23
Ka Manama ka talagtameng kanta
Ka ulahingen ni Dabid.
1 Sikeykew Magbebaye ka talagtameng keddi,
wey kena a egkaaminan te minsan nekey.
2 Impeyimeley a nikeykew diye te dakel ne egkatabtaban,
wey in-inahak a nikeykew peendiye te mating‑ew ne weyig.
3 Inlig‑en a nikeykew.
Impanulu a nikeykew te eleg ne egbayaan,
eyew ka meupiya ne bansa nu kene egkareetan.
4 Minsan pad ke eglihad a te bangalug ne durusilemi,
kena a egkaaldek su duma ku sikeykew.
Kena a egkakita te mareet,
su impangabangan a nikeykew wey in-inahak.
5 Insendaran a nikeykew te dakel ne egkakeen,
taheed te egpamipitew ka me kuntere ku.
In-itisan nu ka ulu ku te lana isip igbantug keddi,
wey impabayangan a nikeykew te eg-inumen.
6 Nakanengneng a ne meupiya ka layun keddiey,
wey egdakelan a nikeykew te geyinawa taheed te egkeuyag e pad.
Diya a eg-ugpe te baley nu Magbebaye ne Manama,
te ware egtamanan.