116
Egdayanen ku ka Manama ne migluwas keddi
1 Eggeyinawaan ku ka Magbebaye,
su impammineg a nikandin;
intabak a ka egpangananey kandin.
2 Mig-ayad-ayad sikandin migpammineg keddiey,
sikan naa ka eglasi-lasi a eg-umew kandin taheed te malenggew e pad.
3 Layun e re egsahad te karereetan wey egpatey e perem;
tabid e re egkaalati te egkakita-kita kud ne eglebengan keddi.
Naliyasan a amana wey nalaggew.
4 Ne mig-umew a te Magbebaye,
“He Magbebaye, pangabangi a ubag ne kena a egpatey!”
5 Ka Magbebaye, hiimenawen wey meupiya;
hiid‑uwen ka Manama ta.
6 Egpangabangan te Magbebaye ka egkaayu-ayu;
te timpu te keyirapan ku, inluwas a nikandin.
7 Egpekeyimeley e ka geyinawa ku,
su impaay-ayaran a te egtanggu te Magbebaye.
8 Inluwas a te Magbebaye ka egpatey e,
impangabangan a ka egpakasinehew e,
imbulihan a ka egpakaluruy e.
9 Sikan naa ka eg-ikul a te Magbebaye,
diye te tane te neneuyag.
10 Egparahas-dahas a ne egpalintutuu minsan egpakakahi ad,
“Nabaybayaran ad amana seini.”
11 Nakakahi ad ka nabantalan,
“Me ubaten ka langun ne me etew.”
12 Nekey naan e ka igpakabehey ku te Magbebaye,
ne igsuli ku te langun ne inggimu rin ne meupiya keddi?
13 Eggale-gale a tenged te naluwas a;
egdawiten ku ka ngaran te Magbebaye ne Manama.
14 Eggimuwen ku ke nekey ka insaad ku te Magbebaye,
diye te tangkaan te langun ne keet-etawan din.
15 Amana igkannuhun te Magbebaye ka keet-etawan din ne matinumanen.
16 He Magbebaye, suluhuanen a nikeykew;
suluhuanen a nikeykew ne anak te malitan ne suluhuanen nu red.
Impaawa a nikeykew ka nabaku.
17 Egpanubad a eyew egpasalamat keykew Manama;
egdawiten ku Magbebaye ka keykew ne ngaran.
18 Eggimuwen ku ke nekey ka insaad ku te Magbebaye,
diye te tangkaan te langun ne keet-etawan din,
19 ne nalibulung diye te lama te timplu nu Magbebaye,
ne nekeelat-elat te Hirusalim.
Egdayanen ku ka Magbebaye ne Manama!