25
Ka igkapitu ne leg‑un
(Diy. 15:1-11)
1 Ne migkahiyan te Magbebaye ne Manama si Muwisis diye te Bubungan ne Sinay,
2 “Kahii nu ka me kabuhalan ni Israil te emun ke diye kew e te tane ne igbehey ku kaniyu, kene niyu pa pamulei ka tane te tagse igkapitu ne leg‑un su egpeyimelayen pad te Magbebaye ne Manama.
3 Egpakapamula kew, egpakapanengul kew te parasan niyu wey egpakapamupu kew te me behas te pinamula niyu, seled te hen‑em ne leg‑un.
4 Piru te igkapitu e ne leg‑un, keilangan ne kene niyu egtrabahuwen ka tane niyu. Kene niyu pamulei ka me kamet niyu wey kene niyu man‑e panenguli ka me parasan niyu.
5 Kene niyu gaaniya ka me pinamula niyu ne nanubu de due diye te inggaaniyan niyu wey kene niyu pamupuwa ka behas te me paras ne ware napanenguli. Keilangan man‑e ne kene niyu egtrabahuwen ka tane te sika ne leg‑un eyew egpekeyimmeley.
6 Piru egpakakuwa kew red te egkeenen niyu puun dutu, wey ka me uripen niyu, ka me suluhuanen niyu, ka me lapu ne mig-ugpe te marani niyu,
7 ka me ayam niyu, wey ka me mahintalunan ne diye te tane niyu. Egkaayun ne egkeenen niyu ka minsan nekey ne uma te tane.”
Ka Leg-un te Kaligwangan
8 “Ne keilangan ne egseel kew te pitu ne leg‑un ne peggimeley. Ne kapapituwa niyu sika se pitu ne leg‑un ne peggimeley eyew egkeyimu ne hep‑at ne pulu wey siyam (49) ne leg‑un.
9 Parahinga niyu te derahingi ka me trumpita te minsan hendei, te igkapitu ne bulan ne Aldew red degma te Pegpasaylu te me Sale niyu.
10 Matulusa niyu ka igkalalimma ne pulu (50) ne leg‑un wey behayi niyu te kaligwangan ka langun ne nangugpe te tane niyu. Leg-un te Kaligwangan seini su egpakalibed kaniyu ka me kasangkapan ne nakabelegye niyu. Egbehayan degma te kaligwangan ka neuripen ne egpekeuli diye te pamilya ran wey diye te me karumaan dan.
11 Ka igkalalimma (50) ne pulu ne leg‑un, ka Leg-un te Kaligwangan para kaniyu. Ne keilangan ne kene niyu egpamulaan ka me kamet niyu wey ke eggaaniyan naa ka pinamula ne nanubu de due wey ke egpamupuwen naa ka behas te paras ne ware napanenguli.
12 Matulus sika ne leg‑un para kaniyu su due Kaligwangan niyu wey egpakakeen kew red te me behas te me pinamula niyu.
13 “Te Leg-un te Kaligwangan, ilibed niyu diye te kamuney ka kasangkapan ne nakabelegye din kaniyu.
14 Ke egbelegye kew te tane diye te duma niyu ne kabuhalan ni Israil wey ke egbeli kew naa, kene kew pale-leihey.
15 Ne emun ke egbeli kew te tane diye te duma niyu ne kabuhalan ni Israil, seela niyu ke pila naan de ne leg‑un ka nahaat ne eggingume e ka Leg-un te Kaligwangan, wey alahaa niyu re ka kentiddad ke kapapila naan de egpakahaani.
16 Ke pila pad ne leg‑un ne human ka Leg-un te Kaligwangan, egdakel degma ka kentiddad kayi piru ke malepet naan de, deisek naan de degma ka kentiddad due. Su ka malehet, kene ne ka tane ka imbeli niyu, ke kene, ka karakel te egkahaani.
