149
Ka ulahingen te pegdayan
1 Dayana niyu ka Magbebaye ne Manama!
Ulahing kew te iyam ne ulahingen diye te Magbebaye;
deyraya niyu ka Manama diye te kalibulungan te me matinumanen ne keet-etawan din.
2 He me matig-Israil, manggale-gale kew tenged te Talaggimu kaniyu;
manggale-gale kew me matig-Hirusalim su sikandin ka Hari niyu.
3 Sayew kew ka egdayan kandin;
balesi niyu te me tamburin wey me salurey ka pegsaye niyu.
4 Egkahale ka Magbebaye ne Manama te keet-etawan din;
impabantug din seeye se me mapariralemen, pinaahi te pegpepanalu rin kandan.
5 Eleg ne egmanggale-gale ka keet-etawan te Manama tenged te me kapanaluwan dan;
peulahinga niyu sikandan tenged te kahale, minsan diye te me hibatanan dan.
6 Pepanguleyia niyu sikandan te pegsaye te Manama,
taheed te egpangaykayawen dan ka me panganiban dan,
7 eyew te pegsuli te me nasud; eyew te pegparusa te keet-etawan.
8 Egpamakuen dan te me keddina ka me Hari wey me pangulu te me kuntere dan.
9 Egparusaan ka me Hari sumale te suhu te Manama.
Sika ka katelesan para te me matinumanen ne keet-etawan te Manama!
Dayana niyu ka Magbebaye ne Manama!