Igkeep‑at ne Baad
90
(Salmu 90–106)
Ka me etew wey ka Manama
Ka peg-ampu ni Muwisis ne suluhuanen te Manama.
1 Magbebaye, sikeykew ka aputanan ney,
wey te langun ne kabuhalan ney.
2 Te ware pad neyimu ka me bubungan,
Manama kad en iya ne ware egtamanan,
minsan ware pad neyimu ka tane wey ka intiru ne kalibutan.
3 Ipalibed nu red ka etew diye te tane,
wey kahii nu, “Libed kew te tane,
sikaniyu se me etew.”
4 Su hendue te sabeka re ne aldew diye te keykew ka pila ne leg‑un,
wey nekeiling seini te senge-karusileman de.
5 Inggule nu sikandan iling te naanlas te baggiyu,
nekeiling de sikandan te taheinep,
iling te hilamunen ne migsubul te maselem-selem.
6 Mateles iya seini te maselem pad wey egsubul,
piru egkalanes e seini te maapun e wey egkahangu e.
7 Nahule key puun te kabelu nu,
naaldek key puun te langet nu.
8 Inlimud nu ka mareet ne me hinimuwan ney diye te tangkaan nu,
inlayahan nu te katelesan nu ka neeles ne me sale ney.
9 Su naheraman ney ka kabelu nu,
wey mahaan de egkataman ka peg-ugpe ney.
Mahaan de egkaawe ka me umul ney;
nekeiling de te sabeka ne pegpanlagkuy.
10 Pitu ne pulu (70) ka egkeumaan te umul ney,
wey ke walu naa ne pulu (80) ke egkeuyag key pad.
Piru neelin de ne kalasayan wey samuk ka egtamanan ney.
Piru mahaan e seini egkataman ke egkaawe key e.
11 Hentew‑a ka egpakataha te geem te pegkabelu nu?
Hentew‑a ka egpakanengneng te makaliyas-liyas ne egkaheram tenged te pegkabelu nu?
12 Purisu panulua key ne malepet de ka umul ney,
eyew egkeyimu key ne matagseb te peg-ugpe ney.
13 Libed kad, he Magbebaye kayi te kanami.
Ken‑u ka egkataman ka eg-iling due?
Ikeyid‑u nud ubag ka me suluhuanen nu.
14 Hipenua key te geyinawa nu ne kene egkabalbalawan te tagse maselem,
eyew egkahale-gale key te intiru ne umul ney.
15 Pahalaa key ubag te mananey ne timpu iling kaluhey te timpu ne nabaybayaran key,
wey iling kaluhey te timpu ne mareet ka neula-ula ney.
16 Ipapitew nu ka me himu nu diye te me suluhuanen nu,
wey ipakita nu ka dakel ne karesen nu diye te me kabuhalan dan.
17 Egpekeuma perem kanami ka keupiya te Magbebaye ne Manama ney,
wey bulihi key te langun ne eggimuwen ney.
Uya iya, idasag nu kanami ka nangimu ney.