114
Ka ulahingen te kaluwasan
1 Te timpu ne mig-awe ka me kabuhalan ni Israil te Ihiptu,
sika ka peg-engked te me kabuhalan ni Hakub te me etew ne kene ne iling dan se linalahan.
2 Neyimu e ka Huda ne ugpaanan te Manama,
ne sikandin e ka kamuney te Israil.
3 Nakakita ka dahat wey migpariyu,
ne mig-isues ka weyig te Hurdan.
4 Migletu-letu iling te kambing ka me bubungan,
ne nekeiling e te me karniru ne mig-um-umbetut ka me tuhal.
5 He Dahat, namenu kaa, mania te migpariyu ka?
He Hurdan, mania degma te mig-isues ka?
6 Sikaniyu se me bubungan, mania te migletu-letu kew iling te me kambing?
Sikaniyu se me tuhal, mania degma te mig-um-umbetut kew iling te me karniru?
7 He kalibutan, kaliyasi ka te pegginguma te Magbebaye;
egkelkelen ka diye te tangkaan te Manama ni Hakub,
8 ne iyan migpatulayas te weyig puun te batu,
wey migpatulalug te weyig ligkat te bangan ne batu.