118
Kene egkataman ka geyinawa te Manama
1 Pasalamati niyu ka Magbebaye ne Manama su meupiya sikandin,
ne kene egkataman ka geyinawa rin ne kene egkabalbalawan.
2 Sikaniyu se me matig-Israil, kahi kew te,
“Kene egkataman ka geyinawa rin ne kene egkabalbalawan.”
3 Sikaniyu se me kabuhalan ni Aarun, kahi kew te,
“Kene egkataman ka geyinawa rin ne kene egkabalbalawan.”
4 Seeye se due pegkaaldek te Manama, egkahi,
“Kene egkataman ka geyinawa rin ne kene egkabalbalawan.”
5 Te subla ne pegkalaggew ku, egpangananey a te Magbebaye;
intabak a nikandin wey migmeupiye e ka geyinawa ku.
6 Lapig ku ka Magbebaye, kena a egkaaldek.
Nekey naa ka egkeyimu te etew keddiey?
7 Lapig keddi ka Magbebaye ne talagbulig;
egkakita ku ne egkatalu seeye se talag-ehet keddi.
8 Meupiya pad ka eg-aput diye te Magbebaye,
du te egsalig-salig te etew.
9 Meupiya pad ka eg-aput diye te Magbebaye,
du te egsalig-salig te me pangulu.
10 Inlingutan a te keet-etawan;
piru indeldel ku sikandan pinaahi te ngaran te Magbebaye.
11 Inlingutan a nikandan wey neeletan ad e.
Piru indeldel ku sikandan pinaahi te ngaran te Magbebaye.
12 Inlingutan a nikandan iling te me patiyukan ne miggulun keddi,
piru naawe sikandan iling te newugmas ne duhiyen;
indeldel ku sikandan pinaahi te ngaran te Magbebaye.
13 In-asek-asek a nikandan te egdula;
sikan naa ka egkareetan ad,
piru imbulihan a te Magbebaye.
14 Ka Magbebaye ka egbehey keddi te geem wey kanekal;
sikandin ka talagluwas keddiey.
15 Eg-ulahing ka me matareng diye te ugpaan dan,
ka egkahale-gale su naluwas sikandan,
“Ka maresen ne Magbebaye ka migpepanalu kanta!
16 Ka Maresen ne Magbebaye ka migbehey te kapanaluwan kanta!
Ka Maresen ne Magbebaye ka migpepanalu kanta!”
17 Kena a egpatey su egkeuyag a,
wey igpangguhud ku ka neyimu te Manama.
18 Imbaybayaran a te Magbebaye eyew egkapanulu a,
piru ware din ded bugtusa ka geyinawa ku.
19 Lukati nu ka me gumawan te katulusan,
eyew egpakaseled a wey egpakapasalamat a keykew Magbebaye.
20 Sika ka gumawan te Magbebaye;
iyan egpakaseled dutu ka me matareng.
21 Egpasalamat a su intabak a nikeykew;
ne sikeykew ka migluwas keddiey.
22 Ka batu ne insamsamilian te me talagbebaley,
nasi neyimu ne amana ne impurtanti.
23 Himu seini te Magbebaye,
wey amana ta igkeinu-inu seini.
24 Seini ka aldew ne inggimu te Magbebaye,
eggale-gale ki amana te seini ne aldew.
25 He Magbebaye, luwasa key ubag nikeykew.
Behayi key ubag te kalampusan Magbebaye.
26 Egpanalanginan seeye se egparani te Magbebaye!
Egpanalanginan ney sikaniyu diye te timplu te Magbebaye.
27 Manama ka Magbebaye ne migtanud-tanud layun kanta.
Kua niyud ka igpanubad,
wey ibanggut niyu diye te me sungey-sungey te altar ne tutunganan te igpanubad.
28 Sikeykew ka Manama ku;
egpasalamatan ku sikeykew.
Sikeykew ka Manama ku;
egdayanen ku sikeykew.
29 Pasalamati niyu ka Magbebaye su meupiya sikandin;
kene egkataman ka geyinawa rin ne kene egkabalbalawan.