17 Purisu kene kew pale-leihey, ke kene, kaaldeki niyu ka Manama niyu su sikeddiey ka Magbebaye ne Manama niyu.
18 “Tumana niyu iya ka me balaud wey me suhu ne igpeyimu ku kaniyu eyew egpekeugpe kew diye te tane ne ware igkabantali.
19 Ne dakel ka eg-uma te tane wey kene kew e egkaawaan te egkakeen, wey eg-ugpe kew ne warad e egpamitawen.
20 “Piru ke eg-inse kew ke nekey ka egkeenen niyu te igkapitu ne leg‑un te kene kew ma egpakapamula wey ke egpakahaani naa,
21 egpanalanginan ku sikaniyu te igkeem‑em ne leg‑un eyew egpakahaani kew te egkakeen ne eleg te tatelu ne leg‑un.
22 Purisu taheed te egpamula kew te igkawalu ne leg‑un, iyan niyu pad egkakeen ka nahaani niyu te igkeen‑em ne leg‑un, wey dakel pad ka egkakeen niyu taman te tinggaani e te igkasiyam ne leg‑un.”
Ka peg-uli te me kasangkapan
23 “Kene kew bebelegye te tane ne kene niyud egkaawi, su sikeddiey ka kamuney te tane. Impeugpaan ku re sika kaniyu wey impalapuan ku re sika kaniyu.
24 “Purisu ipaawi niyu red te kamuney ka tane din puun kaniyu. Himuwa niyu seini te langun ne tane ne egkabeli niyu.
25 Ke naayu-ayu e ka duma niyu ne kabuhalan ni Israil wey egkapehes e sikandin ne egbelegye te tane din, kaayun ne ka amana rin pad iya ne karumaan ka eglekat due.
26 Piru ke ware karumaan din ne egpakalekat te nabelegye din, sikandin ded ka eglekat due ke egmatubung e man‑e sikandin.
27 Keilangan ne egbayaran din langun ka kentiddad te egkahaani puun te tane din taman te eggingume e ka Leg-un te Kaligwangan. Ne egkaawi din e ka tane din.
28 Piru ke kene ne eleg ka iglekat din, kene din pad egkaawi seini diye te nabelegyaan din taman te eggingume e ka Leg-un te Kaligwangan. Te sika ne leg‑un, egkaawi din e ka tane din ne warad bayad.
29 “Ke due etew ne migbelegye te baley rin ne nakaseled te alad te siyudad, egkaayun pad ne eglekaten din seeye seled te sabeka ne leg‑un.
30 Piru ke kene din egkalekat seeye seled te sabeka ne leg‑un, iyan e egpakakamuney dutu ka nakabeli wey ka me kabuhalan din keureme, minsan ke eggingume e ka Leg-un te Kaligwangan.
31 Piru ka me baley ne diye te me bariyu ne ware nalinguti te alad, eg-isipen ne iling te me kamet, egkaayun ne eglekaten te kamuney te Leg-un te Kaligwangan.
32 “Piru ka me baley te me Libita ne diye te me siyudad dan, egkaayun mule ne eglekaten dan te minsan ken‑u.
33 Ke kene dan seeye egkalekat, ig-uli seeye diye te kandan te timpu te Leg-un te Kaligwangan, su ka me baley ne diye te siyudad, baad dan iya puun te me karumaan dan ne kabuhalan ni Israil.
34 Piru ka me panabtaban ne diye lenged te me siyudad dan, keilangan ne kene dan igbelegye su kandan ma iya seini te ware egtamanan.”
Ka pegpasambey te egkaayu-ayu
35 “Ke warad egkeyimu te duma niyu ne kabuhalan ni Israil wey kenad e egpekeyimu ne eg-uyag-uyag, bulihi niyu sikandin iling te pegbulig niyu te lapu wey ke mahaliyug naa eyew egpakalemung ded sikandin kaniyu.
