27
1 Kene ka peggasal meyitenged te keureme
su ware ka nakataha ke nekey ka egkeyitabu te seup ne aldew.
2 Balahad e ke iyan egdeyrey keykew ka duma ne etew wey ke lapu naa,
wey kene ka uney-uney deyrey te pegkeetew nu.
3 Mabehat ka batu wey ka pantad,
piru subla pad ne mabehat ka samuk ne egpuun te ungel ne etew.
4 Ka etew ne egkabelu, amana ne bubuluti wey egpakarereet,
piru subla pad ne mabulut ka etew ne egpangalikud.
5 Meupiya pad ne egsaparan nu ka sabeka ne etew
du te egkahiyan nu te inggeyinawaan nu sikandin
piru egbalaharen nu re ka mareet ne batasan din.
6 Masakit ka pegsapad te sabeka ne alukuy piru egkasalihan mule.
Piru ka peggarek te kuntere, kene egkasalihan.
7 Ka etew ne nabulung e,
kenad e egkeupian ne egkeen minsan te teneb,
piru ka etew ne eggutasan,
egmananam diye te kandin minsan pad ka mapeit ne egkakeen.
8 Ka etew ne mariyu te ugpaan din
egpekeiling te bayaku ne mariyu te salag din.
9 Egpakapahale keykew ka lana wey ka peemut,
iling te malehet ne tambag te amana nu ne alukuy.
10 Kene nu kalingawi ka me alukuy nu wey ke alukuy naa te amey nu.
Emun ke due keyirapan nu, kenad keilangan ne egpangananey ke pad te karumaan nu ne diye te mariyu,
su iyan e egpakabulig keykew ka marani ne sumbaley nu.
11 Anak, keilangan ne egmatagseb ka su eyew egkahala a degma,
wey eyew due igkatabak ku te minsan hentew ne eglemet keddi.
12 Ka matagseb ne etew, egpakakita te egginguma ne karereetan,
purisu tapey e mule sikandin egpakapanalliya.
Piru ka ware aperu,
egsahap iya mule, wey egkabaybayaran.
13 Emun ke due sabeka ne etew ne egsaad
ne sikandin ka egbayad keykew te utang te lapu,
buyui nu sikandin te kumbale ne iggerentiya,
eyew egbayad iya sikandin.
14 Emun ke egbalbalukan ka te maselem pad
ka eg-al-alumama te sumbaley nu,
egpekeiling de te indilus nu sikandin.
15 Ka malitan ne apulen, egpekeiling te uran ne egtapek te aldew ka eglugsu.
16 Ne kene nu sikandin egkasaparan
iling te kalamag ne kene nu egkabalabahan
wey te lana ne kene nu egkahen-genan.
17 Ka etew ne egpakaangken te katuenan puun te duma rin,
egpekeiling te putew ne egmahalang ke egpekegkahis.
18 Emun ke egtangguwen nu ka kayu ne iggira,
egpakakeen ka te behas kayi;
emun ke egtangguwen nu ka ahalen nu,
egbantuhen ka nikandin.
19 Iling te ulaula nu ne egkakita nu ke egpantew ka te weyig,
egkakita degma ka suman-suman nu pinaahi te batasan nu.
20 Ka igkeupii te etew, kene iya egkataman,
iling ded te kamatayen
wey lebenganan ne kene egkataman.
21 Ka bulawan wey ka pelata, eggeraman eglenaya pinaahi te hapuy,
wey ka etew degma, eggeraman pinaahi te me pegdeyrey kandin.
22 Minsan egmenuwen nu te egparusa ka ungel ne etew,
kene iya egkaawe ka keungelan din.
23 Ay-ayari nu te egtanggu ka me ayam nu,
24 su ka karatuan kene egkaluhey. Ne minsan ka peghari te langun ne kabuhalan, kene degma egkaluhey.
25 Emun ke egkaamin e ka kumpay, egpanubul red man‑e seini, wey te sasangan pad seini egpanubul, egpanlaglag kad e man‑e te me hilamunen diye te me bubungan eyew due egkakeen te me ayam nu.
26 Egpekeyimu ka te me kumbale puun te laplap te me karniru, wey egpakabebeli ka te tane puun te halin te me kambing nu.
27 Ne egpakakuwa ka degma te dakel ne gatas te me kambing nu para te pamilya nu, wey te me suluhuanen nu ne me malitan.