20
Ka igdusa te me sale
1 Ne migkahiyan te Magbebaye ne Manama si Muwisis,
2 “Kahii nu ka me kabuhalan ni Israil wey ka me lapu te egbatuwen taman te egpatey ka minsan hentew kandan ne egpanubad te me anak dan diye ki Muluk.
3 Egbalaharen kud ka sika ne etew wey egdeldelen e puun te me karumaan din. Tenged te pegpanubad din te anak din diye ki Muluk, nalinditan ka Balungbalung ku, wey imbaley-baley rin ka ngaran ku.
4 Ne emun ke egbalaharen niyu re sikandin te pegpanubad din te anak din diye ki Muluk wey kene niyu eggimatayan sikandin,
5 egbalaharen kud sikandin wey ka pamilya rin, wey ka langun ne migparuma-ruma kandin te pegpanubad din ki Muluk. Egdeldelen e sikandan puun te me karumaan dan.
6 “Ke due etew ne egparani wey egparuma-ruma te egmahehane, egbalaharen kud sikandin, wey egdeldelen e puun te me karumaan din.
7 Purisu keilangan ne matulus kew su sikeddiey ka Magbebaye ne Manama niyu.
8 Tantanuri niyu wey tumana niyu ka me balaud ku. Sikeddiey ka Magbebaye ne migmatulus kaniyu.
9 “Ke due egdilus te amey wey iney rin, keilangan ne eggimatayan. Sikandin ded ka egpuunan te kamatayen din su indilus din ma ka amey wey iney rin.
10 “Ke due etew ne nakalibug te asawa te senge-etew, egpeg-unungen de iya sikandan te eggimatey se daruwa.
11 Ne ka lukes ne eggilabet te nasunud din ne iney, migpeyilew te amey rin. Keilangan ne egpeg-unungen de sikandan te eggimatey; sikandan ded ka egpuunan te kamatayen dan.
12 Ke due etew ne eggilabet te ambey rin, egpeg-unungen sikandan te eggimatey su mareet ka inggimu ran. Sikandan ded ka egpuunan te kamatayen dan.
13 Ke due lukes ne eggilabet te iling din ne lukes, eg-isipen sikandan ne malindit. Keilangan ne egpeg-unungen de sikandan te eggimatey; sikandan ded ka egpuunan te kamatayen dan.
14 Ke due etew ne egpegduwayen ka anak wey iney, keilangan ne egsilaban sikandan se tatelu, su mareet ka inggimu ran. Kene ne meupiya ne egkasewuhan kew te mareet.
15-16 Ke due lukes wey ke malitan naa ne eggilabet te mananap, keilangan ne eggimatayan sikandin wey ka mananap. Sikandan ded ka egpuunan te kamatayen dan.
17 “Ke due lukes ne eg-asawa te atebey rin, minsan nekeg-atebey re sikandan te amey wey ke iney naa, impeyilawan din ka me suled din wey due egkaneem-neem din ne legpad. Ne tenged te inggimu rin, egdeldelen e sikandin wey ka atebey rin puun te me karumaan dan.
18 Ke due lukes ne eggilabet te malitan ne eglangeseen, egdeldelen e sikandan se daruwa puun te me karumaan dan su nekeiling te inwakisan dan ka kalindit te malitan.
19 “Ke due lukes ne eggilabet te aye din, impeyilawan din ka aye din. Ne due egkaneem-neem dan ne legpad te daruwa.
20 Ke due lukes ne eggilabet te asawa te anggam din, impeyilawan din ka anggam din. Ne due egkaneem-neem dan ne legpad te daruwa wey egpatey sikandan ne ware anak.
21 Ke due etew ne egpakalibug te suled din, impeyilawan din ka suled din. Eg-isipen ne malindit sika ne himu wey keilangan ne eggimatayan sikandan se daruwa ne migpalibuhey ne ware anak.
22 “Tumana niyu ka langun ne me balaud ku wey ka me suhu ku su eyew kene ku sikaniyu egdeldelen diye te tane ne egpeendiyaan ku wey egpeugpaan ku kaniyu.
23 Kene kew iling te me batasan te keet-etawan ne egdeldelen ku diye te inged ne eggendiyaan niyu. Ingkeepes ku sikandan tenged te peggimu ran te mekeyilew-hilew ne himu.
24 Ne sumale te ingkahi ku kaniyu, sikaniyud e ka egpakakamuney te tane. Igbehey ku kaniyu sika se meupiya ne tane wey dakel se eg-uma. Sikeddiey ka Magbebaye ne Manama niyu ne mig-alam kaniyu puun te duma ne keet-etawan.
25 Sikan naa, ilein niyu degma ka in-isip ne malinis ne mananap puun te mananap ne in-isip ne malindit wey ka malindit ne manuk-manuk puun te malinis. Kene kew keen te in-isip ne malindit ne me mananap, manuk-manuk, wey minsan nekey ne egdul‑ug te tane ne impalein ku kaniyu su eg-isipen kew ne malindit.
26 Keilangan ne matulus kew su sikeddi se Magbebaye niyu, matulus a. In-alam ku sikaniyu puun te duma ne keet-etawan eyew sikeddiey e ka egpakakamuney kaniyu.
27 “Ke due egpahehane, lukes ma wey se malitan, keilangan ne egbatuwen taman te egpatey. Sikandin ded ke egpuunan te kamatayen din.”