66
Ka pegdayan wey pegpasalamat
Ka ulahingen para te pangulu te mangngulahing.
1 Sikaniyu langun se nangugpe te intiru ne kalibutan,
panguleyi kew te dakel ne kahalaan diye te Manama.
2 Ulahing kew te pegdayan te katelesan din.
Ipabantug niyu sikandin te kaniyu ne ulahingen.
3 Kahii niyu ka Manama, “Kein-inuwan amana ka me himu nu.
Subla ka ne maresen sikan naa ka migparani ka me kuntere nu,
wey miglangkeb diye te tangkaan nu.
4 Egsimbeen ka te langun ne keet-etawan te intiru ne kalibutan.
Eg-ulahingan dan ka ngaran nu.”
5 Hendini kew wey pitawa niyu ka nangimu te Manama.
Kein-inuwan amana ka nangimu rin diye te me etew.
6 Impabaluy rin ne mammara ka dahat,
wey miglihad e dutu ka me etew ne nangipanew.
Eggale-gale ki tenged te inggimu te Manama.
7 Pinaahi te geem din eghari sikandin te ware egtamanan,
wey egbantayan din ka langun ne me nasud.
Kene ne eleg ne egpegpeggasal ka me etew ne egsupak te Manama.
8 Sikaniyu se me keet-etawan, dayana niyu ka Manama ta.
Ipasengku-sengku niyu ka laheng niyu te pegdayan.
9 Sikandin ka migpariyu kanta te karereetan,
wey kene ki egbalaharen nikandin ne egsahap.
10 Su inggeraman key iya nikeykew, he Manama.
Inlinisan key nikeykew iling te putew ne inlalab te hapuy.
11 Impasahilut key nikeykew te me kuntere ney,
wey impabaybayaran key nikeykew te mabbehat ne egtiangen.
12 Impari-diekan key nikeykew te me kuntere ney,
wey nabaybayaran key iling te nasilaban wey nabaggiyuwan.
Piru in-uyan key red nikeykew diye te tane ne maluag amana.
13 Eggendiya a te timplu nu eyew egtutung te igpanubad.
Egtumanen ku ka me saad,
14 ne inlalag ku dengan te egkabaybayaran e pad.
15 Egpanubad a keykew te mallambeg ne me karniru, turu ne baka, wey kambing,
eyew igpanubad ne egtutungen.
16 Sikaniyu se egtahud te Manama, hendini kew wey pammineg kew,
su egpangguhuran ku sikaniyu ke nekey ka inggimu rin keddiey.
17 Migpangananey a te Manama,
wey indayan ku sikandin.
18 Emun ke inggeles ku re ka sale ku diye te pusung ku,
ware e buwa perem pammineha te Magbebaye.
19 Piru impammineg iya ka Manama keddi,
wey narineg din ka peg-ampu ku kandin.
20 Egdayanen ka Manama su ware din balahara ka peg-ampu ku,
wey duen ded ka geyinawa rin keddi ne kene egkabalbalawan.