32
Ka me tribu diye te talipag te Hurdan
(Diy. 3:12-22)
1 Masulug amana ka me ayam te me kabuhalan ni Rubin wey ni Gad. Purisu te pegkakita ran ne meupiya ne eg-uyahan te me ayam ka tane te Hasir wey Gilyad,
2 migparani sikandan ki Muwisis, ki Iliyasar, wey te me pangulu te me kabuhalan ni Israil, wey migkahi sikandan,
3 “Ka Atarut, ka Dibun, ka Hasir, ka Nimra, ka Hisbun, ka Iliyali, ka Sibam, ka Nibu, wey ka Biyun,
4 iyan ka me inged ne indereetan te Magbebaye pinaahi te langun ne kabuhalan ni Israil. Ne ka seini ne me inged, meupiya ne eg-uyahan te me ayam, wey nakita niyu ne masulug amana ka me ayam ney.
5 Sikan naa, emun ke igkahale key nikaniyu, ibehey niyu ubag kanami ka seini ne tane isip baad ney. Kene key e nikaniyu palapasa te Hurdan.”
6 Piru ingkahiyan sikandan ni Muwisis, “Iyan niyu naa igkeupii ne eg-uugpe kew re taheed te egmangendiye te giraanan ka me karumaan niyu ne me kabuhalan ni Israil?
7 Eg-awaan niyu re te kabagget ka me kabuhalan ni Israil ne eggendiye te tane ne igbehey kandan te Magbebaye.
8 Sika iya degma ka inggimu te me kabuybuyahan niyu dengan te timpu ne insuhu ku sikandan puun te Kadis-Barniya eyew te peg-iipat te seeye ne tane.
9 Te pegginguma ran te bangalug ne egngaranan te Iskul, wey te nakita ran e ka tane ne igbehey kandan te Magbebaye, nasi dan e awei te kabagget ka me kabuhalan ni Israil eyew kenad eggendiye te seeye ne tane.
10 Ne tenged dutu, nalanglangetan kandan ka Magbebaye wey migpahunlibet te migkahi,
11 ‘Tenged te kene ne mapahetpet ka pegtuman dan keddi, langun te seeye se daruwa ne pulu (20) se idad wey me buyag-buyag e ne inluwas ku puun te Ihiptu, kene egpakakita te tane ne insaad ku ki Abraham, ki Isaak, wey ki Hakub.
12 Angin e mule ki Kalib ne anak ni Hipuni ne matig-Kina, wey ki Huswi ne anak ni Nun, su me mapahetpet ma mule ka pegtuman dan keddi.’
13 Nalanglangetan ka Magbebaye te me kabuhalan ni Israil, purisu inlaag-laag din sikandan diye te disirtu taman te hep‑at ne pulu (40) ne leg‑un, taman te naamin e migpatey ka me kabuhalan ne nakasale kandin.
14 Ne kuntee, sikaniyu se me kabuhalan te me makasesale, egsubal kew e man‑e eggimu iling te inggimu te me kabuybuyahan niyu. Egtimulan niyu re ka langet te Magbebaye te me kabuhalan ni Israil.
15 Emun ke eg-inniyug kew te Magbebaye, egbalaharen din e degma ka me kabuhalan ni Israil kayi te disirtu, wey sikaniyu ka egpuunan te karereetan dan.”
16 Ne migkahi sikandan ki Muwisis, “Egmangealad key re kayi para te me ayam ney, wey egmasasindeg key degma te me lungsud ne egmeugpaan ney te me asawa wey me anak ney.
17 Piru andam key degma ne eggun‑a te me karumaan ney ne me kabuhalan ni Israil eyew egpakiggira. Egbulihan ney sikandan taman te egpakaangken sikandan te tane dan. Ne taheed te egpakiggira key, igmanggaat ney re ka asawa wey me anak ney te me lungsud ne nalingutan te malig‑en, matikang, wey makepal ne alad ne batu eyew kene sikandan egkarandaniyan te me mahinged te seini ne tane.
18 Ne kene key egmanguli taman te egpakarawat ka langun ne kabuhalan ni Israil te egkapanunud dan ne tane.
19 Ne kene key e degma egbuyu te baad ney te tane duma kandan diye te talipag te Hurdan su iyan ney man e baad ka tane kayi te talipag dapit te igsile.”
