58
Egkahule ka mareet ne me etew
Ka ulahingen ni Dabid para te pangulu te mangngulahing. Eg-ulahingen seini iling te peg-ulahing te “Kene nu dereeti!”
1 Sikaniyu se me maddesen, eleg naa ka peggukum niyu te me etew?
Ne ware naa inlupihan niyu te peggukum niyu kandan?
2 Kene ne eleg ka peggukum niyu su neelin de ne mareet ka egkasuman-suman niyu.
Eggimu kew layun te dereeti ne himu minsan hendei ne inged.
3 Ka me etew ne mareet se hinimuwan, tapey en iya ne maddeet te igkaberes pad,
wey ubaten en iya puun pad te peglesut dan.
4 Egpekeiling sikandan te uled ne eggilu,
wey egsagpengan dan ka me talinga ran iling te dulepu ne kene egdineg.
5 Egpekeiling sikandan te uled ne kene egpakarineg te laheng,
te seeye se egpahehane ne egkateu ne egpangeteb-eteb.
6 He Manama, amana ne mabbulut ka me kuntere ku iling e te me liyun.
Lupua nu ka me ngipen dan wey bingawa nu ka me panayew ran.
7 Egkaawe e perem sikandan iling te weyig ne egkeetiyan.
Egkatarin perem sikandan iling te me tunud ne egpakatandeg.
8 Egpekeiling perem sikandan te buyukung ne egkeyimu ne lumut,
wey iling te bate ne egkalanlan ne ware pad nakakita te layag te aldew.
9 Dagdahawi nu sikandan te eggule te kene pad egpakasahimanu,
iling te kayu ne meyilew wey nahangu ne ig-undul te hapuy.
10 Egkahale ka me matareng ne egpakakita te me makasesale ne egdusaan.
Ig-eled dan ka me paa ran te langesa te me etew ne mareet se hinimuwan.
11 Ne egkahi ka me etew, “Malehet iya ne due unag te me matareng,
wey due Manama ne eggukum te kalibutan.”