8
Ka kabantug te Manama wey ka bansa te etew
Ka ulahingen ni Dabid para te pangulu te mangngulahing ne egbalesen te intagpesan ne instrumintu.
1 He Magbebaye ne Manama ney,
amana ne mabantug ka ngaran nu kayi te intiru ne kalibutan!
Impakita nu ka katelesan nu ne mabantug pad du te me langit.
2 Impanulu nu ka me bate wey ka egmanusu pad eyew te pegpanengneng te karesen nu,
te pegsapad te me kuntere nu wey te langun ne egsupak keykew.
3 Emun ke egpitew a te langit ne inggimu nu,
wey egkakita ku ka bulan, wey ka me bituen ne intahu nu diye te natahuan kayi,
4 egpekeinsa a, “Nekey bes ka etew,
mania te egtantanuran nu pad?
Mania te egtangguwen nu pad ka anak te etew?”
5 Piru inggimu nu sikandin ne nakadid-diralem de keykew,
wey ingkurunaan nu te katelesan, wey kabantug.
6 Inggimu nu sikandin ne talagmandu te langun ne inggimu nu;
impariralem nu kandin ka langun:
7 ka langun ne karniru wey me baka,
wey ka me mananap diye te puwalas,
8 ka me bayaku diye te aw-awangan, wey ka me isda diye te dahat,
wey ka langun ne egbaye diye te bayaanan te dahat.
9 He Magbebaye, ne Magbebaye ne Manama ney,
amana iya ne mabantug ka ngaran nu te intiru ne kalibutan!