3
Ka pegbalew-balew te alad te Hirusalim
1 Ne iyan migbalew-balew te Gumawan te Karniru si Iliyasib ne Labew ne Talagpanubad wey ka me duma rin ne talagpanubad. Te neimpusan dan e ka pegbalew-balew te me gumawan, inhalad dan e seini. Inhalad dan man‑e ka Matikang ne Baley te Sabeka ne Gatus, wey ka Matikang ne Baley ni Hananil.
2 Ne iyan migbalew-balew te alad ne sumpul dutu ka keet-etawan te Hiriku, wey iyan migbalew-balew te lein ne sumpul si Sakur ne anak ni Imri.
3 Ne iyan migbalew-balew te Gumawan te Isda ka me kabuhalan ni Hasina. Intangen dan ka me sungkaleg te lekeb, ka me lekeb, wey ka me balabag ne igpagul kayi.
4 Ne iyan mig-ayad-ayad te sumpul ne baad te alad si Mirimut ne anak ni Uriyas wey apu ni Hakus. Ne iyan mig-ayad-ayad te sumpul man‑e ne baad si Misulam ne anak ni Birikiyas wey apu ni Misisabil.
Ne iyan mig-ayad-ayad te sumpul man‑e ne baad si Saduk ne anak ni Baana.
5 Ne iyan mig-ayad-ayad te sumpul ne baad ka keet-etawan te Tikuwa. Piru ware himuwa te me talahuren ne etew te Tikuwa ka igpeyimu kandan te me pangulu ran te trabahu.
6 Ne iyan mig-ayad-ayad te Tapey ne Gumawan si Huyada ne anak ni Pasiya wey si Misulam ne anak ni Bisudiyas. Intangen dan ka me sungkaleg te lekeb, ka me lekeb, wey ka me balabag ne igpagul kayi.
7 Ne iyan mig-ayad-ayad migsinundul te sumpul ne baad te alad si Milatiyas ne matig-Gibyun, si Hadun ne matig-Mirunut, wey ka me lukes ne me matig-Gibyun wey me matig-Mispa. Ka seini ne me lungsud, immanduan te gubirnadur te prubinsya ne talipag te Weyig ne Iyupratis.
8 Ne iyan mig-ayad-ayad migsinundul kandan si Usil ne anak ni Harayas ne talagsayab te bulawan.
Mig-ayad-ayad migsinundul kandin si Hananiyas ne sabeka te me talaggimu te me peemut. Ne naay-ayaran dan ka alad te Hirusalim taman diye te egngaranan te Maluag ne Alad.
9 Ne iyan mig-ayad-ayad migsinundul kandan ka anak ni Hur ne si Ripayas ne pangulu te katenge ne distritu te Hirusalim.
10 Ne iyan mig-ayad-ayad migsinundul diye te egkatangkaan te baley rin si Hidayas ne anak ni Harumap.
Ne iyan mig-ayad-ayad migsinundul kandin si Hatus ne anak ni Hasabniyas.
11 Ne iyan mig-ayad-ayad migsinundul te lein ne baad wey te Matikang ne Baley ne Hilutuanan te Paan si Malkiyas ne anak ni Harim wey si Hasub ne anak ni Pahat-Muwab.
12 Ne iyan mig-ayad-ayad migsinundul si Salum ne anak ni Haluhis ne pangulu te katenge ne distritu te Hirusalim. Iyan migbulig kandin ka anak din ne me malitan.
13 Ne iyan mig-ayad-ayad te Gumawan te Napu si Hanun wey ka me mahinged te Sanuwa. Imbalbalawan dan seini wey intangen dan ka me sungkaleg te lekeb wey me balabag ne igpagul kayi. Nakaayad-ayad sikandan te me 440 ne mitrus ne alad taman te Gumawan te Basuraan.
14 Ne iyan mig-ayad-ayad te gumawan ne egngaranan te Basuraan si Malkiyas ne anak ni Rikab ne pangulu te distritu te Bit-Hakirim. Imbalbalawan din seini te eggimu wey intangen din ka me sungkaleg te lekeb, ka me lekeb, wey ka me balabag ne igpagul kayi.
15 Ne iyan mig-ayad-ayad te Gumawan te Sebseb ka anak ni Kulhusi ne si Salum ne pangulu te distritu te Mispa. Imbalbalawan din seini, in-atepan wey intangen din ka me sungkaleg te lekeb, ka me lekeb, wey ka me balabag ne igpagul kayi. Ne imbalbalawan din man‑e ka alad te linew ne egngaranan te Sila ne marani te pinamulaan te Hari, taman te haheran ne puun te siyudad ni Hari Dabid.