20 Purisu ingkahiyan sikandan ni Muwisis, “Ke malahet ma iya ne egduma kew te egpakiggira para te Magbebaye,
21 wey egmanlapas te Hurdan ka langun ne sundalu niyu taman te egkaddeldel e te Magbebaye ka me kuntere din,
22 wey egkaahew e egkalegleheti ka tane, kaayun e ne eglibed kew kayi su natuman niyud ma ka himu niyu para te Magbebaye wey te me karumaan niyu ne me kabuhalan ni Israil. Ne egkaangken niyud ka seini ne tane diye te tangkaan te Magbebaye.
23 Piru ke kene niyu sika eggimuwen, egpakasale kew te Magbebaye, wey kene kew iya egpakaalihu te legpad tenged te me sale niyu.
24 Ne uya, masasindeg kew te me lungsud para te me asawa wey me anak niyu, wey mangealad kew para te me ayam niyu, piru pegkeimpus due, tumana niyu ka insaad niyu.”
25 Ne migtabak ka me kabuhalan ni Rubin wey ni Gad, “Egtumanen ney ka me suhu nu kanami ahalen.
26 Igmanggaat ney re kayi te me lungsud te Gilyad ka me asawa wey me anak ney, wey ka me ayam ney.
27 Piru sikanami se me suluhuanen nu ne nasangkap te me panganiban te egpakiggira, egmanlapas key te Hurdan eyew egpakiggira, sumale te suhu nu.”
28 Purisu insuhu ni Muwisis si Iliyasar ne talagpanubad, si Huswi ne anak ni Nun, wey ka me pangulu te me pamilya te me tribu te Israil.
29 Migkahi sikandin, “Emun ke egmanlapas te Hurdan ka me kabuhalan ni Rubin wey ni Gad ne nasangkap te panganiban te egpakiggira, wey emun ke egkaahew niyud ka tane, ibehey niyu kandan ka tane te Gilyad.
30 Piru ke kene sikandan egduma kaniyu te eglapas te Hurdan eyew egpakiggira, keilangan ne diye sikandan te Kanaan eg-angken te tane ne baad dan duma kaniyu.”
31 Ne migkahi ka me kabuhalan ni Rubin wey ni Gad, “Ahalen, egtumanen ney ka ingkahi te Magbebaye.
32 Egmanlapas key iya te Hurdan se nasangkap te panganiban te pegpakiggira, eyew eg-apil te egpakiggira diye te Kanaan, piru seini ne tane te talipag te Hurdan ka egbuyuen ney isip baad ney.”
33 Purisu imbehey ni Muwisis diye te me kabuhalan ni Rubin, wey ni Gad, wey te katenge te kabuhalan ni Manasis ne anak ni Husi ka migharian ni Sihun ne Hari te me Amurihanen wey ka migharian ni Ug ne Hari te Basan. Imbehey ni Muwisis ka intiru ne tane lagkes ka me lungsud, wey ka me inged ne nakalingut diye.
34 Ne impasasindeg te me kabuhalan ni Gad ka me siyudad te Dibun, te Atarut, te Aruwir,
35 te Istrutsupan, te Hasir, te Hibaa,
36 te Bit-Nimra, wey te Bit-Haran. Ka seini ne me siyudad, inlingutan dan te malig‑en, matikang, wey makepal ne me alad ne batu. Ne mig-ealad man‑e sikandan para te me ayam dan.
37 Ne impasasindeg te me kabuhalan ni Rubin ka me siyudad te Hisbun, te Iliyali, te Kiryataim,
38 lagkes ka me siyudad ne egngaranan dengan te Nibu, Baal-Miyun, wey Sibma. Immanliwanan dan ka me ngaran te duma ne lungsud ne immasasindeg dan.
39 Ne inlusuran te me kabuhalan ni Makir ne anak ni Manasis ka Gilyad wey naahew ran seeye, wey immandeldel ran ka me Amurihanen ne nangugpe diye.
40 Purisu imbehey ni Muwisis ka Gilyad diye te me kabuhalan ni Makir ne anak ni Manasis wey diyad sikandan nangugpe.
41 Ne impanlusuran ni Hair ne anak ded man‑e ni Manasis ka me bariyu te Gilyad wey nenaahew rin seini, wey ingngaranan din e te “Me Bariyu ni Hair.”
42 Ne impanlusuran degma te etew ne egngaran ki Nuba ka lungsud te Kinat wey ka me bariyu ne nakalingut diye, wey ingngaranan din e seeye te “Nuba” isip pegpabantug te ngaran din.