4
Ka aldew te Magbebaye ne Manama
1 Migkahi ka Amana ne Maresen ne Magbebaye, “Egginguma ka aldew ne egkasilaban iling te lahami ka langun ne me hambuhen wey ka me etew ne maddeet se hinimuwan. Egkengatutung sikandan wey warad iya egkasame.
2 Piru para kaniyu te migtahud keddi, egparibabew ka pegkamatareng ku wey due keupianan niyu. Egpekeiling seini te aldew ne egsile wey egpakalayag kaniyu. Egmanlihawang kew wey egpanletu-letu te kahale iling te me nati te baka ne impalihawang puun te kulungan.
3 Te aldew ne eggimuwen kud seini, egkatalu niyu ka me mareet se hinimuwan wey egpandiekan niyu sikandan iling te alinepung,” kahi te Amana ne Maresen ne Magbebaye.
4 “Tantanuri niyu ka impanulu kaniyu te suluhuanen ku ne si Muwisis. Imbehey ku kandin ka me balaud wey me suhu ku diye te Bubungan ne Sinay eyew igpatuman te keet-etawan te Israil.
5 “Piru te kene pad egginguma ka mabantug wey makaaldek-haldek ne aldew ku te Magbebaye ne Manama, egpeenduenen ku te kaniyu si prupita Ilyas.
6 Egmeg-ulien din ka meupiya ne rilasyun te me anak wey me amey. Emun ke kene, eggenduen a wey egdereetan ku ka inged niyu.”