11
Ka pegsalig te Manama
Ka ulahingen ni Dabid para te pangulu te mangngulahing.
1 Diya a eg-aput te Magbebaye ne Manama.
Purisu mania te egkahi ka me etew,
“Layang ka diye te me bubungan iling te bayaku,
2 su pitew ke ma, imbengat e te me etew ne mareet se hinimuwan ka me pane dan.
In-ayun‑ayun dan e ka me tunud dan.
Diye te marusilem, imbekas dan e ka me pane dan diye te maheteng.
3 Nekey naan pad ka egkeyimu te matareng,
ke nahuhus e ka keupianan te kalibutan?”
4 Diye mig-ugpe ka Magbebaye te timplu rin.
Diye te langit ka trunu rin.
In-ugsi-ugsi din paay-ayari ka keet-etawan,
wey egkiteen din sikandan.
5 In-ugsi-ugsi din ka maheteng wey ka mareet,
wey igkeepes din ka mareet wey ka mabbulut.
6 Egpeuranan din perem te migbebaha ne hapuy wey te batu ne egkalegleg ne egngaranan te asupri ka me etew ne mareet se hinimuwan,
wey egdusaan din sikandan te iiniti ne kalamag.
7 Su matareng ka Magbebaye ne Manama,
wey igkeupii rin ka eleg ne peggukum.
Purisu egpakaheram te keupiya rin seeye se mig-ugpe ne maheteng.