17
Ka peglalag ni Natan ki Dabid
(2 Sam. 7:1-17)
1 Te nakaalin e si Dabid diye te impeyimu rin ne palasyu, ingkahiyan din si Natan ne prupita, “Kayi ad kuntee mig-ugpe te palasyu ne inggimu puun te kayu ne sidar, piru diye de mule nakatahu ka Tahuanan te Kasabutan te Magbebaye te balungbalung.”
2 Ne migtabak si Natan ki Dabid, “Himuwa nu ka minsan nekey ne due te suman-suman nu, su migduma keykew ka Manama.”
3 Piru te sika ne marusilem, impanengneng te Manama si Natan,
4 “Hendiyei nu ka suluhuanen ku ne si Dabid wey kahii nu te kene ne sikandin ka egpasasindeg te baley ne eg-ugpaan ku.
5 Su te timpu te pegpalihawang ku te me matig-Israil puun te Ihiptu, wara a nekeugpe te baley, ke kene, diye de te eggal-halinen ne balungbalung. Su ware e re due nekeugpe te baley.
6 Miggalin-halin a mig-ugpe duma te langun ne me matig-Israil, wara a migkahi te me pangulu ran ne impabantey ku te keet-etawan ku te mania te kena a nikaniyu eggimuwan te baley ne puun te kayu ne sidar?
7 “Purisu kahii nu ka suluhuanen ku ne si Dabid te migkahi a se Amana ne Maresen ne Magbebaye, ‘Talagtameng ka dengan te me karniru diye te panabtaban piru in-alam ku sikeykew ne egkeyimu ne pangulu te keet-etawan ku ne me matig-Israil.
8 Ne indumaan ku sikeykew minsan hendei ka migpabaye wey intalu ku ka langun ne me kuntere nu ne egkabayaan nu. Ne kuntee, eggimuwen ku sikeykew ne mabantug iling te mabantug ne me etew te kalibutan.
9 Egteilan ku te inged ne egpeugpaan ku ka keet-etawan ku ne matig-Israil wey igpeugpe ku sikandan diye eyew duen e tane dan mismu, wey kenad e sikandan egkasamuk. Ne kenad e egpakareeg-deeg kandan ka maddeet ne me etew iling te inggimu ran dengan,
10 te timpu ne mig-alam a te me pangulu eyew egmandu te keet-etawan ku ne me matig-Israil. Ne egtaluwen ku ka langun ne me kuntere nu. Sikeddi se Magbebaye ne Manama, egnangen keykew te due egkeyimu ne Hari puun te kabuhalan nu.
11 Ke egpatey kad e wey iglebeng e diye te inlebengan te kabuybuyahan nu, egpasubalen ku keykew ka sabeka te me kabuhalan nu, wey eggimuwen ku ne maresen ka migharian din.
12 Sikandin ka egpasasindeg te baley para keddi, wey egsihuruwen ku ne iyan eghari ka me kabuhalan din te ware egtamanan.
13 Egkeyimu ad ne amey rin, wey egkeyimu e sikandin ne anak ku. Ne kene ku eg-aween ka geyinawa ku kandin ne kene egkabalbalawan, kene ne iling te inggimu ku te Hari ne nasinundulan nu.
14 Igpiyal ku kandin ka keet-etawan ku wey ka migharian ku. Ne ka me kabuhalan din ka egkeyimu ne me Hari te ware katammanan.’ ”
15 Ne impangguhud ni Natan ki Dabid ka langun ne impakita kandin te Magbebaye ne Manama.
Ka peg-ampu ni Dabid te pegpasalamat
(2 Sam. 7:18-29)
16 Ne migseled si Dabid diye te balungbalung ne in-ugpaan te Manama wey migpinnuu sikandin ne mig-ampu diye te tangkaan te Magbebaye ne miggenendue, “Magbebaye ne Manama, sikeddi wey ka pamilya ku, kene ne eleg te meupiya ne immangimu nu.
17 Ne kene ne sikan de ka immangimu nu, he Manama. Su migsaad ke pad iya man‑e te egginguma ne kabuhalan ku. In-isip a nikeykew ne mabantug ne etew, he Magbebaye ne Manama.
18 Warad igpakalalag ku te pegbantug nu keddi, su impabantug a nikeykew amana. Nakanengneng ka ke hentew‑a a se suluhuanen nu.
19 He Magbebaye ne Manama, para te keupianan te suluhuanen nu wey sumale te igkeupii nu, impanengneng nu seini se mabantug ne me himu.
20 Ware egpekeiling keykew Magbebaye ne Manama, wey warad duma pad ne Manama su sikeykew re iya sumale te narineg ney.
21 Ne ware lein ne nasud kayi te kalibutan ne egpekeiling te me matig-Israil, ne inluwas nu puun te Ihiptu eyew egkeyimu ne keet-etawan nu. Migmabantug ka wey miggimu ka te makaaldek-haldek ne kein-inuwan pinaahi te pegdeldel nu te me matig-Kanaan eyew egpakasubal egpekeugpe diye ka keet-etawan nu.
22 Inggimu nu ka me matig-Israil ne keet-etawan nu te ware egtamanan, wey neyimu ka ne Magbebaye ne Manama ran.
23 “Ne kuntee, Magbebaye ne Manama, himuwa nu ka insaad nu keddi te suluhuanen nu wey te pamilya ku, wey kene perem egkataman seini ne saad,
24 su eyew egmabantug ka te ware egtamanan wey egkahi ka me etew, ‘Ka Amana ne Maresen ne Magbebaye, iyan Manama te Israil!’ Ne ka pamilya ku kene egkaawe diye te tangkaan nu.
25 Egkabagget a ne eg-ampu keykew Manama ku, su impanengneng nu ma seini langun keddi te suluhuanen nu wey ingkahiyan a nikeykew te egkeyimu ne me Hari ka me kabuhalan ku.
26 He Magbebaye ne Manama, malehet ka iya ne Manama. Memeupiya ka me saad nu keddiey te suluhuanen nu.
27 Purisu meupiya ubag perem ke egkabennalan ka ne egduma te me kabuhalan ku te suluhuanen nu eyew egpakapabulus seini diye te tangkaan nu te ware egtamanan. Tenged su emun ke egduma ka se Magbebaye ne Manama, kene seini egkataman.”