11
1 Igkeepes te Magbebaye ne Manama
ka me etew ne eggamit te kene ne eleg ne timbangan,
piru egkahale sikandin te eleg ne pegtimbang.
2 Egkeyilawan ka etew ne hambuhen,
piru egkeyimu ne matagseb ka mapariralemen.
3 Ka keupiya te matareng ne etew, egpakapanulu kandin te eleg ne eggimuwen din.
Piru ka pegpapitew-pitew re te etew ne kene egkasalihan, egpakarereet kandin.
4 Kene egpakaluwas ka karatuan te etew
ke igpeyingume e te Manama ka kamatayen,
piru egpakaluwas puun te kamatayen ka pegkamatareng.
5 Egpakameupiya te peg-ugpe ka pegkamatareng,
piru egpakarereet te etew ka mareet ne hinimuwan din.
6 Egpakaluwas te etew ne matareng ka pegkamatareng,
piru egpakarereet kandin ka eyam din.
7 Ke egpatey e ka etew ne mareet,
egkaawe e degma ka pegpallateng din,
wey warad karuan te langun ne in-iman-iman din ne karatuan.
8 Egluwasen te Manama ka etew ne matareng,
piru egpakasalerep mule te kasamuk ka etew ne mareet.
9 Egpakarereet te duma ka me lalag te me etew ne ware mig-ila te Manama,
piru ka katagseb te matareng ne etew, egpakaluwas kandin.
10 Egkengahale ka me mahinged te sabeka ne siyudad
ke egmeupiya ka peg-ugpe te me matareng ne etew,
wey egkengahale degma sikandan ke egpatey ka maddeet ne etew.
11 Egmatubung ka siyudad pinaahi te me panalangin te Manama te me matareng ne etew,
piru egkareetan seini tenged te me lalag te maddeet ne me etew.
12 Egpanampele te duma ka ware salabutan,
piru egpeeneng-eneng de ka matagseb.
13 Ka be-baan, egpangguhud te iggeles de perem,
piru ka matareng ne etew kene egpangawang egpangguhud.
14 Egkahuhus ka sabeka ne nasud ke ware matagseb ne egpangulu,
piru egmalig‑en seini ke masulug ka me talagtambag.
15 Egpekegsendit ka ke egsaad ka ne egbulig te sabeka ne lapu;
meupiya pad mule ke kene nu sika eggimuwen.
16 Egtahuren ka meupiya ne malitan,
piru karatuan de ka egkaangey te maddeet ne me etew.
17 Ke meupiya ka te duma,
ingkeyid‑u nu degma ka pegkeetew nu,
piru ke mabulut ka,
indereetan nu re ka pegkeetew nu.
18 Ka malehet, ware iya egkahaani te etew ne mareet,
piru ka matareng, duen iya dasag ne egkarawat din.
19 Egkeuyag ka etew ne mapahetpet ne eggimu te matareng,
piru egpatey ka eggimu te mareet.
20 Egkeepes ka Magbebaye te seeye se iyan de egsumsumanen se mareet
piru egkahale mule sikandin te seeye se eggimu te matareng.
21 Klaru iya ne eglegparan ka maddeet ne me etew,
piru egluwasen mule ka me matareng.
22 Ka mateles ne malitan ne ware katuenan te peg-alam,
egpekeiling de te bulawan ne sising ne intangen diye te irung te babuy.
23 Meupiya se egpangkusan te igkeupii te matareng ne etew,
piru karereetan ka egpangkusan te egpallatengen te maddeet ne me etew.
24 Due me etew ne matumpis
piru egkanasnasian de iya egmeyaman,
due degma me leheren
piru nasi de iya egkaayut-ut.
25 Egmatubung ka etew ne matumpis,
wey egbulihan degma ka etew ne mabulig-bulig te duma.
26 Eg-id-iranen te me etew ka eggeeles te egkakeen
piru egderayanen dan mule seeye se egpamelegye.
27 Ka etew ne egpakannekal ne egpamitew te meupiya, egpakaangken te keupianan,
piru ka etew ne egpamitew te samuk, egpakasalerep iya te samuk.
28 Egkeyid‑uwan ka etew ne egsalig te karatuan din, iling te egkalanes ne hilamunen,
piru egmatubung mule ka etew ne matareng
iling te meilem-ilem ne pinamula.
29 Ka etew ne eg-uyan te samuk te pamilya rin
ware egkapanunud ne karatuan.
Ne ka ware gulehud
egkeyimu ne suluhuanen te matagseb.
30 Egpakabehey te umul ka pegkamatareng
piru egpakarereet ka keungelan.
31 Egdasahan iya ka me matareng kayi te kalibutan,
wey eglegparan iya degma ka me makasesale.