95
Ka ulahingen te pegsaye
1 Hendini kew, eg-ulahingan ta ka Magbebaye!
Eggulub-gulub ki te kahale due te maresen ne manluluwas ta!
2 Egparani ki kandin duma te pegpasalamat,
wey eggulub-gulub ki te kahale ne eg-ulahing te pegsaye diye te kandin!
3 Su maresen ka Magbebaye ne Manama
ne labew te langun ne maddesen.
4 Miggen-genan din ka kinariraleman te tane,
wey kandin ka me pulu te me bubungan.
5 Sikandin ka kamuney te dahat su inggimu rin sika,
wey kandin man‑e ka tane su intumpi din sika.
6 Hendini kew, egpariralem ki wey egsimba ki,
egpanimbuel ki diye te tangkaan te Magbebaye ne miggimu kanta!
7 Su Manama ta sikandin,
wey keet-etawan ki nikandin ne intanggu rin iling te me karniru.
Na, emun ke egkarineg niyu kuntee ka ingkahi te Manama,
8 kene niyu pakehala ka ulu niyu iling te inggimu te kabuybuyahan niyu diye te Miriba,
wey diye te Masa ne diye te disirtu.
9 Kahi te Manama, “Mig-el-elehan a te kabuybuyahan niyu,
minsan se nakita ran e ka inggimu ku kandan.
10 Ingkeepes ku sikandan te hep‑at ne pulu ne leg‑un.
Nakakahi a te apulen seini ne me etew,
wey makehal se me ulu!
11 Sikan naa ka nabelu a wey migsaad ne migkahi,
‘Kene niyud iya egkarawat ka himelayanan ne egpuun keddiey.’ ”