16 Ne iyan mig-ayad-ayad migsinundul kandin ka anak ni Asbuk ne si Nihimiyas ne pangulu te katenge ne distritu te Bitsur. In-ay-ayaran din ka egkatangkaan te inlebengan ki Dabid, taman te limuranan te weyig, wey te Baley te me Bahani.
17 Ne iyan mig-ayad-ayad migsinundul ka me Libita ne impanguluwan ni Rihum ne anak ni Bani.
Ne iyan mig-ayad-ayad migsinundul kandan si Hasabiyas ne pangulu te katenge ne distritu te Kila, te distritu rin.
18 Ne iyan mig-ayad-ayad migsinundul kandin ka me karumaan dan ne impanguluwan te anak ni Hinadad ne si Bibay ne pangulu te katenge ne distritu te Kila.
19 Ne iyan mig-ayad-ayad migsinundul si Isir ne anak ni Huswi ne pangulu te Mispa te lein ne baad ne egkatangkaan te tahuanan te me panganiban taman te pikungan te alad.
20 Ne iyan mig-ayad-ayad migsinundul si Baruk ne anak ni Sabay puun te pikungan te alad peendiye te gumawan te baley ni Iliyasib ne Labew ne Talagpanubad.
21 Ne iyan mig-ayad-ayad migsinundul ka anak ni Uriyas ne si Mirimut ne apu ni Hakus puun te gumawan te baley ni Iliyasib taman diye te tamanan te seini ne baley.
Ka me talagpanubad ne migbulig mig-ayad-ayad te alad
22 Ne due me talagpanubad ne migpuun te me distritu ne nakalingut te Hirusalim ne migbulig mig-ayad-ayad te alad.
23 Ne iyan mig-ayad-ayad migsinundul kandan si Binhamin wey si Hasub diye te egkatangkaan te baley ran.
Ne iyan mig-ayad-ayad migsinundul kandan diye te egkatangkaan te baley rin si Asariyas ne anak ni Maasiyas wey apu ni Ananiyas.
24 Ne iyan mig-ayad-ayad migsinundul kandin te lein ne baad si Binuy ne anak ni Hinadad. Puun te baley ni Asariyas taman te pikungan te alad ka in-ay-ayaran din.
25 Ne iyan mig-ayad-ayad migsinundul si Palal ne anak ni Usay. In-ay-ayaran din ka sumpul ne baad te alad; puun te egkatangkaan te pikungan te alad wey te matikang ne baley ne diye te ampew te palasyu ne marani te lama te ugpaan te talagbantey.
Ne iyan mig-ayad-ayad migsinundul kandin ka anak ni Parus ne si Pidayas
26 wey ka me suluhuanen te timplu ne mig-ugpe te Bubungan te Upil. Puun te egkatangkaan te gumawan ne egngaranan te Weyig ne diye te igsile wey diye te matikang ne baley ka in-ay-ayaran dan.
Ka me etew ne migbulig te peg-ayad-ayad te alad
27 Ne due nanginguma ne me matig-Tikuwa wey sikandan ka mig-ayad-ayad te lein ne baad. Puun te dakel wey matikang ne baley taman te alad te Upil ka in-ay-ayaran dan.
28 Ne iyan mig-ayad-ayad te gumawan ne egngaranan te Kudde ka me talagpanubad. Ne masi-ayad-ayad e sikandan te alad ne egkatangkaan te me baley ran.
29 Ne iyan mig-ayad-ayad migsinundul si Saduk ne anak ni Imir te alad ne egkatangkaan te baley rin.
Ne iyan mig-ayad-ayad migsinundul kandin te lein ne baad ka anak ni Sikaniyas ne si Simaya ne talagbantey te Gumawan te Igsile.
30 Ne migsinundul kandin mig-ayad-ayad te lein ne baad si Hananiyas ne anak ni Silimiyas wey si Hanun ne igkeen‑em ne anak ni Salap.
Ne migsinundul kandan si Misulam ne anak ni Birikiyas ne mig-ayad-ayad te alad ne egkatangkaan te baley rin.
31 Ne migsinundul kandin si Malkiyas ne sabeka ne mannayab te bulawan. Mig-ay-ayaran din ka alad taman te baley te suluhuanen diye te timplu wey te me nigusyanti ne egkatangkaan te Gumawan ne Libulunganan, wey taman te sinabeng ne impeuntud te pikungan te alad.
32 Ne iyan mig-ayad-ayad te katammanan ne baad te alad ka me talagdekdek te bulawan wey ka me nigusyanti. Puun te sinabeng ne diye te dibabew te pikungan wey te Gumawan te Karniru ka in-ay-ayaran dan.