5
1 Ne kuntee, libulung kew ka me sundalu te siyudad
su nalingutan kid e te me kuntere ta.
Egbarasan dan te geed ka beneng te pangulu te Israil.
Ka insaad te Manama ne pangulu ne egpuun te Bitlihim
2 “Ka Bitlihim ne egngaranan dengan te Iprata,
ka deisek ne lungsud te Huda,
piru iyan egpuunan te etew ne egpangulu te Israil,
wey neilaan e ka me kaap-apuan din puun pad dengan.”
3 Sikan naa, egbalaharen din pad ka matig-Israil diye te me kuntere dan
taman te timpu ne eglesutan e ka malitan te igkaberes din.
Egkataman, ka me kabuhalan ni Israil ne naddakep,
igpalibed din e diye te me karumaan dan.
4 Emun ke eglepew e sikandin, egmanduan din ka keet-etawan din pinaahi te karesen te Magbebaye ne Manama.
Su diye te kandin ka katelesan te ngaran te Magbebaye ne Manama rin.
Egpanguugpe ka keet-etawan din ne warad igkabantali,
su eg-ileen te intiru ne inged ka kabantug din.
5 Ne sikandin ka egpuunan te keupianan.
Emun ke eglusuran te matig-Asirya ka inged ta wey eg-ahawen ka tane ta,
eg-andam ki te pitu ne Hari ne egbantey kanta
wey walu ne pangulu te me etew eyew igpakuntere ta kandan.
Ka kaluwasan wey ka peglegpad
6 Ne egkasakup dan ka tane te Asirya pinaahi te kampilan,
wey egseleran dan ka tane ni Nimrud pinaahi te sinangkabew.
Sikandan ka egpangabang kanta puun te matig-Asirya
ke eglusuran dan ka inged ta wey ke egseleran dan naa ka eletanan te tane ta.
7 Ne ka nenekegsuwey-suwey ne me kabuhalan ni Hakub ne nenasame,
egkeyimu ne panalangin te nalein-lein ne me etew ne nenallemungan dan.
Egpekeiling sikandan te demmug puun te Magbebaye ne Manama ne egpakasubid te me pinamula
iling te uran ne egpekeuyag te minsan nekey ne egtubu.
Ware sikandan migsalig te me etew.
8 Piru seeye se nenasame ne kabuhalan ni Hakub ne nenekegsuwey-suwey diye te nalein-lein ne me nasud,
egpekeiling te me liyun ne egpandawi te me mahintalunan ne mananap,
wey ke egpekeiling naa te me pispis te liyun ne egpandawi te me karniru.
Ne egdiek-diek wey egbinteng-binteng kandan wey ware egpakapangabang kandan.
9 Egpanalu ka keet-etawan te Israil te me kuntere dan,
wey egguleen dan ka langun ne in-ehetan dan.
10 Ne migkahi ka Magbebaye ne Manama,
“Te sika ne timpu, egpangimatayan ku ka me kudde niyu,
wey egpandereetan ku ka me karwahi niyu ne egpangunturan niyu te pegpakiggira.
11 Egguhusen ku ka me siyudad niyu
wey eg-aminen ku te egguhus ka langun ne malig‑en ne me alad niyu ne batu.
12 Egdereetan ku ka me lambus niyu,
wey egpangaween ku ka me manenagne niyu.
13 Egguhusen ku ka me diyus-diyus niyu wey ka me pes-ek ne in-isip niyu ne dayuwan,
eyew kene kew e egpamakey te minsan nekey ne hinimu re te me belad niyu.
14 Egbaruten ku ka me sungkaleg ne larawan ni Asira
wey egguhusen ku ka me siyudad niyu.
15 Ne tenged te egmangebel-ebel ne langet ku,
igpaneem-neem ku ka peglegpad ku te me nasud ne ware migtuman keddi.”