3
Ka pegdew‑ey ni Mikiyas te me pangulu
1 Ne migkahi ad man‑e, “Pammineg kew, me pangulu te kabuhalan ni Hakub,
sikaniyu se me talagmandu te Israil.
Keilangan ne iyan niyu eg-ikulen ka eleg ne peggukum.
2 Piru nasi niyu re iya igkeepes ka meupiya
wey igkeupii niyu ka mareet.
Impanlundisan niyu ka keet-etawan ku,
wey impanu-su niyu ka me sapu dan.
3 Impangeen niyu ka sapu dan,
wey inlundisan niyu ka laplap dan wey impanggepu niyu ka me tul‑an dan,
wey impanggupal-gupal niyu sikandan ne iling te ngalap ne egsubbeen.
4 Ne egpangananey kew red te Magbebaye ne Manama,
piru kene kew nikandin egtabaken.
Te sika ne timpu, kene kew e nikandin egpamminehen
tenged te maddeet ne hinimuwan niyu.”
5 Seini ka ingkahi te Magbebaye
diye te me ubaten ne me prupita ne eg-akal te me keet-etawan din,
“Migsaaran niyu te keupianan seeye se egpakabehey kaniyu te egkeenen,
piru in-ehetan niyu seeye se kene egpakabehey kaniyu.
6 Sikan naa, eggingume e ka marusilem kaniyu,
su warad ma igmakita te Manama kaniyu.
Egkataman e ka me taheinep niyu.
Eglineban e te aldew ka me prupita,
wey egpaddusilem e kandan ka aldew.”
7 Egdali-dian seeye se egmahehane wey egkeyilawan degma ka egmanagne.
Ne egmakasesagpeng naan de sikandan te be‑be dan
su kene man e egtabak kandan ka Manama.
8 Piru sikeddi mule, innipenu a te Magbebaye te Panisingan wey geem din,
wey imbehayan a te pegsabut ke nekey ka matareng wey imbehayan a te kabulut te pegguhud
eyew egkasaparan ka me kabuhalan ni Hakub te mareet ne hinimuwan dan, wey eyew igpakapanengneng ku te matig-Israil ka me sale dan.
9 Pammineg kew, me pangulu te kabuhalan ni Hakub;
sikaniyu se me talagmandu te Israil.
Indew‑ey niyu ka eleg ne peggukum wey immareet niyu ka langun ne meupiya.
10 Impasasindeg niyu ka Siyun,
ka siyudad te Hirusalim pinaahi te pegpangimatey wey pegleig-leig.
11 Egpabayad pad ka me pangulu niyu ne henduen pad eggukum,
igpaneleppi e te me talagpanubad ka pegpanulu dan,
wey re egpanagne ka me prupita ke due seleppi.
Ne minsan iling sikandan due, egkahi sikandan te migsalig kun sikandan te Magbebaye ne eggenendue,
“Pitawa niyu naa, indumaan ki te Manama
su ware ma karereetan ne migginguma kanta!”
12 Sikan naa, egdereetan ku ka Siyun tenged kaniyu,
wey egpekeiling e seini te daruwan.
Ne egpekeiling e ka Hirusalim te natambu ne me batu puun te nallundus ne me baley,
wey egmabbenes e ka bubungan ne impasasindehan te timplu.