46
Duma ta ka Manama
Ka ulahingen te me kabuhalan ni Kura para te pangulu te mangngulahing. Eg-ulahingen seini te supranu ne me laheng.
1 Ka Manama ka eg-aputan ta wey ka keseg ta.
Layun sikandin egbulig kanta te timpu te keyirapan.
2 Purisu kene ki egkaaldek minsan egkawelwel ka inged,
minsan pad egkaalin ka me bubungan diye te pused te dahat,
3 minsan pad ke eglehes ka me weyig wey egbubuke,
wey minsan pad ke egkawelwel ka me bubungan te me bunlud te weyig.
4 Due weyig ne egpakapahale te siyudad te Manama,
ka matulus ne ugpaan te Amana ne Maresen ne Manama.
5 Miglemung ka Manama mig-ugpe kandan diye te siyudad,
wey kene iya seini egkamenu.
Maselem-selem ka Manama ne egbulig te siyudad.
6 Nahulikid ka me nasud wey naddeetan ka me migharian.
Migpanguleyi ka Manama wey naleney ka kalibutan.
7 Duma ta ka Amana ne Maresen ne Magbebaye.
Sikandin se Manama ni Hakub ka eg-aputan ta.
8 Hendini ka, pitawa nu ka nangimu te Magbebaye,
wey nengnengi nu ka karereetan ne nangimu rin te kalibutan.
9 Impasanggel rin ka egmahiggireey te intiru ne kalibutan,
wey nanggepu din ka me piet wey me deldeg,
wey nanilaban din ka me karwahi.
10 Kahi rin, “Peeneng-eneng kew wey ilaa a nikaniyu ne Manama.
Egdayan keddi ka me etew te minsan hendei ne me nasud,
wey egsayeen a te langun kayi te inged.”
11 Duma ta ka Amana ne Maresen ne Magbebaye.
Sikandin se Manama ni Hakub ka eg-aputan ta.