13
Ka peg-uyan te Tahuanan te Kasabutan
(2 Sam. 6:1-11)
1 Ne migpanginginse si Dabid diye te me kumandir te linibu wey te ginatus ne me sundalu rin, wey te langun ne pangulu te Israil.
2 Ne ingkahiyan ni Dabid ka langun ne keet-etawan te Israil ne nalibulung, “Ke eg-uyun kew wey ke igkeupii te Magbebaye ne Manama ta, egpeendiniyen ka me karumaan ta ne me matig-Israil ne diye te intiru ne tane te Israil duma te me talagpanubad wey te me Libita ne duma ran te nangugpe diye te me lungsud dan ne due me panabtaban.
3 Ne igpalibed ta kayi ka Tahuanan te Kasabutan te Manama su ware ma seini nasagman te timpu ni Saul.”
4 Ne mig-uyun ka langun te seini ne eggimuwen tenged su nakamaan-maan sikandan ne eleg seeye.
5 Sikan naa, inlibulung ni Dabid ka langun ne me matig-Israil, puun te weyig te Sihur ne diye te marani te Ihiptu taman te Bayaanan te Hamat eyew eg-angey te Tahuanan te Kasabutan te Manama ne diye te lungsud te Kiryat-Hiyarim.
6 Ne si Dabid wey ka masulug ne me matig-Israil, miggendiye te Baala ne egngaranan ded te Kiryat-Hiyarim ne sakup te Huda eyew eg-angey te Tahuanan te Kasabutan te Manama ne ingngaranan te ngaran te Magbebaye ne Manama ne migpinnuu diye te elat-elat te me kirubin.
7 Indulan dan te iyam ne kerumata ka Tahuanan te Kasabutan te Manama puun te baley ni Abinadab. Ne si Usa wey Ahiyu ka mig-inahak te kerumata ne impahanuy te me baka.
8 Ne miggale-gale diye te tangkaan te Magbebaye ne Manama si Dabid wey ka langun ne matig-Israil taman te egkeyimu ran pinaahi te me ulahingen, me lira, me alpa, me tambur, me kastanyita, wey me putew ne basalan.
9 Te pegginguma ran diye te inged ne diekanan ni Kidun, inggen-genan ni Usa ka Tahuanan te Kasabutan tenged su nasaligkat ka me baka.
10 Tenged dutu, nabelu amana ki Usa ka Magbebaye ne Manama tenged su inggen-genan din ka Tahuanan te Kasabutan, purisu inggimatayan e sikandin te Manama.
11 Ne nabelu si Dabid te inlegparan te Magbebaye ne Manama si Usa. Sikan naa ka ingngaranan ka seeye ne inged te Piris-Usa taman kuntee.
12 Ne naaldek si Dabid te Magbebaye ne Manama te seeye ne aldew wey migkahi sikandin, “Egmenuwen ku naan e te eg-uyan diye te siyudad ku ka Tahuanan te Kasabutan te Manama?”
13 Purisu warad uyana ni Dabid ka Tahuanan te Kasabutan diye te siyudad din. Sikan naa ka diyad e seini uyana te baley ni Ubid-Idum ne matig-Gat.
14 Ne diye nakatetahu te baley ni Ubid-Idum ka Tahuanan te Kasabutan te Manama te tatelu ne bulan. Ne impanalanginan te Magbebaye ne Manama ka pamilya ni Ubid-Idum wey ka langun ne kandin.