143
Ka pegpangananey
Ka ulahingen ni Dabid.
1 He Magbebaye ne Manama, tenged te matareng ke ma wey matinumanen te saad nu,
pammineha nu ka peg-ampu ku te pegpangananey keykew, wey tabaka a.
2 Kene nu hukumi seini se suluhuanen nu,
su ware ma matareng ne etew due te tangkaan nu.
3 Intetalukunan a te me kuntere ku;
natalu a nikandan wey ingkukulung a diye te marusilem ne inged,
wey nekeiling ad e te etew ne naluhey re migpatey.
4 Purisu naawe e ka langun ne egkapallateng ku,
wey iyan e migdapit te pusung ku ka liyas.
5 Natanuran ku ka migmanlihad ne timpu,
wey nasuman-suman ku ka langun ne inggimu nu,
wey duen ad e se migpalemlem te nangimu nu dengan.
6 Ingkayew ku ka me belad ku te peg-ampu ku due te keykew;
nammaraan ka gimukud ku keykew iling te tane ne migmammara.
7 He Magbebaye ne Manama, tabaka a nikeykew kuntee!
Naawe e ka langun ne egkapallateng ku!
Kena a helesi su kema ke egkapatey ad e degma.
8 Ipasuman-suman nu keddi te tagse maselem ka geyinawa nu ne kene egkabalbalawan,
su sikeykew man de iya ka insalihan ku.
Mig-ampu a ne egpanuluen a nikeykew te dalan ne eleg ne eg-ikulen ku,
su duen e re egpabulig keykew.
9 Mig-aput a keykew Magbebaye ne Manama,
eyew egluwasen a nikeykew puun te langun ne kuntere ku.
10 Sikeykew ka Manama ne insimba ku;
panulua a nikeykew te pegtuman te igkeupii nu.
Ipeinahak a nikeykew te panisingan nu,
eyew igpakapanulud a nikandin diye te keupianan.
11 He Magbebaye ne Manama, luwasa a nikeykew eyew egkareyrey ka ngaran nu;
tenged su matareng ka, luwasa a nikeykew puun te langun ne keyirapan.
12 Tenged te geyinawa nu ne kene egkabalbalawan,
pangimatayi nu ka langun ne me kuntere ku, su suluhuanen e ma nikeykew.