandan te me etew peendiye ki Huswi ne due me asnu ne indulanan te leddak ne me saku, te nahisi wey tinupakan ne me tahuanan te binu.
5 Ne migsaluub sikandan te leddak ne me kumbale, te leddak wey tinupakan ne me sandal. Ne iyan dan imbewu ka migkehal e wey nallupet e ne me paan.
6 Ne miggendiye sikandan ki Huswi diye te ingkekampuwan te me kabuhalan ni Israil diye te Gilgal. Ne ingkahiyan dan si Huswi wey ka me kabuhalan ni Israil, “Mariyu amana ka inged ne impuunan ney; igkeupii ney perem ne eggimu ki te kasabutan ne kene key nikaniyu eggilabetan.”
7 Piru migtabak ka me pangulu te Israil, “Mania te eggimu key te kasabutan kaniyu? Kema mule ke marani re kayi ka impuunan niyu.”
8 Ne migpeyid‑u-hid‑u sikandan ki Huswi ne miggenendue, “Andam key ne egpasuluhuanen keykew.”
Ne mig-insaan sikandan ni Huswi, “Hentew kew bes, wey hendei kew migpuun?”
9 Ne migtabak sikandan, “Mariyu amana ne inged ka impuunan ney. Miggendini key tenged su nabantuhan key te Magbebaye ne Manama niyu. Narineg ney ka langun ne inggimu rin diye te Ihiptu.
10 Nanengnengan ney degma ka inggimu rin te daruwa ne Hari ne me Amurihanen diye te igsile te Hurdan, ne iyan si Sihun ne Hari te Hisbun, wey si Ug ne Hari te Basan ne mig-ugpe diye te Astarut.
11 Sikan naa ka ingkahiyan key te me igdatu ney, wey te langun ne mahinged te inged ney, ‘Andam kew te egkakeen niyu para te peggipanew niyu. Pakigkita kew te me kabuhalan ni Israil wey kahii niyu sikandan ne andam ki ne egkeyimu ne suluhuanen dan. Peyimuwa niyu sikandan te kasabutan ne kene ki nikandan eggilabetan.’
12 Ne tengtengi niyu ka paan ney; meinit pad seini te pegligkat ney, piru kuntee, migkehal e wey nallupet e.
13 Tengtengi niyu man‑e ka tinupakan ne me tahuanan te binu, iyam pad seini, piru kuntee, nabindas e. Nalledak e degma ka me kumbale ney wey ka me sandal ney tenged te mariyu amana ne inged ka impuunan ney.”
14 Ne inggeraman te me kabuhalan ni Israil ka pegkeen dan ke malehet naan iya ne naluhey e, piru ware sikandan nekeinse te Magbebaye ne Manama.
15 Ne miggimu si Huswi te kasabutan ne kene din eggilabetan sikandan wey ke eggimatayan naa. Ne impahunlibetan seini te me pangulu te Israil.
16 Te peglihad te tatelu ne aldew puun te peggimu ran te kasabutan, natahaan te me kabuhalan ni Israil ne marani bes de ka nangugpaan te seeye ne me etew.
17 Purisu, nangipanew ka me kabuhalan ni Israil, wey te igkatelu ne aldew, nekeume e sikandan diye te me siyudad ne nangugpaan te seeye ne me etew. Me siyudad seini te Gibyun, Kipira, Biirut, wey Kiryat-Hiyarim.
18 Piru kene egkaayun ne egpangimatayan dan ka me etew diye su nakapahunlibet ma ka me pangulu te Israil diye te kandan te ngaran te Magbebaye ne Manama te Israil.
Ne migsagsahukul ka me kabuhalan ni Israil diye te me pangulu ran.
19 Piru migtabak ka me pangulu, “Due kasabutan ne napahunlibetan ney kandan pinaahi te ngaran te Magbebaye, ka Manama te Israil, sikan naa ka kene ta egkeyilabetan sikandan.
20 Seini naan de ka eggimuwen ta kandan: kene ta sikandan eggimatayan eyew kene ki egparusaan tenged te pegpahunlibet ta kandan.
21 Balahara niyu re due sikandan ne egkeuyag. Piru eggimuwen ta sikandan ne me talagtempug te kayu, wey talagsakug te weyig kayi te kanta.” Ne natuman iya diye te me Gibihanen ka inlalag te me pangulu.
22 Ne impeumew ni Huswi ka me Gibihanen wey ingkahiyan din, “Mania te in-akalan key nikaniyu? Mania te migkahi kew ne mariyu ka impuunan niyu, ne marani bes de kayi te kanami ka ugpaan niyu?
23 Tenged su inggimu niyu seini, egdilusen kew te Manama. Puun kuntee, me suluhuanen kew e ne me talagtempug te kayu wey talagsakug te weyig para te balungbalung te Magbebaye ne Manama ku.”
24 Ne migtabak sikandan ki Huswi, “Uya su nanengnengan ney iya ne insuhu te Magbebaye ne Manama niyu si Muwisis ne suluhuanen din ne igbehey kaniyu ka seini ne inged, wey egpangimatayan ka langun ne mahinged kayi te peglusud niyu. Ahalen neyimu ney seeye su naaldek key ne eggimatayan key nikaniyu.
25 Ne kuntee, suluhuanen key e nikeykew. Sikeykew e ka mateu ke nekey ka eggimuwen nu kayi te kanami ne insuman-suman nu ne eleg wey meupiya.”
26 Sikan naa ka impangabangan sikandan ni Huswi wey ware din sikandan peyimatayi te me kabuhalan ni Israil.
27 Ke kene, inggimu rin sikandan ne me suluhuanen ne talagtempug te kayu wey talagsakug te weyig para te me kabuhalan ni Israil, wey diye te altar te Magbebaye ne Manama. Ne minsan kuntee, inggimu ran ded seini diye te inged ne in-alam te Manama.