68
Ka ulahingen te pegpanalu
Ka ulahingen ni Dabid para te pangulu te mangngulahing.
1 Weil kad Manama wey pegsuwaya nu ka me kuntere nu.
Ne seeye se eg-ehet keykew, egpariyu perem wey egpamallahuy.
2 Deldela nu sikandan iling te ebel ne eglayap te kalamag.
Egkaawe perem ka mareet ne me etew due te tangkaan nu,
iling te egkaleney ne kendila.
3 Piru egkahale mule ka me matareng,
wey mahalew-galew sikandan diye te tangkaan te Manama,
wey egkeele-hele sikandan.
4 Ulahingi niyu ka Manama,
ulahing kew te pegdayan kandin.
Dayana niyu sikandin se eg-untud te gapun,
wey Magbebaye ne Manama ka ngaran din.
Gale-gale kew diye te tangkaan din.
5 Sikandin ka amey te seeye se me ilu,
wey talagpangabang te me balu.
Sikandin ka Manama ne mig-ugpe diye te matulus ne timplu.
6 Egtalipunen din seeye se ware egkeugpaan,
wey igpaleke din ka pinirisu wey egpamatubungen.
Piru ka me masinupaken, eg-ugpe te mammara ne tane.
7 He Manama, te timpu ne impanguluwan nu te peggipanew ka keet-etawan nu,
wey indumaan nu sikandan diye te disirtu,
8 nawelwel ka tane wey miglugsu ka uran,
uya su miglepew ka Manama te Sinay,
ka Manama te me matig-Israil.
9 He Manama, impalugsu nu ka dakel ne uran diye te tane ne imbehey nu te keet-etawan nu,
wey in-upianan nu red ka impeugpaan nu kandan.
10 Diyad nangugpe ka keet-etawan nu,
wey imbehayan nu sikandan se egkengaayu-ayu te egkeilanganen dan,
tenged te dakel ne hid‑u nu.
11 Migsaad ka Magbebaye,
wey masulug ka me malitan ne migpangguhud te lalag din.
12 Namallahuy ka me Hari duma te me sundalu ran,
wey imbaad-baad e te me malitan ka me kasangkapan dan.
13 Minsan seeye se migpalunggehaat de eyew egtameng te me karniru,
nabaaran ded te me larawan te me selepati ne impulitan ka me pakpak te pelata,
wey impulitan ka me bulbul te malehet ne bulawan.
14 Intalagtag te Amana ne Maresen ne Manama ka me Hari,
wey nekeiling sikandan te migkehal ne weyig ne nekeempet diye te bubungan te Salmun.
15 Amana ne mateles ka bubungan te Manama, ka bubungan te Basan.
Masulug amana ka me labuntud diye te Basan.
16 Mania te egkeimma ka, Basan te seini ne me labuntud,
te bubungan ne in-alam te Manama ne eg-ugpaan?
Uya su sika iya ne bubungan ka eg-ugpaan din te ware egtamanan.
17 Amana ne masalig ka karwahi te Manama wey libu-libu seini.
Migduma sikandan te Magbebaye ne miglepew te matulus ne inged te Sinay.
18 Migtakereg sikandin te matikang ne bubungan wey mig-uyan te migluyud ne me dinakep,
wey migdawat te me dasag te me etew wey minsan te migsupak kandin.
Ne diye iya mig-ugpe ka Magbebaye ne Manama.
19 Egdayanen ka Magbebaye, ka Manama ne talagluwas kanta,
su tagse aldew ne egbulihan ki nikandin te igkalasey ta.
20 Ka Manama ta, talagluwas sikandin ne Manama.
Sikandin ka Magbebaye ne egluwas kanta eyew kene ki egkeyimatayan.
21 Ne egdekdeken din ka ulu te me kuntere din,
ne migparahas-dahas miggimu te mareet.
22 Migkahi ka Magbebaye ne Manama,
“Egpaaween ku ka me kuntere ku puun te Basan,
egpaaween ku red sikandan diye te pused te dahat,
23 eyew egpangimatayan niyu sikandan, egpandi-diekan,
wey egpandilaan te me asu niyu ka langesa ran.”
24 Egkakita te langun ka pegpanalu nu Manama,
ne migluyud ka te me etew peendiye te timplu nu,
eyew egpapitew ne migpanalu ka Manama ne Hari ku.
25 Miggun‑a ka me mangngulahing wey migsinundul ka egbales te ulahingen.
Migpataliware ka me mengebay ne egbebasal te me tamburin.
26 Migmanguleyi sikandan, “He Manama, egdayanen ka diye te kasuluhan!
Dayana niyu ka Magbebaye, sikaniyu langun se me kabuhalan ni Israil.”
27 Miggun‑a kandan ka deisek ne kabuhalan ni Binhamin,
migsinundul ka susuluhi ne kabuhalan ni Huda ne impanguluwan te me pangulu ran.
Ne migsinundul ka me pangulu te kabuhalan ni Sabulun,
ne migpamewuri ka me pangulu te kabuhalan ni Naptali.
28 Ipapitew nu ka karesen nu, he Manama,
ipapitew nu ka geem nu iling te inggimu nu dengan.
29 Ne egpanguyan ka me Hari te me dasag diye te timplu nu,
ne diye te Hirusalim.
30 Sapari nu Manama ka mahinged te me nasud ne egpekeiling te me mabbulut ne me mahintalunan diye te me luwayen.
Sapari nu man‑e ka keet-etawan ne egpekeiling te me turu wey me nati te baka,
taman te eghalad e sikandan keykew te pelata.
Pegsuwaya nu ka me etew ne egkeupian ne egpakiggira.
31 Due me etew ne eg-uyan te me dasag ne burunsi ne egpuun te Ihiptu.
Ne egkaana-ana re due ka me matig-Kus ne egkayew te me belad dan ka eg-ampu keykew Manama.
32 Ulahingi niyu ka Manama, sikaniyu se me mahinged te kalibutan.
Ulahing kew te pegdayan te Magbebaye,
33 ne mig-untud te tapey e ne langit.
Pammineg kew kandin te miglalag ne migderaheneg se laheng.
34 Ipangguhud niyu ka karesen te Manama ne migmandu te Israil.
Egkakita diye te langit ke mamenu karesen sikandin.
35 Kein-inuwan amana ka Magbebaye diye te matulus ne ugpaan din.
Manama sikandin te me matig-Israil,
wey imbehayan din te geem wey kanekal ka keet-etawan din.
Egdayanen ka Manama.