36 Pasambaya niyu sikandin te seleppi piru kene niyu paanaki ka egsambayan din, ke kene, kaaldeki niyu ka Manama niyu eyew egpakalemung ded sikandin kaniyu.
37 Kene niyu paanaki ka seleppi ne impasambayan niyu kandin wey kene niyu pasubleyi ka bayad te keenen ne igpakeen niyu kandin.
38 Sikeddiey ka Magbebaye ne Manama niyu ne migpalihawang kaniyu puun te Ihiptu eyew igbehey kaniyu ka inged te Kanaan wey eyew egkeyimu a ne Manama niyu.”
Ka pegpaawe te me uripen
39 “Ke warad egkeyimu te duma niyu ne kabuhalan ni Israil ne egkapehes e sikandin ne egpeuripen kaniyu, kene niyu patrabahuwa sikandin iling te uripen.
40 Isipa niyu sikandin ne egsuulan ne trabahanti wey iling te lapu. Egtrabahu sikandin kaniyu taman te Leg-un te Kaligwangan.
41 Te sika ne leg‑un, ipaawe niyud e sikandin wey ka me anak din wey egpakalibed e sikandan diye te karumaan dan, wey diye te tane te kaap-apuan dan.
42 Impaawe ku sikandan puun te Ihiptu, purisu kene egkaayun ne igbelegye sikandan eyew igpeuripen.
43 Kene niyu de-deeha ka duma niyu, ke kene, kaaldeki a nikaniyu ne Manama niyu.
44 Ne egkaayun ne egpekeuuripen kew te lukes wey malitan piru beliya niyu sikandan diye te marani niyu re ne me inged.
45 Egpakabeli kew man‑e te me etew ne miglapu kaniyu wey ke me sakup naa te pamilya ran ne neetew te inged niyu. Ka me uripen ne nabeli niyu puun kandan, eg-uripenen iya.
46 Ne egkaayun ne igpeuripen niyud e man‑e sikandan te me anak niyu wey egkeuripen sikandan taman te egpatey sikandan. Piru kene niyu iya de-deeha ka duma niyu ne kabuhalan ni Israil ne egkeuripen niyu.
47 “Emun ke due lapu de ne naratu, wey due karumaan niyu ne warad iya egkeyimu, wey imbelegye din e ka pegkeetew rin diye te naratu eyew egpeuripen,
48 egkaayun ded ne eglekaten sikandin te duma rin ne kabuhalan ni Israil
49 ne anggam wey ke suled din naa, wey ke minsan hentew ne amana rin pad iya ne karumaan wey ke duen naan e seleppi din ne igbayad din te kaligwangan din.
50 Ka eggimuwen din duma te lapu ne nakabeli kandin, egseelen dan ke pile e ne leg‑un ne neuripen sikandin wey ke pila naan de ne leg‑un ne eggingume e ka Leg-un te Kaligwangan. Ke pila naan de ne leg‑un ka nasame, sikan naan de ka egbayaran din ne igpeiling te igbayad te egsuulan ne trabahanti.
51 Ke mananey pad egginguma ka Leg-un te Kaligwangan, dakel degma ka igbayad din te kaligwangan din.
52 Ke mahaan e, deisek naan de degma ka igbayad din te kaligwangan din. Ne ka bali te igbayad din, igpeiling te bayad te egsuulan ne trabahanti.
53 Keilangan ne eg-isipen sikandin ne trabahanti te seeye se lapu ne nakabeli kandin, wey keilangan ne kene sikandin egle-leihen.
54 Ne emun ke ware egpakalekat kandin wey ware seleppi ne igbayad te kaligwangan din, egpakaligwang ded sikandin wey ka me anak din ke eggingume e ka Leg-un te Kaligwangan.
55 Su sikeddiey re ka ahalen te me kabuhalan ni Israil ne me suluhuanen ku. Sikandan ka me suluhuanen ku ne impalihawang ku puun te Ihiptu. Sikeddiey ka Magbebaye ne Manama niyu.”