2
Ka pegpaney-paney te Magbebaye te me talagpanubad
1-2 Ne migkahiyan degma te Amana ne Maresen ne Magbebaye ka me talagpanubad, “Na, seini ka igpaney-paney ku kaniyu: Ke kene kew eglinga-linga wey kene egdayan keddi, egdilusen ku sikaniyu lagkes ka langun ne panalangin niyu. Ne ka malehet, indilus kud e seini su ware niyu itahu te pusung niyu ka suhu ku kaniyu.
3 Eglegparan ku ka me kabuhalan niyu wey igpulit ku diye te ulaula niyu ka tei te ayam ne impanubad niyu, wey iglagkes ku sikaniyu igdegpak te tei te me ayam.
4 Puun due, egkanengnengan niyu ne tapey kud e sikaniyu panpanayi. Ke eglinga-linga kew te impaney-paney ku kaniyu, egpakapabulus ded ka kasabutan ku te me Libita.” Sika ka ingkahi te Amana ne Maresen ne Magbebaye.
5 “Diye te kasabutan ku kandan dengan, migsaaran ku sikandan te umul wey keupianan, wey imbehey ku kandan seeye eyew egtahuren a nikandan. Ne intahud a iya nikandan wey due pegkaaldek dan keddiey.
6 Impanulu dan ka malehet, ne kene ne sika se seyyup. Meupiya ka rilasyun dan keddi, wey mig-ugpe sikandan ne matareng. Ne imbulihan dan pad man‑e ka masulug ne etew eyew eg-inniyug e te sale.
7 Su iyan katungdanan te me talagpanubad ka pegpanulu te malehet ne katuenan meyitenged keddi te Magbebaye ne Manama. Keilangan ne diye te kandan egpepanulu ka keet-etawan, su sikandan iya ka me suluhuanen ku, te Amana ne Maresen ne Magbebaye.
8 “Piru sikaniyu se me talagpanubad, mig-engked kew te maheteng ne dalan. Ka pegpanulu niyu iyan de iya egpuunan ne nakasale ka masulug ne etew. Indereetan niyu ka kasabutan ne inggimu ku te me Libita.
9 Sikan naa ka egpeyilawan ku pad iya sikaniyu te langun ne matig-Israil tenged su ware niyu tumana ka igkeupii ku wey due inlapihan niyu te egpanulu.”
Ka pegsupak te keet-etawan te Israil
10 Sabeka re ka amey ta langun, ne iyan ka Manama ne miggimu kanta. Ke iling due, ne mania te egmaak-akaley ki wey ware ta tumana ka kasabutan ne inggimu te Manama diye te me kaap-apuan ta?
11 Ware tumana te me matig-Huda ka saad dan diye te Magbebaye ne Manama, wey sika ka egpuunan ne nangimu sikandan te mallindit kayi te Israil wey Hirusalim. Inlinditan dan ka timplu ne inggeyinawaan te Magbebaye ne Manama su migmangasawa ma ka me lukes te me malitan ne migsimba te me diyus-diyus.
12 Kenad perem eg-ileen te Magbebaye ne Manama ne sakup pad te keet-etawan din ka miggimu te iling due wey kenad perem sikandan egpakaambag te pegpanubad diye te Amana ne Maresen ne Magbebaye.
13 Ne minsan ke egsubiren niyu pad te me luwe niyu ka altar te Magbebaye ne Manama wey egpandalawit kew, kene din en iya igkeupii ka igpanubad niyu wey kene din e egdawaten.
14 Ne eg-inse kew ke mania te kene din egdawaten ka igpanubad niyu. Uya su nakanengneng sikandin ne ware niyud tumana ka insaad niyu dengan diye te me asawa niyu te peg-asawa niyu kandan te me bate-bate kew pad. Talagbulig kaniyu ka me asawa niyu ne migsaaran niyu, piru ware niyud tumana ka insaad niyu.
15 Mania, ware kew bes sabekaa te Manama te lawa wey te panisingan? Mania te inggimu rin seini? Inggimu rin seini eyew egpakaanak kew te malehet ne keet-etawan te Manama. Sikan naa, tantanuri niyu ne egkatuman niyu ka insaad niyu te me asawa niyu.
16 “Igkabelu ku ka egpakigsuwey te me asawa ran, su igkataweles ku ka me etew ne egleig-leig te me asawa ran,” kahi te Magbebaye, ka Manama te Israil. Purisu tanud-tanud kew ne egkatuman niyu ka insaad niyu te me asawa niyu.
Mahaan e ka aldew te peggukum
17 Napelaan e ka Magbebaye ne Manama ne egpammineg te me lalag niyu. Piru mig-inse kew, “Mania te napelaan e sikandin te impanlalag ney?” Uya su migkahi kew te hendue mule te ingkabennali red te Magbebaye ne Manama ka eggimu te mareet wey ingkeupii rin ded sikandan. Ne mig-inse kew pad man‑e, “Hendei naan e mule ka Manama ne eleg se peggukum?”