85
Ka peg-ampu para te keupianan te nasud
Ka ulahingen te me kabuhalan ni Kura para te pangulu te mangngulahing.
1 Magbebaye, upiani nu ma ka tane ney,
ipalibed nu red ka karatuan ni Hakub.
2 Impasaylu nud ka keet-etawan nu te me sale dan,
imbunbunan nud ka langun ne mareet ne inggimu ran.
3 Migpeeneng-eneng kad ka egkabelu-belu,
wey imbalahad nud ka egpangebel-ebel ne langet nu.
4 Ipalibed nu red ka keupianan ney, he Manama ne talagluwas ney.
Kene kad e kabelu pad kanami.
5 Kene naan en iya egkaawe ka kabelu nu kanami?
Egkalangetan ke naan pad man‑e te me kabuhalan ney keureme?
6 Kene key naan e nikeykew eg-uyahen?
Eyew egkahale key perem se keet-etawan nu tenged keykew.
7 He Magbebaye ipapitew nu kanami ka geyinawa nu ne kene egkabalbalawan,
wey luwasa key red nikeykew.
8 Egpamminehen ku ka iglalag te Magbebaye,
su keupianan ka igpangguhud te Manama te keet-etawan din.
Piru keilangan ne kenad egliberan te in-alam din ne keet-etawan ka keungelan dan.
9 Malehet iya ne egluwasen din egdagdahawi seeye se egtahud kandin,
eyew ka katelesan te Manama eg-ugpe kayi te inged ney.
10 Egpekegduma ka geyinawa ne kene egkabalbalawan wey ka kamalehetan.
Kene degma egpekegpitas ka katareng wey keupianan.
11 Eglepew te tane ka kamalehetan iling te sebseb,
iling te egpantew ka katareng diye te langit.
12 Uya iya egbehey ka Magbebaye te meupiya,
wey dakel ka eg-uma te tane.
13 Ka katareng egpekeiling te etew ne eggun‑a eggipanew,
wey iyan tuus ka kemes din te egbayaan.