72
Ka peg-ampu para te Hari
Ka ulahingen ni Sulumun.
1 He Manama, panulua nu ka Hari te eleg ne peggukum,
wey ipakita nu kandin ka pegkamatareng nu
2 su eyew egmatareng sikandin ka eggukum te keet-etawan nu,
wey eleg ka peggukum din te egkengaayu-ayu.
3 Egbehey perem te panalangin ka me bubungan diye te keet-etawan nu,
wey egbulihan te labuntud ka mig-ugpe ne matareng.
4 Egpangabangan te Hari ka egkengaayu-ayu,
wey egluwasen din ka egkengaware-ware ne me etew
wey egdereetan din ka migleig-leig kandan.
5 Egpabulus perem ne egtahud ka me etew keykew,
taman te eglayag pad ka aldew wey ka bulan diye te langit.
6 Egpekeiling perem ka Hari te uran ne eglugsu diye te hilamunen,
iling te bilis-bilis ne egpakasubid te inged.
7 Egmatubung perem ka me matareng te timpu te peghari din,
wey dakel ka keupianan dan taman te eglayag pad ka bulan.
8 Eghari perem sikandin puun te limang ne dahat taman diye te limang,
wey egmandu perem sikandin te Weyig ne Iyupratis taman te katamanan te inged.
9 Egpanimbuel perem kandin ka me tribu ne diye nangugpe te disirtu,
wey egpakarile e te tane ka me kuntere din ne eglangkeb diye te tangkaan din.
10 Egduwaran perem sikandin te Hari te Tarsis,
wey te seeye ne me Hari ne diye te me ilis te dahat.
Egdasag perem kandin ka me Hari te Siyiba wey Siba.
11 Egpanimbuel perem te tangkaan din ka langun ne me Hari,
wey egpasakup kandin ka langun ne me nasud.
12 Su egbulihan din ka ware egkeyimu ke egpangananey kandin,
wey egpangabangan din ka egkaayu-ayu ne ware egpakabulig.
13 Igkeyid‑u rin ka egkaleig-leig wey ka ware egkeyimu,
wey egluwasen din seeye se egkaayu-ayu.
14 Egluwasen din ka egkalasey wey ka egkabaybayaran,
su indakelan din ka me umul ran.
15 Egmalayat perem ka umul rin.
Egbehayan perem sikandin te bulawan puun te Siyiba.
Meupiya perem ne ig-ampu sikandin layun,
wey egpanalanginan te Manama layun.
16 Egmatubung perem ka pinamula te tane,
minsan ka me pinamula diye puntul te me bubungan ne egbanley.
Egbehas perem seini iling te bubungan te Libanun.
Egmasulug perem ka me etew diye te me siyudad,
iling kasulug te me hilamunen diye te kabenesan.
17 Kene perem egkalingawan ka ngaran din te ware egtamanan,
wey egpabulus ka bantug din taman te duen pad ka aldew.
Egkapanalanginan perem ka me etew tenged kandin,
wey egngaranan sikandin te impanalanginan,
te me etew te langun ne me nasud.
18 Egdayanen ka Magbebaye, ka Manama te Israil.
Sikandin de ka egpekeyimu te minsan nekey ne me kein-inuwan.
19 Egdayanen te ware egtamanan ka mabantug ne ngaran din.
Egpekeempet perem te inged ka katelesan din.
Malehet iya. Malehet iya.
20 Seini ka katamanan te me peg-ampu ni Dabid, ka anak ni Hisi.