28
Ka inaldew-aldew ne igmanubad
(Iks. 29:38-46)
1 Ne ingkahiyan te Magbebaye ne Manama si Muwisis,
2 “Kahii nu ka me kabuhalan ni Israil: ‘Keilangan ne egpanubad kew te egkakeen ne egtutungen wey ka lansi due ka igkeemuti te Magbebaye. Imanubad niyu sika te intahahe ne timpu.’
3 “Ne kahii nu man‑e sikandan te seini ka inaldew-aldew ne egtutungen ne igmanubad niyu diye te Magbebaye: daruwa ne lukesan ne nati te karniru ne tigsabeka ne leg‑un se kabuyahi wey ware nenabalbalangi.
4 Ipanubad niyu te maselem ka sabeka ne karniru, ne ka dangeb, ipanubad niyu te maapun.
5 Ne ka tagse sabeka kayi, egpatapikan te tigtatelu ne salmun ne harina ne amana ne meupiya ne linuyang te tatelu ne salmun ne mentika te ingkeles ne ulibu.
6 Sika ka inaaldew-aldew ne igmanubad ne egtutungen ne insuhu dengan kaniyu te Magbebaye diye te Bubungan ne Sinay. Igpanubad sika ne egtutungen, wey meemut ka lansi diye te Magbebaye ne Manama.
7 Ne ka tagse sabeka te sika ne igmanubad, egpatapikan man‑e te binu ne tigsenge-litru. Ne eg-itisen ka binu diye matulus ne inged isip halad para te Magbebaye.
8 Ne iling ded ka eggimuwen niyu te igkarangeb ne karniru ne igpanubad niyu te maapun. Patapiki niyu red man‑e seini te iling ded ne klasi te harina wey binu isip pegpahale te Magbebaye. Igmanubad sika ne egtutungen wey ka lansi due ka igkeemuti te Magbebaye.”
Ka igmanubad te Aldew te Peggimeley
9 “Ne seini ka egtutungen niyu ne igmanubad te Aldew te Peggimeley: daruwa ne lukesan ne nati te karniru ne tigsabeka ne leg‑un se kabuyahi wey ware nenabalbalangi. Ne patapiki niyu seini te binu wey daruwa ne kilu te meupiya ne klasi te harina ne linuyang te mentika.
10 Sika ka egtutungen ne igmanubad niyu te Aldew te Peggimeley, ware labet due ka inaldew-aldew ne igpanubad ne egtutungen wey te me halad ne binu.”
Ka igmanubad te an-anayan ne aldew te tagse bulan
11 “Ne seini ka egtutungen niyu ne igmanubad te tagse an-anayan ne aldew te bulan: daruwa ne turu ne nati te baka, sabeka ne lukesan ne karniru, wey pitu ne lukesan ne nati te karniru ne tigsabeka ne leg‑un se kabuyahi wey ware nenabalbalangi.
12 Ne ka sika ne igmanubad, patapiki niyu te meupiya ne klasi te harina ne linuyang te mentika. Ka tagse sabeka ne baka ne igpanubad, patapiki niyu te tigtatelu ne kilu, wey ka lukesan ne karniru patapiki niyu te daruwa ne kilu,
13 wey ka tagse sabeka te nati te karniru, patapiki niyu te tigsenge-kilu. Igmanubad sika ne egtutungen wey ka lansi due ka igkeemuti te Magbebaye.
14 Ne ka tagse sabeka te turu ne baka, patapiki niyu man‑e te binu ne tigdaruwa ne litru, wey ka lukesan ne karniru, patapiki niyu te senge-litru wey liware, wey ka tagse sabeka te nati te karniru, patapiki niyu te tigsenge-litru. Sika ka egtutungen niyu ne igmanubad tagse an-anayan ne aldew te bulan te intiru ne leg‑un.
15 Ne lagkes kew panubad te sabeka ne lukesan ne kambing isip igpalangesa ne ig-awe te sale, ware pad labet due ka inaldew-aldew ne igmanubad niyu.”
Ka me halad te Sahakeen te Paan ne Ware Patulin
(Lib. 23:5-14)
16 “Ne Sahakeen kew te Peglihad te Panalihan te igkasapulu wey hep‑at (14) ne aldew te an-anayan ne bulan.
17 Te igkasapulu wey lalimma (15) ne aldew, egbunsud ka Sahakeen te Paan ne Ware Patulin, taman te pitu ne aldew. Te sika se pitu ne aldew, kene kew keen te paan ne in-amutan te patulin.
18 Te an-anayan ne aldew te Sahakeen, libulung kew eyew te pegsimba te Magbebaye, wey kene kew trabahu te sika ne aldew.
19 Ne tutung kew te igmanubad niyu diye te Magbebaye: daruwa ne turu ne nati te baka, sabeka ne lukesan ne karniru, wey pitu ne lukesan ne nati te karniru ne tigsabeka ne leg‑un se kabuyahi wey ware nenabalbalangi.
20 Ne ka sika ne igmanubad, patapiki niyu te meupiya ne klasi te harina ne linuyang te mentika. Ka tagse sabeka te turu ne nati te baka, patapiki niyu te tigtatelu ne kilu, wey ka lukesan ne karniru, patapiki niyu te daruwa ne kilu,
21 wey ka tagse sabeka te pitu ne nati te karniru, patapiki niyu te tigsenge-kilu.
22 Ne lagkes kew man‑e panubad te sabeka ne lukesan ne kambing isip igpalangesa ne ig-awe te sale.
23 Piru ware pad labet due ka igmanubad niyu tagse maselem.
24 Te iling ded ne paahi, tagse aldew te pitu ne aldew, panubad kew te egkakeen ne egtutungen wey ka lansi due ka igkeemuti te Magbebaye. Imanubad niyu sika piru ware labet due ka inaldew-aldew ne egtutungen ne igmanubad niyu.
25 Te igkapitu ne aldew, libulung kew e man‑e eyew te pegsimba te Magbebaye, wey kene kew trabahu te sika ne aldew.”
Ka igmanubad te Sahakeen te Pegsawit
(Lib. 23:15-22)
26 “Te timpu ne eghalad kew diye te Magbebaye te hun‑a ne behas te trigu te an-anayan ne aldew te Sahakeen te Pegsawit, libulung kew man‑e eyew te pegsimba te Magbebaye, wey kene kew trabahu te sika ne aldew.
27 Ne tutung kew te igpanubad ne daruwa ne turu ne nati te baka, sabeka ne lukesan ne karniru, wey pitu ne lukesan ne nati te karniru ne tigsabeka ne leg‑un se kabuyahi. Ne ka lansi due ka igkeemuti te Magbebaye.
28 Ne ka sika ne igmanubad, patapiki niyu te meupiya ne klasi te harina ne linuyang te mentika. Ka tagse sabeka te turu ne nati te baka, patapiki niyu te tigtatelu ne kilu, ne ka sabeka ne lukesan ne karniru, patapiki niyu te daruwa ne kilu,
29 wey ka tagse sabeka te pitu ne lukesan ne nati te karniru, patapiki niyu te tigsenge-kilu.
30 Ne lagkes kew man‑e panubad te sabeka ne lukesan ne kambing isip igpalangesa ne ig-awe te sale.
31 Patapiki niyu ka kambing ne igpanubad niyu te ighalad ne binu wey egkakeen ne egpuun te egketuen ne pinamula, ware pad labet due ka inaldew-aldew ne igmanubad niyu. Ne keilangan ne ware nenabalbalangi ka igmanubad niyu ne me ayam.”