27
Ka halad ne iglekat te me saad
1 Ne migkahiyan te Magbebaye ne Manama si Muwisis,
2 “Kahii nu ka me kabuhalan ni Israil: Emun ke due etew ne ighalad eyew te pegtuman te saad, egkalekat ded sika te iling kayi ne paahi:
3 Emun ke lukes ne migdaruwe e ne pulu (20) peendiye te hen‑em ne pulu (60) ka idad, egkalekat sikandin te me 570 ne gramu ne pelata sumale te timbangan te me talagpanubad diye te Balungbalung.
4 Ke malitan sikandin, me 340 ne gramu ne pelata ka kentiddad te iglekat kandin.
5 Ne emun ke lukes sikandin ne miglalimme e peendiye te daruwa ne pulu (20) ne leg‑un, egkalekat sikandin te me 228 ne gramu ne pelata. Ne emun ke malitan, 114 ne gramu ka iglekat.
6 Ne emun ke senge-bulan pad sikandin peendiye te lalimma ne leg‑un, me lalimma ne pulu wey pitu (57) ne gramu ne pelata ka iglekat. Ne emun ke malitan, me tatelu ne pulu wey hep‑at (34) ne gramu ka iglekat.
7 Ne emun ke hen‑em e ne pulu (60) ka idad te lukes wey ke subla pad due, egkalekat sikandin te me 171 ne gramu ne pelata. Ne emun ke malitan, me 114 ne gramu ka iglekat.
8 “Ke due etew ne ware egkeyimu wey migpanaad sikandin ne egbehey piru kene egpakabehey, keilangan ne eg-uyanen sikandin diye te talagpanubad. Ne ka talagpanubad e ka egkahi ke pila ka igbehey rin sumale te egkeyimu rin.
9 “Ke iyan din insaad ka mananap eyew igpanubad diye te Magbebaye ne Manama, ka sika ne mananap, kandin e te Magbebaye ne Manama.
10 Keilangan ne kene din seini egsaliyuwan wey ke egliwanan naa, minsan pad ke meupiya wey ke mareet naa ka igliwan din. Emun ke egliwanan din ma te lein ne mananap, egkaamul e nasi ne daruwa ne mananap ka igkabehey rin te Manama.
11 Emun ke in-isip ne malindit ka mananap ne insaad din diye te Magbebaye ne Manama ne kene egkaayun ne igpakahalad, keilangan ne eg-uyanen din seini diye te talagpanubad.
12 Ne egkentidaran din seini wey kenad egkabalbalawan ka seeye ne kentiddad—meupiya ma ka mananap wey se mareet.
13 Piru ke egkeupian ka kamuney ne eggawien ka mananap din, egtimulan din te daruwa ne pulu (20) ne pursintu ka bali due.
14 “Ne emun ke due eghalad te baley rin diye te Magbebaye ne Manama, egpitawen pad te talagpanubad ka baley ke meupiya naan pad seini wey ke mareet e, ne egkentidaran e seini te talagpanubad wey kenad egkabalbalawan ka kentiddad due.
15 Ne emun ke eggawien ded te kamuney ka baley rin, keilangan ne egbayaran din ka kentiddad te baley wey egtimulan din pad te daruwa ne pulu (20) ne pursintu. Ne egkaawi din e ka baley rin.
16 “Ke due eghalad diye te Magbebaye ne Manama te tane ne inggaat kandin, keilangan ne igpeiling din ka kentiddad te mig-uma te tane. Te tagse lalimma ne pulu (50) ne gantang te impamula ne sibada, lalimma ne pulu (50) ne pelata ka bali.
17 Ke ighalad din ka kamet din, pegkeimpus de te Leg-un te Kaligwangan, kenad egkabalbalawan ka kentiddad dutu taman te eggingume e man‑e ka Leg-un te Kaligwangan.
18 Piru ke eglihad e ka Leg-un te Kaligwangan ne human din pad ighalad ka kamet din, keilangan ne egseelen te talagpanubad ka kentiddad te sika ne tane sumale te kasuluhan te nasame ne me leg‑un. Ne egsalinan din ka kentiddad dutu.
19 Ne emun ke eggawien ded te kamuney ka kamet ne inhalad din, keilangan ne egbayaran din ka kentiddad te kamet wey egtimulan din pad te daruwa ne pulu (20) ne pursintu. Ne egkaawi din e seini.
20 Piru ke kene din e eglekaten ka kamet din wey ke nabelegye din e naan e seini diye te lein ne etew, kene din e seini egkaawi.
21 Ne emun ke eggingume e ka Leg-un te Kaligwangan, kenad e seini egkaawi su kandin man e seini te Manama. Egpekeiling e seini te kamet ne imbehey diye te Manama wey iyan e egpakakamuney ka me talagpanubad.
22 “Ke ighalad te etew ka kamet ne imbeli rin ne ware nalagkes te karatuan ne inggaat kandin,
23 egkentiddaran seini te talagpanubad sumale ke pila ne leg‑un te kene pad egginguma ka Leg-un te Kaligwangan. Egbayaran te etew te sikan de ne aldew ke pila ka ingkentiddad te talagpanubad wey kandin e seini te Magbebaye ne Manama.
24 Te Leg-un te Kaligwangan, ig-uli diye te malehet ne kamuney ka tane ne nabeli te senge-etew su karatuan ma seini ne inggaat kandin.
25 “Keilangan ne ka langun ne kentiddad te seeye se ighalad diye te Magbebaye ne Manama, egtimbangen diye te timbangan te me talagpanubad.
26 “Piru ka an-anayan ne nati te mananap, kandin iya te Magbebaye ne Manama purisu kenad keilangan ne igpanubad pad kandin.
27 Piru ke in-isip ne malindit sika ne mananap, egkalekat din ded sika sumale te ingkentiddad te talagpanubad wey egtimulan din pad te daruwa ne pulu ne pursintu (20). Piru ke kene din eggawien, igbelegye e sika sumale te ingkentiddad te talagpanubad.
28 “Ware minsan nekey ne imbehey e diye te Magbebaye ne Manama ne egkaayun ded ne igbelegye wey ke egbeliyen naa, etew ma wey se mananap ne karatuan ne inggaat. Ighalad iya sika te Magbebaye ne Manama.
29 Ka etew ne imbehey e diye te Manama eyew eggimatayan, kenad e egkaawi su keilangan ne eggimatayan iya sikandin.
30 “Kandin te Magbebaye ne Manama ka langun ne igkasapulu ne egpuun te eg-uma te tane, nahaani puun te tane wey ke behas naa te me kayu; ighalad iya seini te Magbebaye ne Manama.
31 Ke due eglibed egbeli te minsan nekey ne igkasapulu din, keilangan ne egbayaran din ka kentiddad dutu wey egtimulan din te daruwa ne pulu (20) ne pursintu.
32 Emun ke egseel kew te me baka wey me karniru niyu, ka tagse igkasapulu, ihalad niyu iya diye te Magbebaye ne Manama.
33 Keilangan ne kene din seini ug-ugsiyen ke meupiya naa seini wey ke mareet. Kene man‑e egkaayun ne egsaliyuwan din seini. Ke egsaliyuwan din iya seini, egkaamul e nasi ne daruwa ne ayam igkabehey diye te Manama wey kenad seini egkaawi.”
34 Sika ka me suhu te Magbebaye ne Manama ki Muwisis diye te Bubungan ne Sinay eyew igpatuman te me kabuhalan ni Israil.