30
Ka me lalahen ni Agur
1 Seini ka immanlalag ni Agur ne anak ni Haki ne matig-Masa. Inlalag din seini diye ki Itiil wey ki Ukal. Migkahi sikandin:
2 “Te langun ne etew, sikeddi ka subla ne ungel
su ka suman-suman ku, kene ne iling te suman-suman te etew.
3 Wara ad iya migbebasbas eyew egmatagseb
wey ware degma kalintahaan ku meyitenged te Magbebaye ne Manama.
4 Angin e te Manama, hentew naa ka egpekeendiye te langit wey nakapamaneug de man‑e?
Duen naan e etew ne nakahen-gen te kalamag?
Duen naan e etew ne nakabubugsung te weyig te kumbale din?
Hentew naa ka migtahu te eletanan te kalibutan?
Ke due, hentew ka ngaran din, wey ka me ngaran te me anak din?
Kema ke nakanengneng kew iya?
5 “Egtumanen iya te Magbebaye ka me saad din. Egpekeiling sikandin te kalasag te seeye se eg-aput kandin.
6 Kene nu timuli ka me lalag din su kema ke egsaparan ka nikandin, wey igpanengneng din ne ubaten ka.”
Ka duma pad ne me lalahen
7 Magbebaye, due ubag daruwa ne egbuyuen ku keykew. Ibehey nu naa ubag seini te kene e pad egpatey.
8 An-anayan, bulihi a ne kena a egpekeuubat. Igkarangeb, kena a himuwa ne meyaman wey ke egkaayu-ayu naa, alahaa nu re ka egkakeen ne keilangan ku.
9 Su emun ke meyaman a, kema ke kene kud sikeykew egkeilanganen; ne emun ke egkaayu-ayu a man‑e, kema ke egpakapanakew a wey egkapeyilawan ku ka matulus ne ngaran nu.
10 Kene nu bayungi ka suluhuanen diye te tangkaan te ahalen din, su ke ma ke egdilusen ka nikandin wey eg-antus ka.
11 Due me anak ne kene egtahud te amey wey iney ran, wey egpekeyimu pad iya man‑e ne egdilus kandan.
12 Due me etew ne migsuman-suman ne malinis sikandan, kunaleg te malindit bes ka pegkeetew ran.
13 Due me etew ne subla ne me hambuhen, wey kenad sikandan egkateu ne egsil-ap te duma ran.
14 Due me etew ne subla ne egleig-leig te egkengaayu-ayu wey te ware egkeyimu iling te kampilan ne egdereet. Egkengeuyag sikandan pinaahi te sika ne hinimuwan dan.
15 Ka etew ne leheren, egpekeiling te limatek ne due daruwa ne anak ne layun de egkahi, “Behayi a! Behayi a!”
Due hep‑at ne kene egkeuralan:
16 ka inged te me minatey,
ka malitan ne kene egpakaanak,
ka tane ne keilangan te weyig,
wey ka hapuy ne kene egkataman.
17 Emun ke egdali-dian nu wey ke egsupaken nu ka amey wey iney nu, meupiya pad ke igpatuktuk te uwak ka mata nu, wey igpakeen te me banug ka lawa nu.
18 Due hep‑at ne igkeinu-inu ku wey kene ku egkasabut:
19 Mania te egpakalayang ka banug diye te aw-awangan,
mania te egpakarul‑ug ka uled diye te me batuwen,
mania te eg-antew ka barku diye te dahat,
wey mania te egpekeg-alig ka lukes wey malitan?
20 Ne iling kayi ka eggimuwen te malitan ne egpalibug-libug: emun ke egkalibuhan e sikandin, egkahi e sikandin, “Ware mareet ne neyimu ku.”
21 Due hep‑at ne kene egkarawat te me etew te kalibutan:
22 ka uripen ne egkeyimu ne Hari,
ka ungel ne dakel se egkakeen,
23 ka bubuluti ne malitan ne egpakaasawa red,
wey ka uripen ne malitan ne egpakasubal egpakaasawa te ahalen din ne malitan.
24 Due hep‑at ne klasi te dereisek ne mananap kayi te kalibutan piru amana ne matagseb:
25 ka me iteng, minsan kene sikandan ne mannekal, piru egmanlilimud sikandan te egkakeen dan te timpu te meinit;
26 ka me mananap ne egngaranan te kunihu, minsan kene sikandan ne mannekal, piru diye sikandan migpangugpe te batuwen;
27 ka me talangas, minsan ware Hari dan, piru egkasabeka iya sikandan ka egluyud;
28 ka me tektek, ne egkarakep nu re te belad nu, piru egkakita nu sikandan diye te me palasyu te me Hari.
29 Due hep‑at ne meupiya ne egpitawen ke egpangipanew:
30 ka liyun ne ware igkaaldek wey subla ne manekal te langun ne mananap;
31 ka lumansad ne manuk, ka lukesan ne kambing,
wey ka Hari ne egpangulu te me sundalu rin.
32 Emun ke egkeungel kad e ka eggelebek egpaambug wey egpamalanu te mareet, ipeeneng-eneng nud e sika!
33 Emun ke eggelebekan nu te egkulibew ka gatas, egkehal iya sika; ke egsumbahen nu ka irung te etew, egpakalangesa iya sika; ke eglelalis ka, egpakakita ka iya te samuk.