24
1 Te timpu te peghari ni Huwakim te Huda, inlusuran sikandin ni Nibukadnisar ne Hari te Babilunya, wey nasakup sikandin ni Nibukadnisar te tatelu ne leg‑un. Piru nataman, migribildi e sikandin te Hari te Babilunya.
2 Ne impalusuran te Magbebaye ne Manama si Huwakim te me sundalu ne me matig-Kaldiya, me matig-Sirya, me matig-Muwab wey me matig-Amun eyew te pegdereet te Huda sumale te inlalag te Magbebaye pinaahi te me suluhuanen din ne me prupita.
3 Neyitabu seeye te Huda puun te suhu te Magbebaye, eyew egkahule ka me matig-Huda tenged te sale ne neyimu ni Hari Manasis,
4 wey tenged man‑e te impangimatayan din ne me etew ne ware sale, kenad iya egpakapasaylu ka Magbebaye ki Manasis.
5 Ka duma pad ne guhuren te peghari ni Huwakim wey ka langun ne neyimu rin, nasulat diye te Sulatanan te me Guhuren te me Hari te Huda.
6 Ne nataman migpatey e si Huwakim, wey si Huwakin e ne anak din ka migsubal kandin mighari.
7 Ne warad e mig-abey miglusud ka Hari te Ihiptu tenged su naahew e te Hari te Babilunya ka langun ne tane te Ihiptu ligkat diye te Weyig ne Nilu taman diye te Weyig ne Iyupratis.
Ka peghari ni Huwakin te Huda
(2 Kru. 36:9-10)
8 Sapulu wey walu (18) ka idad ni Huwakin te neyimu sikandin ne Hari, wey mighari sikandin diye te Hirusalim te tatelu re ne bulan. Si Nihusta ne anak ni Ilnatan ne matig-Hirusalim ka iney rin.
9 Mareet ka hinimuwan ni Huwakin diye te tangkaan te Magbebaye iling te inggimu te amey rin.
10 Te seeye ne timpu, miglusud ka me sundalu ni Hari Nibukadnisar diye te Hirusalim wey inlingutan dan ka siyudad.
11 Ne miggendiye si Nibukadnisar te Hirusalim taheed te inlingutan seeye te me sundalu rin.
12 Ne miggural e si Huwakin diye ki Nibukadnisar duma te iney rin, te me upisyal rin, wey me sundalu rin, lagkes seeye se me upisyal te palasyu. Igkawalu ne leg‑un seeye te peghari ni Nibukadnisar te pegpaprisu rin ki Huwakin.
13 Ne impanguyan ni Nibukadnisar diye te Babilunya ka langun ne me kasangkapan diye te timplu te Magbebaye wey ka diye te palasyu. Impamese din degma ka langun ne impeyimu dengan ni Hari Sulumun ne me kasangkapan ne bulawan diye te timplu. Neyitabu seini sumale te ingkahi te Magbebaye.
14 Impandakep din man‑e ka langun ne matig-Hirusalim, ka langun ne me upisyal wey ka me mabbulut ne me sundalu. Ne migginguma te sapulu ne libu (10,000) ka naddakep, lagkes ka me due katuenan te pegbebaley, wey ka me mannayab. Iyan naan de nahaat ka egkaayu-ayu e ne subla.
15 Ne in-uyan e ni Nibukadnisar si Huwakin diye te Babilunya, minsan ka iney rin, ka me asawa rin wey ka me upisyal rin. Apil degma ka me upisyal te nasud.
16 In-uyan din man‑e ka pitu ne libu (7,000) ne mabbulut ne me sundalu, wey senge-libu (1,000) ne me etew ne dakel se katuenan te minsan nekey re iya, lagkes ka me mannayab. Langun dan ne makeseg wey eleg ne egkeyimu ne sundalu.
17 Ne ka anggam ni Huwakin ne si Mataniyas, iyan inggimu ni Nibukadnisar ne Hari subal ki Huwakin, wey inliwanan ni Nibukadnisar ka ngaran ni Mataniyas te Sidikiyas.
Ka peghari ni Sidikiyas te Huda
(2 Kru. 36:11-12; Hir. 52:1-3a)
18 Daruwa ne pulu wey sabeka (21) ka idad ni Sidikiyas te neyimu sikandin ne Hari, wey mighari sikandin diye te Hirusalim te sapulu wey sabeka (11) ne leg‑un. Si Hamutal ne anak ni Hirimiyas ne matig-Libna ka iney rin.
19 Ne mareet ded degma ka hinimuwan ni Hari Sidikiyas diye te Magbebaye ne Manama, iling te langun ne hinimuwan ni Hari Huwakim.
20 Purisu nalangetan amana ka Magbebaye ne Manama te keet-etawan te Hirusalim wey te Huda, wey indeldel rin e sikandan.
Nataman migribildi e si Sidikiyas ki Nibukadnisar ne Hari te Babilunya.