70
Ka pegpangananey te Manama
Ka ulahingen ni Dabid para te pangulu te mangngulahing, eyew egsumsumanen sikandin te Manama.
(Salmu 40:13-17)
1 Mahaan ka, he Manama wey luwasa a.
Keiyal ka Magbebaye wey bulihi a.
2 Ne seeye perem se eglelalis ne eggimatey keddiey,
egkengeyilawan perem wey egkengalibeg.
Ne seeye se egkeupian ne egdereet keddiey,
egpakalibed perem te igbaye dan wey egkaruruhu.
3 Seeye se egbaley-baley keddiey,
egpakalibed perem tenged te hilew ran.
4 Seeye se eg-aput due te keykew,
egkahale-gale perem tenged keykew.
Egkahi perem seeye se egkeupian ne egluwasen te Manama,
“Egdayanen ka Manama.”
5 Piru egkaayu-ayu e re wey ware egkeyimu.
Dugpua a ubag Manama.
Sikeykew ka talagbulig ku wey talagluwas.
Magbebaye, kene ka ubag lamu-lamu.