19
1 Meupiya pad ka egkaayu-ayu ne egkasalihan,
du te etew ne meyaman piru ubaten.
2 Ware karuan te kabagget te etew ke ware katuenan din.
Ka etew ne egkaana-ana, nasi egkaseyyup.
3 Due me etew ne iyan ded nareetan te keungelan dan,
piru iyan dan egsenditan ka Manama.
4 Ka me meyaman, layun de egpakakita te iyam ne alukuy,
piru ka egkengaayu-ayu eg-eengkeran nasi te me alukuy ran.
5 Ka ubaten ne tigpamalehet, egparusaan
wey kene iya sikandin egpakaawe.
6 Masulug ka egkeupian ne egpakapahale te matumpis ne etew,
wey egkeupian ne egpangalukuy te seeye se egpakabulig kandan.
7 Ka etew ne egkaayu-ayu eg-eehetan te me karumaan din
hutuk naan pad iya ne eg-eengkeran sikandin te me alukuy rin.
Minsan egmemenu sikandin ka egpangalukuy
piru egkaruruhu de iya sikandin.
8 Ka etew ne miggeyinawa te pegkeetew rin,
egpakannekal ne egpakaangken te katagseb taman te egkeyimu rin;
ka etew ne due natuenan, due keupianan.
9 Ka ubaten ne tigpamalehet, egparusaan;
egkareetan iya ka minsan hentew ne eg-uubat.
10 Ka ungel,
kene ne eleg ne eg-ugpe ne matubung,
wey ka me suluhuanen,
kene ne eleg ne egmandu te me ahalen.
11 Ka etew ne meupiya se salabutan,
egpakatigkel te pegkeetew rin.
Ne emun ke due egpakasale kandin,
kene din seini eglinglingeen.
12 Ka langet te Hari, egpekeiling te pegginihel te liyun,
piru ka himenew rin, egpekeiling te demmug te me hilamunen.
13 Ka anak ne ungel, egpakarereet te amey rin.
Ka malitan ne apulen, egpekeiling te uran ne egtapek te aldew ka egpanpanihis.
14 Egpakapanunud ka etew te baley wey seleppi
puun te amey wey iney rin,
piru ka Manama re ka egpakabehey kandin te matagseb ne asawa.
15 Ka pehulen ne etew wey egliplipereng de, eggutasan iya.
16 Ka etew ne egtuman te me suhu te Manama, egmalayat se umul,
piru ka kene egtuman, mahaan de egpatey.
17 Ke migbehey ka te egkaayu-ayu,
iling de te migpasambey ka te Manama
wey egbayaran ka iya degma nikandin.
18 Panulua nu ka me anak nu te me bate pad sikandan
wey mahaan pad sikandan egpakasabut,
su ke kene nu sikandan egpanuluen, migbulig ke re ne egdereet te pegkeetew ran.
19 Balahara nu ne eglegparan ka etew ne mahaan egkabelu,
su ke egbulihan nu sikandin
egliberan din ded man‑e ka inggimu rin
wey egpabulig ded man‑e sikandin keykew.
20 Pammineha nu ka me panulu
wey tantanuri nu ka me paney-paney,
eyew egmatagseb ka keureme.
21 Ka etew ka egplanu te minsan nekey,
piru ka igkeupii te Manama ka egkatuman.
22 Igkabennali ka etew ne matinumanen;
meupiya pad ka egkaayu-ayu ne etew du te me ubaten.
23 Tahura nu wey kaaldeki ka Magbebaye ne Manama
eyew egmalayat ka umul nu,
wey egpakapariyu ka te karereetan.
24 Due me etew ne me pehulen naan de iya
su minsan ka pegsungit te egkeenen dan, kene dan egkeyimu.
25 Ke egparusaan ka lemeten,
egkapanulu ka ware salabutan;
ke egpanuluen ka due salabutan, egmatagseb sikandin.
26 Egpekeyilew ka anak ne egdeeg-deeg te amey rin
wey egdeldel te iney rin.
27 Anak, ke kene ka egpammineg te me panulu,
egkataman ne egpakasuwey kad te impanulu keykew.
28 Ka ubaten ne tigpamalehet, migbaleybaley te eleg ne peggukum;
ka mareet ne himu, egpekeiling te keenen ne amana igkeupii te maddeet ne etew.
29 Eglegparan iya ka me etew ne egbaley-baley te duma,
wey egpanggumian ka egkengeungel.