98
Ka peg-ulahing diye te Magbebaye
Ka ulahingen.
1 Ulahing kew te iyam ne ulahingen diye te Magbebaye,
su kein-inuwan ka nangimu rin.
Ka kawanan ne belad din wey ka matulus ne bakelawan din,
ka puunan te kapanaluwan din.
2 Impapitew te Magbebaye ka pegpangabang din;
impapitew rin te me nasud ka katareng din.
3 Intantanuran din ka geyinawa rin ne kene egkabalbalawan,
wey ka pegtuman din te saad din te me matig-Israil.
Nakita te intiru ne kalibutan ka pegluwas te Magbebaye te Israil.
4 Eggulub-gulub kew te kahalaan se intiru ne kalibutan;
ulahing kew wey egsaye ne egkahale-gale.
5 Ulahingi niyu ka Magbebaye ne egbalesen te alpa.
Pangelit kew te alpa ne egkarumaan te eggung.
6 Parahing kew te me trumpita wey te sungey te me karniru.
Gulub-gulub kew diye te tangkaan te Hari—ka Magbebaye.
7 Eglehes ka dahat wey eggulub-gulub ka langun ne tahu kayi.
Eggulub-gulub ka kalibutan wey ka langun ne tahu diye.
8 Egpekeiling ka me weyig te me etew ne egpegtagpi te me belad dan,
ne eglagpu ka egkahale-gale ne me bubungan ne eg-ulahing,
9 diye te tangkaan te Magbebaye.
Su eglepew sikandin ka eggukum te kalibutan.
Ka peggukum din te kalibutan, eg-ikul te eleg ne gantangan wey palabian,
ne egpeg-ilingen din te eggukum ka me etew.