103
Ka geyinawa te Manama
Ka ulahingen ni Dabid.
1 Dayana nu ka Magbebaye, pusung ku;
intiru ne pegkeetew ku, dayana nu ka matulus ne ngaran din.
2 Dayana nu ka Magbebaye, pusung ku,
wey kene nu kalingawi ka langun ne keupiya rin.
3 Egpasaylu sikandin te langun ne me sale nu,
wey egbawian din ka langun ne dalu nu.
4 Inluwas ka nikandin puun te kamatayen,
wey impabayangan ka nikandin te geyinawa rin ne kene egkabalbalawan wey te keyid‑u rin.
5 Innibulung ka nikandin te langun ne me meupiya,
su eyew kene ka egkabuyag wey egmanekal ke pad iling te kulahu.
6 Miglapihan te Magbebaye te miggukum ka egkaleig-leig,
wey inggukuman din sikandan te eleg ne peggukum.
7 Impanengneng din diye te ki Muwisis ka me pamaahi rin,
wey impanengneng din diye te langun ne etew te Israil ka me himu rin.
8 Hiid‑uwen ka Magbebaye wey hiimenawen;
mananey egkabelu wey dakel amana ka geyinawa ne kene egkabalbalawan.
9 Kene sikandin layun egsapad,
wey kene egpabulus-bulus ka langet din.
10 Kene ki nikandin eglegparan sumale te neyimu ta ne me sale,
wey ware ki nikandin duseyi te neyimu ta ne mareet.
11 Su egpekeiling te kariyuan te langit wey te tane,
ka dakel ne geyinawa rin ne kene egkabalbalawan te seeye se due pegkaaldek kandin.
12 Ne egpekeiling degma te kariyuan te igsile wey te iglineb,
ka kariyuan te me sale ne impariyu din puun kanta.
13 Ka hid‑u te Manama diye te me etew ne due pegkaaldek kandin,
egpekeiling te hid‑u te amey diye te me anak din.
14 Su nakanengneng sikandin ke immenu ki te eggimu;
nakasuman-suman sikandin ne alinepung ki re iya.
15 Ka etew, egpekeiling de te hilamunen ka umul rin;
migtubu sikandin iling te me bulak diye te mabbenes.
16 Inggiyup seini te kalamag wey miglayap e,
ne naawe e seini wey warad e nakita.
17 Piru ka geyinawa te Magbebaye ne kene egkabalbalawan,
kene egkaawe te ware egkatamanan te seeye se due pegkaaldek kandin.
Ne egpabulus ka katareng din te langun ne me kabuhalan
18 ne migtuman te me Balaud din,
wey migtanud-tanud te me suhu din.
19 Intahu te Magbebaye ka trunu rin diye te langit,
wey sikandin ka mighari te langun.
20 Dayana niyu ka Magbebaye, sikaniyu se me panalihan,
sikaniyu se maddesen ne iyan eg-uyan te planu rin,
wey migtuman te me suhu din.
21 Dayana niyu ka Magbebaye, sikaniyu se me sundalu te me panalihan,
ne migpamakey kandin wey miggimu te igkeupii rin.
22 Dayana niyu ka Magbebaye, sikaniyu se langun ne inggimu rin,
te langun ne inged ne migmanduan din.
Dayana nu ka Magbebaye, pusung ku.