136
Ka me ulahingen te pegpasalamat
1 Pasalamati niyu ka Magbebaye ne Manama su meupiya sikandin;
kene egkataman ka geyinawa rin ne kene egkabalbalawan!
2 Pasalamati niyu ka Manama ne labew te langun ne manama;
kene egkataman ka geyinawa rin ne kene egkabalbalawan!
3 Pasalamati niyu ka Amana ne Maresen ne Manama te langun;
kene egkataman ka geyinawa rin ne kene egkabalbalawan!
4 Sikandin de ka egpekeyimu te me kein-inuwan;
kene egkataman ka geyinawa rin ne kene egkabalbalawan!
5 Inggimu rin ka langit pinaahi te katagseb din;
kene egkataman ka geyinawa rin ne kene egkabalbalawan!
6 Inggimu rin ka tane ne egpakaampew te maralem ne weyig;
kene egkataman ka geyinawa rin ne kene egkabalbalawan!
7 Inggimu rin ka me malayag diye te langit;
kene egkataman ka geyinawa rin ne kene egkabalbalawan!
8 Inggimu rin ka aldew ne eglayag te maaldew;
kene egkataman ka geyinawa rin ne kene egkabalbalawan.
9 Inggimu rin ka bulan wey ka me bituen ka eglayag te marusilem;
kene egkataman ka geyinawa rin ne kene egkabalbalawan!
10 Sikandin ka miggimatey te panganey ne me lukes ne anak te me matig-Ihiptu;
kene egkataman ka geyinawa rin ne kene egkabalbalawan!
11 Impalihawang din puun te Ihiptu ka keet-etawan te Israil;
kene egkataman ka geyinawa rin ne kene egkabalbalawan!
12 Impakita rin ka dakel ne karesen din te pegpalihawang din kandan;
kene egkataman ka geyinawa rin ne kene egkabalbalawan!
13 Imbaad din ka Malalab ne Dahat;
kene egkataman ka geyinawa rin ne kene egkabalbalawan!
14 Ne impalapas din ka keet-etawan din diye te taliware te dahat;
kene egkataman ka geyinawa rin ne kene egkabalbalawan!
15 Piru inlened din ka Hari te Ihiptu wey ka me sundalu rin diye te Malalab ne Dahat;
kene egkataman ka geyinawa rin ne kene egkabalbalawan!
16 Pasalamati niyu sikandin te peg-inahak din te keet-etawan din diye te disirtu;
kene egkataman ka geyinawa rin ne kene egkabalbalawan!
17 Pasalamati niyu sikandin ka miggimatey te maddesen ne me Hari;
kene egkataman ka geyinawa rin ne kene egkabalbalawan!
18 Inggimatayan din ka mabantug ne me Hari;
kene egkataman ka geyinawa rin ne kene egkabalbalawan!
19 Inggimatayan din si Sihun, ka Hari te me Amurihanen;
kene egkataman ka geyinawa rin ne kene egkabalbalawan!
20 Inggimatayan din degma si Ug, ka Hari te Basan;
kene egkataman ka geyinawa rin ne kene egkabalbalawan!
21 Impepanunud din ka tane dan te keet-etawan din;
kene egkataman ka geyinawa rin ne kene egkabalbalawan!
22 Imbehey rin seini ne tane diye te me matig-Israil ne keet-etawan din;
kene egkataman ka geyinawa rin ne kene egkabalbalawan!
23 Ware ki nalingawi nikandin te timpu ne natalu ki te me kuntere ta;
kene egkataman ka geyinawa rin ne kene egkabalbalawan!
24 Inluwas ki nikandin puun te me kuntere ta;
kene egkataman ka geyinawa rin ne kene egkabalbalawan!
25 Impakeen din ka langun ne impangimu rin;
kene egkataman ka geyinawa rin ne kene egkabalbalawan!
26 Pasalamati niyu ka Manama ne diye te langit;
kene egkataman ka geyinawa rin ne kene egkabalbalawan!